സുരക്ഷാ മുൻകരുതൽ; റിയാദ് വിമാനത്താവളത്തിന്‍റെ പ്രവർത്തനം നിർത്തിവെച്ച നടപടി തുടരും, ശക്തമായ മറുപടി നൽകുമെന്ന് സൗദി ഊർജ്ജ മന്ത്രി

റിയാദ്: ഹൂതി ആക്രമണങ്ങളുടെ പശ്ചാത്തലത്തിൽ റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിൻ്റെ പ്രവർത്തനം താൽക്കാലികമായി നിർത്തിവെച്ച നടപടി നീട്ടിയതായി സൗദി ജനറൽ അതോറിറ്റി ഓഫ് സിവില്‍ ഏവിയേഷൻ അറിയിച്ചു. വിമാനത്താവളത്തിൻ്റെ പൂർണ്ണ സുരക്ഷയും പ്രവർത്തന സജ്ജതയും ഉറപ്പുവരുത്തുന്നതിൻ്റെ ഭാഗമായാണ് നടപടി.

ഒക്ടോബർ 10, 11 തീയതികളിൽ വിമാനത്താവളം ലക്ഷ്യമാക്കി നടന്ന ഹൂതി ആക്രമണങ്ങളിൽ വൻ നാശനഷ്ടങ്ങളാണ് റിപ്പോർട്ട് ചെയ്തത്. ഒക്ടോബർ 10-നുണ്ടായ ആക്രമണത്തിൽ 12 പേർ മരണപ്പെടുകയും മുന്നൂറിലധികം പേർക്ക് പരിക്കേൽക്കുകയും ചെയ്തിരുന്നു. ഒക്ടോബർ 11-ന് ഉച്ചയ്ക്ക് ശേഷം നടന്ന തുടർ ആക്രമണത്തിൽ ഉംറ തീർഥാടകനായ ഒരു പാകിസ്താൻ പൗരൻ കൊല്ലപ്പെടുകയും 11 പേർക്ക് പരിക്കേൽക്കുകയും ചെയ്തു. സ്ഫോടനത്തിൽ വിമാനത്താവളത്തിനുണ്ടായ ഭൗതിക നാശനഷ്ടങ്ങൾ തിട്ടപ്പെടുത്തി വരികയാണെന്ന് അധികൃതർ വ്യക്തമാക്കി.

രാജ്യത്തിന് നേരെ തുടർച്ചയായുണ്ടാകുന്ന ആക്രമണങ്ങൾക്ക് ശക്തമായ ഭാഷയിൽ മറുപടി നൽകുമെന്ന് സൗദി ഊർജ്ജ മന്ത്രി അബ്ദുൽ അസീസ് ബിൻ സൽമാൻ അൽ സൗദ് രാജകുമാരൻ മുന്നറിയിപ്പ് നൽകി. റിയാദിൽ നടന്ന ഊർജ്ജ സമ്മേളനത്തിൽ സംസാരിക്കുകയായിരുന്നു അദ്ദേഹം. "കഴിഞ്ഞ കുറച്ച് ആഴ്ചകളായി ഉണ്ടാകുന്ന സംഭവവികാസങ്ങൾ വളരെ ഗൗരവമുള്ളതാണ്. രാജ്യത്തിൻ്റെ സുരക്ഷ തകർക്കാൻ ലക്ഷ്യമിട്ടുള്ള ഇത്തരം നീക്കങ്ങൾക്ക് തത്തുല്യവും കടുത്തതുമായ തിരിച്ചടി തന്നെ നൽകും," മന്ത്രി വ്യക്തമാക്കി.