പുതിയ സ്കോഡ സ്ലാവിയ , എംജി ഹെക്ടർ ഹോക്ക് , പുതിയ മാരുതി സുസുക്കി ഫ്രോങ്ക്സ്, പുതുതലമുറ ഹ്യുണ്ടായി ബയോൺ , കിയ സോറന്റോ
വരാനിരിക്കുന്ന ഉത്സവ സീസണിന് മുന്നോടിയായി ഇന്ത്യൻ വാഹന വിപണി ചൂടുപിടിക്കുന്നു. മാരുതി സുസുക്കി, എംജി, ഹ്യുണ്ടായി, കിയ, സ്കോഡ തുടങ്ങിയ പ്രമുഖ വാഹന നിർമാതാക്കൾ പുതിയ മോഡലുകളുമായി വിപണി കീഴടക്കാനുള്ള ഒരുക്കത്തിലാണ്. കോംപാക്ട് സെഡാൻ മുതൽ മൂന്ന് നിര പ്രീമിയം എസ്യുവികളും ഹൈബ്രിഡ് വാഹനങ്ങളും വരെ അടുത്ത ഒരു മാസത്തിനുള്ളിൽ റോഡിലിറങ്ങും.
അടുത്ത ഏതാനും ആഴ്ചകൾക്കുള്ളിൽ ഇന്ത്യയിൽ അരങ്ങേറ്റം കുറിക്കുന്ന പ്രധാന 5 കാറുകൾ ഇവയാണ്:
പുതിയ സ്കോഡ സ്ലാവിയ സ്കോഡയുടെ ജനപ്രിയ സെഡാനായ സ്ലാവിയയുടെ പരിഷ്കരിച്ച മിഡ്-സൈക്കിൾ പതിപ്പ് ഓഗസ്റ്റ് 18-ന് എത്തും. പൂർണ എൽഇഡി ഹെഡ്ലൈറ്റുകൾ, പിന്നിൽ ഡൈനാമിക് ടേൺ ഇൻഡിക്കേറ്ററുകൾ, 10.25 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ എന്നിവയാണ് പ്രധാന ആകർഷണം. നവീകരിച്ച എയർ കണ്ടീഷനിങ് സംവിധാനത്തോടൊപ്പം പിൻസീറ്റിൽ മസാജ് സൗകര്യവും ഉൾപ്പെടുത്തിയേക്കും.
എംജി ഹെക്ടർ ഹോക്ക് ജെഎസ്ഡബ്ല്യു എംജി മോട്ടോർ അവതരിപ്പിക്കുന്ന പുതിയ മൂന്ന് നിര എസ്യുവിയായ ‘ഹെക്ടർ ഹോക്ക്’ ഓഗസ്റ്റ് 26-ന് വിപണിയിലെത്തുമെന്നാണ് റിപ്പോർട്ട്. എംജി ഹെക്ടർ പ്ലസിന് മുകളിലായി സ്ഥാനം പിടിക്കുന്ന ഈ മോഡൽ മഹീന്ദ്ര എക്സ്യുവി 7എക്സ്ഒ, എക്സ്ഇവി 9എസ് എന്നിവയ്ക്കായിരിക്കും വെല്ലുവിളി ഉയർത്തുക. പ്ലഗ്-ഇൻ ഹൈബ്രിഡ്, പൂർണ ഇലക്ട്രിക്ക് എന്നീ പവർട്രെയിൻ ഓപ്ഷനുകളിൽ വാഹനം ലഭ്യമായേക്കും.
കിയ സോറന്റോ കിയയുടെ പ്രീമിയം എസ്യുവിയായ സോറന്റോ സെപ്റ്റംബർ 4-നാണ് എത്തുന്നത്. സ്കോഡ കൊഡിയാക്, ഫോക്സ്വാഗൺ ടെയ്റോൺ എന്നിവയോട് ഏറ്റുമുട്ടുന്ന ഈ മോഡൽ മൂന്ന് നിര സീറ്റിങ് സൗകര്യത്തോടെ വലിയ കുടുംബങ്ങൾക്കും ദീർഘദൂര യാത്രകൾക്കും അനുയോജ്യമായ രീതിയിലാണ് രൂപകൽപ്പന ചെയ്തിരിക്കുന്നത്.
പുതിയ മാരുതി സുസുക്കി ഫ്രോങ്ക്സ് അഞ്ച് ലക്ഷത്തിലധികം യൂണിറ്റുകൾ വിറ്റഴിച്ച് ജനപ്രീതി നേടിയ മാരുതി സുസുക്കി ഫ്രോങ്ക്സിന്റെ പുതുക്കിയ പതിപ്പ് സെപ്റ്റംബർ 5-ന് അവതരിപ്പിക്കും. ഡിസൈനിൽ വരുത്തിയ മാറ്റങ്ങൾക്ക് പുറമെ ക്യാബിനിലും മാറ്റങ്ങളുണ്ടാകും. മാരുതി വികസിപ്പിക്കുന്ന സീരീസ് ഹൈബ്രിഡ് എൻജിൻ സാങ്കേതികവിദ്യ അടുത്ത വർഷത്തോടെ ഫ്രോങ്ക്സിൽ ഉൾപ്പെടുത്തിയേക്കും.
പുതുതലമുറ ഹ്യുണ്ടായി ബയോൺ ജനപ്രിയ മോഡലായ ക്രെറ്റയ്ക്ക് തൊട്ടുതാഴെയായി സ്ഥാനം പിടിക്കുന്ന ഹ്യുണ്ടായിയുടെ പുതിയ മിഡ്-സൈസ് എസ്യുവി ‘ബയോൺ’ സെപ്റ്റംബറിൽ ഇന്ത്യയിലെത്തും. മാരുതി സുസുക്കി വിക്ടോറിസിനോട് മത്സരിക്കുന്ന ഈ വാഹനം 1.5 ലിറ്റർ നാച്ചുറലി ആസ്പിറേറ്റഡ് എൻജിനോടെ പെട്രോൾ, സിഎൻജി പതിപ്പുകളിൽ ലഭ്യമാകുമെന്നാണ് സൂചന.
