കൊച്ചി: ‘അമ്മ’ (AMMA) സംഘടനയുടെ തലപ്പത്തേക്ക് ആരോപണവിധേയർ വരുന്നത് തടയുമെന്ന നടി ശ്വേത മേനോന്റെ നിലപാടിനെതിരെ ശക്തമായ ചോദ്യങ്ങളുമായി നടി മാലാ പാർവതി. ഹേമ കമ്മിറ്റി റിപ്പോർട്ടിൽ പരാമർശിക്കപ്പെട്ടതും എന്നാൽ സംഘടനയുടെ നേതൃത്വത്തിലേക്ക് വരാൻ ശ്രമിക്കുന്നതുമായ ‘കുറ്റാരോപിതർ’ ആരൊക്കെയാണെന്ന് ശ്വേത മേനോൻ വ്യക്തമാക്കണമെന്ന് മാലാ പാർവതി ആവശ്യപ്പെട്ടു.
‘അമ്മ’ സംഘടനയെ രക്ഷിക്കാനായി ശ്വേത മേനോൻ ശക്തമായി പോരാടുന്നു എന്ന അവകാശവാദത്തോടെ പുറത്തുവന്ന കുറിപ്പിനോട് സോഷ്യൽ മീഡിയയിലൂടെ പ്രതികരിക്കുകയായിരുന്നു അവർ.
പേരുകൾ കൃത്യമായി വെളിപ്പെടുത്താതെയുള്ള അപൂർണ്ണമായ പ്രസ്താവനകൾ അനാവശ്യ സംശയങ്ങളും തെറ്റിദ്ധാരണകളും മാത്രമേ ഉണ്ടാക്കൂ എന്ന് മാലാ പാർവതി ചൂണ്ടിക്കാട്ടി.
“ഹേമ കമ്മിറ്റി റിപ്പോർട്ടിൽ പേരുള്ള കുറ്റാരോപിതർ ‘അമ്മ’യുടെ തലപ്പത്തേക്ക് വരാതിരിക്കാൻ അവർ ശക്തമായി പോരാടുകയാണെന്നാണ് അവകാശപ്പെടുന്നത്. നല്ല കാര്യം തന്നെ. എന്നാൽ ഹേമ കമ്മിറ്റി റിപ്പോർട്ടിൽ പരാമർശിക്കപ്പെട്ടതും അതേസമയം സംഘടനയുടെ തലപ്പത്ത് വരാൻ ശ്രമിക്കുന്നതുമായ ആ കുറ്റാരോപിതർ ആരൊക്കെയാണെന്ന് ശ്വേത മേനോൻ വ്യക്തമാക്കണം. പൊതുവിൽ ചർച്ച ചെയ്യപ്പെടുന്ന സിദ്ദിഖ്, ബാബുരാജ്, ഇടവേള ബാബു തുടങ്ങിയവർക്കെതിരായ ആരോപണങ്ങൾ ഹേമ കമ്മിറ്റി റിപ്പോർട്ടിൽ നേരിട്ട് വന്നതല്ല. ഇവർ നേതൃത്വത്തിലേക്ക് വരില്ലെന്ന് നേരത്തേ തന്നെ വ്യക്തമാക്കിയവരാണ്. ജനറൽ ബോഡി നിയോഗിച്ച ഇടക്കാല സമിതിയിലും ഇവർ അംഗങ്ങളല്ല. അപ്പോൾ ശ്വേത മേനോൻ പരാമർശിക്കുന്നവർ ആരാണ്? ഇത്തരമൊരു പ്രസ്താവന നടത്തിയ സാഹചര്യത്തിൽ അത് പൊതുസമൂഹത്തോടും സംഘടനാംഗങ്ങളോടും വിശദീകരിക്കാനുള്ള ഉത്തരവാദിത്വം അവർക്കുണ്ട്.” — മാലാ പാർവതി
‘പ്രസിഡന്റ് അല്ല, രാജിവെച്ചു പോയ പ്രസിഡന്റ്’ — പൊന്നമ്മ ബാബു
മാലാ പാർവതിയുടെ ഫേസ്ബുക്ക് കുറിപ്പിന് താഴെ നിരവധി പേരാണ് പ്രതികരണങ്ങളുമായെത്തിയത്. ശ്വേത മേനോനെ ‘അമ്മയുടെ പ്രസിഡന്റ്’ എന്ന് അഭിസംബോധന ചെയ്തതിനെ തിരുത്തിക്കൊണ്ട് നടി പൊന്നമ്മ ബാബുവും രംഗത്തെത്തി.
“മാലാ പാർവതി ‘അമ്മയുടെ പ്രസിഡന്റ്’ എന്ന് പ്രയോഗിച്ചത് തിരുത്തണം. രാജിവെച്ചു പോയ അമ്മയുടെ പ്രസിഡന്റ് എന്ന് വേണം പറയാൻ,” എന്നായിരുന്നു പൊന്നമ്മ ബാബുവിന്റെ കമന്റ്.
പൊന്നമ്മ ബാബുവിന്റെ തിരുത്ത് അംഗീകരിച്ച മാലാ പാർവതി മറുപടിയും നൽകി. ശ്വേത മേനോന്റെ പോസ്റ്റിന് നൽകിയ മറുപടി എന്ന നിലയിലാണ് അങ്ങനെ എഴുതിയതെന്നും അവർ രാജി വെച്ചതാണെന്ന ബോധ്യം തനിക്കുണ്ടെന്നും മാലാ പാർവതി വ്യക്തമാക്കി.
