ട്രംപിന്റെ ഊർജ്ജ വെടിനിർത്തൽ, അമേരിക്കയിലേക്ക് ടൺ കണക്കിന് റഷ്യൻ ഇന്ധനം, കടുത്ത പ്രതിഷേധവുമായി ഭരണപ്രതിപക്ഷ പാർട്ടികളിലെ പ്രമുഖ നേതാക്കൾ
Nazeema
സ്റ്റാഫ് റിപ്പോർട്ടർ
റഷ്യൻ ഇന്ധനം ഇറക്കുമതി ചെയ്യാനുള്ള ട്രംപിന്റെ പുതിയ തീരുമാനത്തിനെതിരെ അമേരിക്കയിലും യുക്രെയ്നിലും വ്യാപക പ്രതിഷേധം ഉയർന്നു. കോൺഗ്രസ് നിയമങ്ങൾ ലംഘിച്ചുള്ള ഈ നീക്കം റഷ്യൻ യുദ്ധയന്ത്രത്തിന് സാമ്പത്തിക സഹായം നൽകുന്നതിന് തുല്യമാണെന്ന് ഭരണ-പ്രതിപക്ഷ നേതാക്കൾ കുറ്റപ്പെടുത്തുന്നു.
ന്യൂയോർക്ക്: റഷ്യയിൽ നിന്ന് അമേരിക്കയിലേക്കും ആഗോള വിപണിയിലേക്കും ലക്ഷക്കണക്കിന് ടൺ ഡീസൽ ഇന്ധനം ഇറക്കുമതി ചെയ്യാൻ അനുമതി നൽകിക്കൊണ്ട് അമേരിക്കൻ പ്രസിഡന്റ് ഡൊണാൾഡ് ട്രംപ് ഉണ്ടാക്കിയ 'ഊർജ്ജ വെടിനിർത്തൽ' ധാരണയ്ക്കെതിരെ വ്യാപക പ്രതിഷേധം. അമേരിക്കൻ വിപണിയിലെ ഇന്ധനവില പിടിച്ചുനിർത്തുകയെന്ന ലക്ഷ്യത്തോടെയാണ് നീക്കമെങ്കിലും, ഡെമോക്രാറ്റിക് - റിപ്പബ്ലിക്കൻ പാർട്ടികളിലെ പ്രമുഖ നേതാക്കൾ ഇതിനെതിരെ പരസ്യമായി രംഗത്തുവന്നു. തീരുമാനം ഉടൻ പിൻവലിക്കണമെന്ന് റിപ്പബ്ലിക്കൻ പാർട്ടിയിലെ നിയമനിർമ്മാതാക്കൾപോലും ട്രംപിനോട് ആവശ്യപ്പെട്ടിട്ടുണ്ട്.
റഷ്യൻ അധിനിവേശത്തിന് പിന്നാലെ മോസ്കോയ്ക്ക് മേൽ അമേരിക്ക ഏർപ്പെടുത്തിയിട്ടുള്ള കടുത്ത സാമ്പത്തിക ഉപരോധങ്ങളുടെ വീര്യം കുറയ്ക്കുന്നതാണ് ട്രംപിന്റെ പുതിയ തീരുമാനമെന്ന് രാഷ്ട്രീയ നിരീക്ഷകർ വിലയിരുത്തുന്നു. 2022-ൽ റഷ്യൻ ഊർജ്ജ ഉൽപ്പന്നങ്ങളുടെ ഇറക്കുമതി കർശനമായി നിരോധിച്ചുകൊണ്ട് അമേരിക്കൻ കോൺഗ്രസ് നിയമം പാസാക്കിയിരുന്നു. ഈ നിയമത്തിന്റെ നഗ്നമായ ലംഘനമാണ് ഇപ്പോൾ ഉണ്ടായിരിക്കുന്നത്.
നിലവിൽ മൂന്ന് ലക്ഷം ടൺ ഡീസൽ ഇറക്കുമതി ചെയ്യാനാണ് ട്രംപ് ധാരണയുണ്ടാക്കിയിട്ടുള്ളത്. ഇതിനുപുറമെ, നവംബറിൽ അഞ്ച് ലക്ഷം ടണ്ണും തുടർന്ന് പത്ത് ലക്ഷം ടണ്ണും ഡീസൽ അമേരിക്കയിലേക്ക് എത്തിക്കാനാണ് നീക്കം. എന്നാൽ, കോൺഗ്രസുമായി യാതൊരു ആലോചനയും നടത്താതെയാണ് ഈ ഏകപക്ഷീയ തീരുമാനമെന്ന് സെനറ്റർ ഷഹീൻ ഉൾപ്പെടെയുള്ള പ്രമുഖർ കുറ്റപ്പെടുത്തി.
പുടിന് പിറന്നാൾ സമ്മാനമെന്ന് സെലൻസ്കി
തങ്ങളെയും തങ്ങളുടെ കുട്ടികളെയും കൊന്നൊടുക്കുന്ന റഷ്യൻ പ്രസിഡന്റ് വ്ലാദിമിർ പുടിന് പിറന്നാൾ സമ്മാനമൊരുക്കുന്ന തീരുമാനമാണിതെന്ന് യുക്രൈൻ പ്രസിഡന്റ് വ്ലാദിമിർ സെലൻസ്കി രൂക്ഷമായി പ്രതികരിച്ചു. ട്രംപ് ഊർജ്ജ വെടിനിർത്തൽ പ്രഖ്യാപിച്ചെങ്കിലും അത്തരമൊരു കരാറിനെക്കുറിച്ച് മുൻകൂട്ടി അറിവില്ലായിരുന്നുവെന്നും യുക്രൈൻ വ്യക്തമാക്കി. റഷ്യൻ ഡീസൽ വിപണിയിലെത്തിക്കുന്നത് യുദ്ധം നീണ്ടുപോകാൻ മാത്രമേ ഉപകരിക്കൂവെന്നാണ് യുക്രൈന്റെ നിലപാട്.
റഷ്യയ്ക്കെതിരെ കർശന നടപടികൾ തുടരേണ്ട നിർണായക ഘട്ടത്തിൽ ഇത്തരം ഒരു ഇന്ധനക്കരാർ ഉണ്ടാക്കുന്നത് പുടിന്റെ യുദ്ധയന്ത്രങ്ങൾക്ക് നേരിട്ട് സാമ്പത്തിക സഹായം നൽകുന്നതിന് തുല്യമാണെന്ന് സെനറ്റർ റിചാർഡ് ബ്ലൂമൻതാലും മറ്റ് പ്രമുഖ അംഗങ്ങളും ചൂണ്ടിക്കാണിക്കുന്നു.
നിയമപോരാട്ടത്തിനൊരുങ്ങി കോൺഗ്രസ്
ട്രംപിന്റെ ഏകപക്ഷീയമായ തീരുമാനത്തെ ചെറുത്തുതോൽപ്പിക്കാൻ ശക്തമായ നീക്കങ്ങളുമായി ഇരുപാർട്ടി അംഗങ്ങളും രംഗത്തുണ്ട്. ഇതിന്റെ ഭാഗമായി അന്തരിച്ച മുൻ അമേരിക്കൻ പ്രസിഡന്റ് റൊണാൾഡ് റീഗന്റെ പേരിൽ പുതിയൊരു ഉഭയകക്ഷി ബില്ല് കൊണ്ടുവരാൻ കോൺഗ്രസിലെ അംഗങ്ങൾ ആലോചിക്കുന്നുണ്ട്. അമേരിക്കൻ വിദേശനയത്തിലും അന്താരാഷ്ട്ര ബന്ധങ്ങളിലും വലിയ പ്രത്യാഘാതങ്ങൾ സൃഷ്ടിക്കുന്ന ഈ ഇന്ധനക്കരാർ വാഷിംഗ്ടണിൽ പുതിയൊരു ഭരണഘടനാ-നിയമ പോരാട്ടത്തിനാണ് വഴിവെച്ചിരിക്കുന്നത്.
