വിമാനയാത്രക്കാർക്ക് ആശ്വാസം; ഈ അധിക നിരക്കുകൾ ഇനിയില്ല

ലണ്ടൻ: വിമാന യാത്രക്കാരിൽനിന്ന് കമ്പനികൾ ഈടാക്കിവന്ന അനാവശ്യ അധിക നിരക്കുകൾ ഒഴിവാക്കാൻ ബ്രിട്ടീഷ് സർക്കാർ പുതിയ നിയമങ്ങൾ പ്രാബല്യത്തിൽ വരുത്തി. 14 വയസ്സിൽ താഴെയുള്ള കുട്ടികൾക്ക് മാതാപിതാക്കൾക്കൊപ്പം സൗജന്യമായി ഇരിക്കാനും ടിക്കറ്റിലെ പേരുപിശകുകൾ അനായാസം തിരുത്താനും സൗകര്യമൊരുക്കുന്നതാണ് പുതിയ നിയമം. ഒക്ടോബർ രണ്ടു മുതലാണ് പുതിയ പരിഷ്കാരങ്ങൾ പ്രാബല്യത്തിൽ വന്നതെന്ന് ബ്രിട്ടീഷ് സർക്കാർ വ്യക്തമാക്കി.

കുടുംബമായി യാത്ര ചെയ്യുന്നവർക്ക് ഏറെ ആശ്വാസകരമാണ് ഈ തീരുമാനം. ഒരേ കുടുംബത്തിലെ അംഗങ്ങൾക്ക് അടുത്തടുത്ത സീറ്റുകൾ ലഭ്യമാക്കുന്നതിന് വിമാനക്കമ്പനികൾ നിലവിൽ വലിയ തുക അധികമായി ഈടാക്കിയിരുന്നു. മടക്കയാത്ര ഉൾപ്പെടെയുള്ള സീറ്റുകൾ ഉറപ്പാക്കാൻ ചില ഘട്ടങ്ങളിൽ 104 പൗണ്ട് (ഏകദേശം 11,000 രൂപ) വരെ അധികമായി നൽകേണ്ടിവന്നിരുന്നു. പുതിയ നിയമപ്രകാരം 14 വയസ്സിൽ താഴെയുള്ള കുട്ടികൾക്ക് കൂടെയുള്ള മുതിർന്ന യാത്രക്കാരുടെ തൊട്ടടുത്ത സീറ്റ് നൽകാൻ വിമാനക്കമ്പനികൾ ബാധ്യസ്ഥരാണ്. ഇതിനായി പ്രത്യേകം തുക ഈടാക്കാൻ പാടില്ല.

ടിക്കറ്റിലെ പേരുപിശകുകൾ തിരുത്താൻ സൗജന്യ സൗകര്യം

വിമാന ടിക്കറ്റ് ബുക്ക് ചെയ്യുമ്പോൾ വരുന്ന ചെറിയ അക്ഷരപ്പിശകുകൾ തിരുത്തുന്നതിന് ചില വിമാനക്കമ്പനികൾ 40 പൗണ്ട് വരെ ഈടാക്കിയിരുന്നു. എന്നാൽ, ലളിതമായ പേരുപിശകുകൾ സൗജന്യമായി തിരുത്തി നൽകണമെന്ന് പുതിയ ഉത്തരവിൽ പറയുന്നു.

അതേസമയം, വിമാനത്തിനുള്ളിൽ ഗുരുതരമായ രീതിയിൽ പ്രശ്നങ്ങൾ സൃഷ്ടിക്കുന്ന യാത്രക്കാർക്കെതിരെ കടുത്ത നടപടി സ്വീകരിക്കാനും ബ്രിട്ടൻ തീരുമാനിച്ചിട്ടുണ്ട്. ഇത്തരക്കാരെ തിരിച്ചറിയാൻ വിമാനക്കമ്പനികളും വ്യോമയാന മേഖലയിലെ തൊഴിലാളി സംഘടനകളുമായി സഹകരിച്ച് പ്രത്യേക വിവരപങ്കിടൽ സംവിധാനം രൂപീകരിക്കും. കഴിഞ്ഞ വർഷം മാത്രം ആയിരത്തിലധികം അനിഷ്ട സംഭവങ്ങൾ റിപ്പോർട്ട് ചെയ്ത സാഹചര്യത്തിലാണ് ഈ നീക്കം. പ്രശ്നക്കാരായ യാത്രക്കാർക്ക് യാത്രാവിലക്ക് ഏർപ്പെടുത്തുന്നത് ഉൾപ്പെടെയുള്ള കർശന നടപടികൾ വിമാനക്കമ്പനികൾക്ക് സ്വീകരിക്കാം.

യാത്രക്കാരുടെ അവകാശങ്ങൾ സംരക്ഷിക്കുന്നതിനും വ്യോമയാന മേഖലയിലെ നയങ്ങൾ കൂടുതൽ സുതാര്യമാക്കുന്നതിനുമാണ് പുതിയ നിയമങ്ങളിലൂടെ സർക്കാർ ലക്ഷ്യമിടുന്നത്.