റഷ്യ-ഉക്രെയ്ൻ ഊർജ്ജ വെടിനിർത്തൽ, വമ്പൻ പ്രഖ്യാപനം നടത്തി ട്രംപ്; തനിക്ക് പുതിയ വാർത്തയെന്ന് സെലെൻസ്‌കി

വാഷിങ്‌ടൺ: റഷ്യയും ഉക്രെയ്നും തമ്മിൽ ഉടനടി പ്രാബല്യത്തിൽ വരുന്ന രീതിയിൽ 'ഊർജ്ജ വെടിനിർത്തൽ' കരാറിലെത്തിയതായി അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. എന്നാൽ ട്രംപിന്റെ ഈ പ്രഖ്യാപനം തനിക്ക് തികച്ചും പുതിയൊരു വിവരമാണെന്ന് ഉക്രെയ്ൻ പ്രസിഡന്റ് വൊളോഡിമിർ സെലെൻസ്‌കി പ്രതികരിച്ചു.

റഷ്യയും ഉക്രെയ്നും തമ്മിലുള്ള യുദ്ധത്തിൽ ഇരുവിഭാഗവും ഊർജ്ജ വെടിനിർത്തലിന് സമ്മതിച്ചിട്ടുണ്ടെന്നും ഇത് ഉടൻ പ്രാബല്യത്തിൽ വരുമെന്നും ട്രംപ് തന്റെ ട്രൂത്ത് സോഷ്യൽ പോസ്റ്റിലൂടെ വ്യക്തമാക്കുകയായിരുന്നു. വെടിനിർത്തൽ ലംഘിക്കരുതെന്ന് മുന്നറിയിപ്പ് നൽകിയെങ്കിലും ഇതിന്റെ സമയപരിധിയോ അത് എങ്ങനെ നടപ്പിലാക്കുമെന്നോ അദ്ദേഹം വിശദീകരിച്ചിട്ടില്ല. വിഷയത്തിൽ ക്രെംലിന്റെയോ വൈറ്റ് ഹൗസിന്റെയോ ഔദ്യോഗിക പ്രതികരണങ്ങൾ പുറത്തുവന്നിട്ടില്ല.

'റഷ്യ തയ്യാറെങ്കിൽ ഉക്രെയ്നും ഒരുക്കം'

ട്രംപിന്റെ പ്രഖ്യാപനം തനിക്ക് അപ്രതീക്ഷിത വാർത്തയാണെന്നാണ് സെലെൻസ്‌കി പറഞ്ഞത്. റഷ്യക്കാർ ഊർജ്ജ വെടിനിർത്തലിന് തയ്യാറാണെങ്കിൽ ഉക്രെയ്നും അതിന് ഒരുക്കമാണെന്ന് അദ്ദേഹം വ്യക്തമാക്കി. ട്രംപ് പുടിനുമായി ഇത് ചർച്ച ചെയ്തിട്ടുണ്ടെങ്കിൽ വെടിനിർത്തൽ എന്ന് ആരംഭിക്കുമെന്ന് അറിയിക്കണമെന്നും ഉക്രെയ്ൻ അത് സ്വീകരിക്കാൻ തയ്യാറാണെന്നും സെലെൻസ്‌കി കൂട്ടിച്ചേർത്തു.

കാനഡ പ്രധാനമന്ത്രി മാർക്ക് കാർണി, നാറ്റോ ജനറൽ സെക്രട്ടറി മാർക്ക് റുട്ടെ, ഫിൻലാൻഡ് പ്രസിഡന്റ് അലക്സ് സ്റ്റബ്ബ് എന്നിവരുമായി പുതിയ വെടിനിർത്തൽ നീക്കത്തെക്കുറിച്ച് സംസാരിച്ചതായി സെലെൻസ്‌കി എക്‌സിലൂടെ (ട്വിറ്റർ) വ്യക്തമാക്കി. ഉക്രെയ്ൻ വെടിനിർത്തലിനെ പിന്തുണയ്ക്കുന്നുണ്ടെന്നും റഷ്യയുടെ നിലപാട് നിർണായകമാണെന്നും പറഞ്ഞ അദ്ദേഹം, യു.എസ് ഭാഗത്തുനിന്നുള്ള കൂടുതൽ വിശദാംശങ്ങൾക്കായി കാത്തിരിക്കുകയാണെന്നും വ്യക്തമാക്കി.

ആക്രമണം തുടർന്ന് റഷ്യ

അതേസമയം, വെടിനിർത്തൽ പ്രഖ്യാപനത്തിന് തൊട്ടുപിന്നാലെയും റഷ്യൻ ആക്രമണം തുടരുകയാണെന്ന് സെലെൻസ്‌കി ആരോപിച്ചു. കീവിലും ഖാർകിവ് മേഖലയിലും റഷ്യ നടത്തിയ ഡ്രോൺ ആക്രമണങ്ങളിൽ പവർ പ്ലാന്റുകൾ തകർന്നതായി അദ്ദേഹം ചൂണ്ടിക്കാട്ടി. യു.എസ് പ്രസിഡന്റ് ഊർജ്ജ വെടിനിർത്തൽ പ്രഖ്യാപിച്ചതിന് തൊട്ടുപിന്നാലെയാണ് ഈ ആക്രമണങ്ങളെല്ലാം നടന്നതെന്നും ഉക്രെയ്ൻ പ്രസിഡന്റ് ആരോപിച്ചു.