ചെന്നൈ: സ്ത്രീത്വത്തെ അപമാനിക്കുന്ന തരത്തിൽ വാർത്തകൾ നൽകുന്ന യൂട്യൂബർമാർക്കെതിരെ കർശന നടപടി സ്വീകരിക്കണമെന്ന് തമിഴ് നടൻ വിശാൽ. തമിഴ്നാട് പ്രതിപക്ഷ നേതാവ് ഉദയനിധി സ്റ്റാലിന്റെ അറസ്റ്റിന് പിന്നാലെയാണ് പ്രതികരണവുമായി വിശാൽ രംഗത്തെത്തിയത്.
കാവേരി നദീജല വിഷയത്തിൽ മുഖ്യമന്ത്രി വിജയിയെ വിമർശിക്കുന്നതിനിടെ നടി തൃഷയ്ക്കെതിരെ നടത്തിയ ദ്വയാർഥ പ്രയോഗത്തിന്റെ പേരിലായിരുന്നു ഉദയനിധി സ്റ്റാലിനെ പോലീസ് അറസ്റ്റ് ചെയ്തത്. പിന്നീട് അദ്ദേഹം ജാമ്യത്തിൽ പുറത്തിറങ്ങിയിരുന്നു.
സാമ്പത്തിക നേട്ടത്തിനും കാഴ്ചക്കാരെ കൂട്ടുന്നതിനുമായി നടിമാരുടെ വ്യക്തിജീവിതത്തെക്കുറിച്ച് തെറ്റായ കാര്യങ്ങൾ പ്രചരിപ്പിക്കുന്ന യൂട്യൂബർമാരുടെ പ്രവർത്തനങ്ങൾക്ക് തടയിടാൻ മുഖ്യമന്ത്രി വിജയ് ഇടപെടണമെന്ന് വിശാൽ ആവശ്യപ്പെട്ടു. തന്റെ പുതിയ ചിത്രമായ ‘മകുടം’ സിനിമയുടെ പ്രൊമോഷൻ ചടങ്ങിൽ സംസാരിക്കുകയായിരുന്നു അദ്ദേഹം.
“സ്ത്രീത്വത്തെ അപമാനിക്കുന്ന തരത്തിലുള്ള പ്രസ്താവനകൾ നടത്തുന്ന ആർക്കും ഇളവ് നൽകരുത്. എന്റെ സുഹൃത്തായ ഉദയനിധി തെറ്റായ കാര്യം പറഞ്ഞപ്പോൾ പോലീസ് അറസ്റ്റ് ചെയ്തു. എന്നാൽ പണത്തിനുവേണ്ടി പല യൂട്യൂബർമാരും നടിമാരുടെ സ്വകാര്യ ജീവിതത്തെക്കുറിച്ച് തെറ്റായ കാര്യങ്ങൾ പ്രചരിപ്പിക്കുന്നുണ്ട്. ഇത്തരം യൂട്യൂബർമാർക്കെതിരെയും അടിയന്തര നടപടി ഉണ്ടാകണം,” విశാൽ പറഞ്ഞു.
നടൻ വിശാൽ ആദ്യമായി സംവിധാനം ചെയ്യുന്ന ചിത്രമാണ് ‘മകുടം’. ‘ഐങ്കരൻ’, ‘ഈട്ടി’ എന്നീ സിനിമകളിലൂടെ ശ്രദ്ധേയനായ രവി അരസ് സംവിധാനം ചെയ്യാനിരുന്ന ചിത്രം അഭിപ്രായ ഭിന്നതകളെ തുടർന്നാണ് വിശാൽ ഏറ്റെടുത്തത്. ചിത്രത്തിന്റെ കഥ രവി അരസിന്റേതാണ്. അഞ്ജലിയും ദുഷാര വിജയനുമാണ് ചിത്രത്തിൽ പ്രധാന സ്ത്രീ കഥാപാത്രങ്ങളെ അവതരിപ്പിക്കുന്നത്.
