യുഎഇയിൽ ക്രിമിനൽ ശിക്ഷാ നിയമങ്ങളിൽ നിർണായക ഭേദഗതി; കൊലപാതക കേസുകളിൽ കുടുംബം മാപ്പുനൽകിയാലും കുറഞ്ഞത് 15 വർഷം തടവ്

ശിക്ഷാ കാലാവധി: ഖിസാസ് ഒഴിവാക്കുന്ന പക്ഷം പ്രതികൾക്ക് ലഭിക്കാവുന്ന ശിക്ഷ 15 മുതൽ 20 വർഷം വരെ തടവായി മാറ്റി. മുൻപ് ഇത് 7 മുതൽ 15 വർഷം വരെയായിരുന്നു.

മാപ്പ് നൽകിയാലും ബാധകം: നിയമനടപടികളുടെ ഏത് ഘട്ടത്തിലോ ശിക്ഷ നടപ്പാക്കുന്നതിന് തൊട്ടുമുമ്പോ ഇരയുടെ അവകാശികൾ മാപ്പുനൽകിയാലും പുതിയ ശിക്ഷാനിയമം ബാധകമായിരിക്കും. ഇരയുടെ ബന്ധുക്കളുടെ മാപ്പുനൽകൽ കുറ്റവാളിയുടെ ക്രിമിനൽ ഉത്തരവാദിത്തത്തെ ഇല്ലാതാക്കില്ല. ഖിസാസ് ഒഴിവായാലും സമൂഹത്തോടുള്ള കുറ്റകൃത്യമെന്ന നിലയിൽ ശിക്ഷ ലഭിക്കും.

കോടതിയുടെ വിചാരണാധികാരം: 15നും 20നും ഇടയിലുള്ള ശിക്ഷാ കാലാവധിയിൽ എത്ര വർഷം നൽകണമെന്ന് കുറ്റകൃത്യത്തിന്‍റെ സ്വഭാവം വിലയിരുത്തി കോടതിക്ക് തീരുമാനിക്കാം.

ആത്മഹത്യാശ്രമം കുറ്റകൃത്യമല്ലാതായി: ആത്മഹത്യാശ്രമം ഇനി മുതൽ ക്രിമിനൽ കുറ്റമായി കണക്കാക്കില്ലെന്നതാണ് മറ്റൊരു പ്രധാന ഭേദഗതി. മാനസിക ബുദ്ധിമുട്ടുകൾ അനുഭവിക്കുന്നവർ നിയമനടപടി ഭയന്ന് ചികിത്സ തേടാൻ മടിക്കുന്നത് ഒഴിവാക്കാനാണ് ഈ മാറ്റം. ശിക്ഷാ നടപടികൾക്ക് പകരം പ്രതിരോധത്തിനും മാനസിക ആരോഗ്യ സംരക്ഷണത്തിനുമാണ് മുൻഗണന നൽകുന്നത്.

പ്രേരണാക്കുറ്റത്തിന് കടുത്ത ശിക്ഷ: ആത്മഹത്യ ചെയ്യാൻ പ്രേരിപ്പിക്കുകയോ സഹായിക്കുകയോ ചെയ്യുന്നവർക്കെതിരെ കടുത്ത ശിക്ഷ തുടരും. ഇതിന്‍റെ ഫലമായി ആരെങ്കിലും മരണപ്പെടുകയാണെങ്കിൽ 5 മുതൽ 7 വർഷം വരെ തടവുശിക്ഷ ലഭിക്കുന്ന രീതിയിലുള്ള നിയമങ്ങളും പുതിയ ഭേദഗതിയിൽ ഉൾപ്പെടുത്തിയിട്ടുണ്ട്.