എഐയുടെ വളർച്ചയ്ക്ക് ഇനി തടസം ചിപ്പ് ക്ഷാമമല്ല, പണച്ചെലവ്; മുന്നറിയിപ്പുമായി ഇൻ്റൽ, ബ്രോഡ്കോം മേധാവികൾ

ആർട്ടിഫിഷ്യൽ ഇന്റലിജൻസ് (എഐ) മേഖല നേരിടാൻ പോകുന്ന ഏറ്റവും വലിയ വെല്ലുവിളി ചിപ്പ് ക്ഷാമമോ വൈദ്യുതി ലഭ്യതയോ അല്ല, മറിച്ച് ഭീമമായ മൂലധനച്ചെലവാണെന്ന് ടെക് ഭീമന്മാരായ ഇന്റൽ, ബ്രോഡ്കോം മേധാവികൾ. എഐ അടിസ്ഥാന സൗകര്യങ്ങൾ ഒരുക്കുന്നതിനുള്ള ചെലവ് കുത്തനെ ഉയരുന്ന സാഹചര്യത്തിൽ നിക്ഷേപത്തിന് തക്കതായ വരുമാനം കണ്ടെത്തുക കമ്പനികൾക്ക് കടുത്ത വെല്ലുവിളിയാകുമെന്ന് ഇരുവരും വ്യക്തമാക്കി.

സിംഗപ്പൂരിൽ നടന്ന ഡി.ബി.എസ് ഏഷ്യ ഫ്യൂച്ചർ ഫോർവേഡ് കോൺഫറൻസിൽ സംസാരിക്കവെയാണ് ബ്രോഡ്കോം സി.ഇ.ഒ ഹോക് ടാൻ നിലപാട് വ്യക്തമാക്കിയത്. ചിപ്പ് ഉൽപ്പാദനത്തിന് ആവശ്യമായ വേഫറുകൾ, മെമ്മറി ചിപ്പുകൾ, വൈദ്യുതി എന്നിവയുടെ ലഭ്യതക്കുറവ് നിലവിൽ പരിഹരിക്കപ്പെട്ടു വരികയാണെന്ന് അദ്ദേഹം പറഞ്ഞു. അടുത്ത ഒരു വർഷത്തിനുള്ളിൽ മെമ്മറി ചിപ്പ് ക്ഷാമവും, 2028-2029 ഓടെ വേഫർ ഉൽപ്പാദനവും വൈദ്യുതി ലഭ്യതയും സാധാരണ നിലയിലാകും. എന്നാൽ സാങ്കേതികവിദ്യ വികസിപ്പിക്കുന്നതിനുള്ള മൂലധനച്ചെലവ് വരും വർഷങ്ങളിലും വൻ കടമ്പയായി തുടരുമെന്ന് അദ്ദേഹം ചൂണ്ടിക്കാട്ടി.

വായ്പ ലഭ്യതയുടെ ചെലവ് വർധിക്കുന്ന സാഹചര്യത്തിൽ എഐ മേഖലയിലെ കോടിക്കണക്കിന് ഡോളറിന്റെ നിക്ഷേപങ്ങൾക്ക് ഉടൻ തന്നെ വരുമാനം ലഭിച്ചുതുടങ്ങണമെന്ന് ഇന്റൽ സി.ഇ.ഒ ലിപ്-ബു ടാനും വ്യക്തമാക്കി. നിർമിത ബുദ്ധി സാങ്കേതികവിദ്യ ഉപയോഗിച്ച് കമ്പനികൾക്ക് സാമ്പത്തിക നേട്ടമുണ്ടാക്കാൻ സാധിക്കുന്നില്ലെങ്കിൽ അടിസ്ഥാന സൗകര്യങ്ങൾക്കായുള്ള നിക്ഷേപം കുറയാൻ സാധ്യതയുണ്ടെന്ന് അദ്ദേഹം വിലയിരുത്തി.

അതേസമയം, വൻകിട എഐ കമ്പനികൾക്ക് ചിപ്പുകൾ വാങ്ങാൻ ധനസഹായം നൽകുന്ന ട്രെൻഡും മേഖലയിൽ ശക്തമാണ്. ഓപ്പൺഎഐക്ക് 50 ബില്യൺ ഡോളറിലധികം വായ്പാ ധനസഹായം നൽകുന്നതിനായി ബ്രോഡ്കോം ചർച്ചകൾ നടത്തിവരുന്നതായി റിപ്പോർട്ടുകളുണ്ട്. മറ്റൊരു പ്രമുഖ എഐ കമ്പനിയായ ആന്ത്രോപിക്കിന് 42 ബില്യൺ ഡോളറിന്റെ സാമ്പത്തിക സഹായം നൽകാനും ബ്രോഡ്കോം ലക്ഷ്യമിടുന്നുണ്ട്. എഐ മോഡലുകൾ വികസിപ്പിക്കുന്നതിനൊപ്പം അവയുടെ ദൈനംദിന പ്രവർത്തനച്ചെലവ് താങ്ങാനാവുക എന്നതും വരുംനാളുകളിൽ പ്രധാന്യമേറും.