ജർമ്മനിയിൽ 3 മലയാളികളുടെ മരണം കൊലപാതകം, തീയിട്ടത് അയൽവാസി; അഞ്ജലിയും നോവയും സിവിനും പുതിയ അപ്പാർട്ട്മെന്‍റിലെത്തിയിട്ട് ഒരാഴ്ച മാത്രം
Nazeema
സ്റ്റാഫ് റിപ്പോർട്ടർ
ജർമ്മനിയിലെ ബോച്ചുമിൽ മൂന്ന് മലയാളികൾ വിഷപ്പുക ശ്വസിച്ച് മരിച്ച സംഭവം ബോധപൂർവമായ കൊലപാതകമെന്ന് ജർമ്മൻ പൊലീസ് സ്ഥിരീകരിച്ചു; കെട്ടിടത്തിന് തീയിട്ട റൊമാനിയൻ പൗരൻ അറസ്റ്റിൽ.
ബെർലിൻ: ജർമ്മനിയിലെ ബോച്ചുമിൽ റെസിഡൻഷ്യൽ കെട്ടിടത്തിലുണ്ടായ തീപിടിത്തത്തിൽ മൂന്ന് മലയാളികൾ വിഷപ്പുക ശ്വസിച്ച് മരിച്ച സംഭവം ബോധപൂർവമായ കൊലപാതകമെന്ന് സ്ഥിരീകരിച്ച് ജർമ്മൻ പൊലീസ്. അപകടത്തിൽ സാങ്കേതിക തകരാറുകൾ ഒന്നുമില്ലെന്നും കെട്ടിടത്തിന് മനഃപൂർവം തീയിട്ടതാണെന്നും പൊലീസ് കണ്ടെത്തി. സംഭവവുമായി ബന്ധപ്പെട്ട് കെട്ടിടത്തിൽ താമസിച്ചിരുന്ന 41 വയസ്സുകാരനായ റൊമാനിയൻ പൗരനെ ഹോമിസൈഡ് സ്ക്വാഡ് അറസ്റ്റ് ചെയ്തു.
ഹോഫ്സ്റ്റെഡ് ജില്ലയിലെ പോസ്റ്റ്‌സ്ട്രാസെയിലുള്ള ബഹുനില കെട്ടിടത്തിലുണ്ടായ അഗ്നിബാധയിൽ കൊല്ലം ചാമക്കാട് സ്വദേശിനി അഞ്ജലി ഷീല ജോയ് (25), ഇടുക്കി കട്ടപ്പന സ്വദേശിനി നോവ സാബു (25), കാലടി സ്വദേശി സിവിൻ ജോണി (26) എന്നിവരാണ് ദാരുണമായി കൊല്ലപ്പെട്ടത്. ചൊവ്വാഴ്ച പുലർച്ചെ 4.15ഓടെയായിരുന്നു സംഭവം. രണ്ടാഴ്ച മുമ്പ് മാത്രമാണ് ഇവർ ഈ കെട്ടിടത്തിലെ രണ്ടാം നിലയിലുള്ള അപ്പാർട്ട്മെന്റിൽ താമസത്തിനെത്തിയത്.
താഴത്തെ നിലയിലെ ഇടനാഴിയിൽ സൂക്ഷിച്ചിരുന്ന കുട്ടികളുടെ സ്ട്രോളറുകൾക്ക് തീവച്ചതാകാമെന്നാണ് പൊലീസിന്റെ പ്രാഥമിക നിഗമനം. ഇത് പിന്നീട് മുകളിലേക്ക് കയറാനുള്ള തടികൊണ്ടുള്ള കോവണിയിലേക്ക് ആളിപ്പടരുകയായിരുന്നു. തീപിടിത്തത്തിന്റെ കഠിനമായ ചൂടിൽ ഭിത്തിയിലെ ലെറ്റർബോക്സുകൾ പോലും ഉരുകിനശിച്ച നിലയിലാണ്. പ്രതിയെ കസ്റ്റഡിയിലെടുത്ത പൊലീസ് വിശദമായ ചോദ്യം ചെയ്യൽ നടത്തിവരികയാണ്. തീപിടിത്തത്തിൽ പരിക്കേറ്റ അഞ്ച് പേർ വിവിധ ആശുപത്രികളിൽ ചികിത്സയിലാണ്.
പ്രതീക്ഷകളുമായി ജർമ്മനിയിലെത്തിയവർ
റിട്ട. സബ് ഇൻസ്പെക്ടർ കെ.പി. സാബുവിന്റെ മകളായ നോവ സാബു ജൂലൈ മൂന്നിനാണ് ജർമ്മനിയിലെത്തിയത്. പാർട്ട് ടൈം ജിം ട്രെയിനറായി ജോലി ചെയ്തുവരികയായിരുന്നു. ഉപരിപഠനത്തിനായി രണ്ട് ആഴ്ച മുൻപാണ് കാലടി സ്വദേശി സിവിൻ ജോണി ജർമ്മനിയിൽ എത്തിയത്. ജോലി ആവശ്യത്തിനായി ജൂലൈയിലാണ് അഞ്ജലി ഷീല ജോയ് ജർമ്മനിയിലെത്തിയത്. ഇവർ വെയർഹൗസിൽ ജോലി ചെയ്തുവരികയായിരുന്നു.
മൃതദേഹങ്ങൾ നാട്ടിലെത്തിക്കാൻ ശ്രമങ്ങൾ ആരംഭിച്ചു
മരിച്ച മൂന്ന് പേരുടേയും മൃതദേഹങ്ങൾ എത്രയും പെട്ടെന്ന് നാട്ടിലെത്തിക്കാൻ സഹായിക്കണമെന്ന് ആവശ്യപ്പെട്ട് കൊല്ലം എം.പി എൻ.കെ. പ്രേമചന്ദ്രൻ ജർമ്മനിയിലെ ഇന്ത്യൻ അംബാസഡർ അജിത് ഗുപ്തയ്ക്ക് കത്തയച്ചു. നോർക്കയുടെയും ഇന്ത്യൻ എംബസിയുടെയും സഹകരണത്തോടെ ആവശ്യമായ നടപടികൾ ആരംഭിച്ചതായി സംസ്ഥാന സർക്കാർ അറിയിച്ചു. ദുരന്തത്തിൽപെട്ടവരുടെ കുടുംബങ്ങളെ സഹായിക്കാനായി ജർമ്മനിയിലെ മലയാളി സംഘടനകളും രംഗത്തുവന്നിട്ടുണ്ട്.
