ഇറാനുമായുള്ള യുദ്ധത്തിൽ അമേരിക്കയ്ക്ക് കനത്ത നഷ്ടം; തകർന്നത് 81 സൈനിക വിമാനങ്ങൾ, നഷ്ടം 330 കോടി ഡോളർ

ഇറാനുമായുള്ള യുദ്ധത്തിൽ അമേരിക്കയ്ക്ക് കനത്ത തിരിച്ചടി. 81 സൈനിക വിമാനങ്ങൾ നഷ്ടപ്പെടുകയോ കേടുപാടുകൾ സംഭവിക്കുകയോ ചെയ്തതായി കോൺഗ്രഷണൽ റിസർച്ച് സർവീസിന്‍റെ (സിആർഎസ്) റിപ്പോർട്ട്. ഇതുവഴി ഏകദേശം 330 കോടി ഡോളറിന്‍റെ (ഏകദേശം 31,936 കോടി രൂപ) സാമ്പത്തിക നഷ്ടമാണ് യു.എസ് സൈന്യത്തിന് ഉണ്ടായത്.

അമേരിക്കയുടെ ഏറ്റവും അത്യാധുനിക യുദ്ധവിമാനങ്ങളായ എഫ്-35 എ ലൈറ്റ്‌നിംഗ് II സ്റ്റെൽത്ത് ഫൈറ്റർ, എഫ്-15 ജെറ്റുകൾ, എംക്യു-9 റീപ്പർ ഡ്രോണുകൾ എന്നിവ ഉൾപ്പെടെയുള്ളവയ്ക്കാണ് കേടുപാടുകൾ സംഭവിച്ചത്.

റിപ്പോർട്ടിലെ പ്രധാന വിവരങ്ങൾ:

• പ്രധാന വിമാനങ്ങളുടെ വില: ഒമ്പത് കോടി ഡോളർ വിലമതിപ്പുള്ള എഫ്-35 എ, മൂന്ന് കോടിയിലേറെ ഡോളർ വിലയുള്ള എഫ്-15 ജെറ്റുകൾ, മൂന്ന് മുതൽ അഞ്ച് കോടി ഡോളർ വരെ വിലയുള്ള എംക്യു-9 റീപ്പർ ഡ്രോണുകൾ എന്നിവ തകർന്നവയിൽ ഉൾപ്പെടുന്നു.

• നഷ്ടപ്പെട്ട വിമാനങ്ങൾ: 12 എഫ്-15 ഇ, ഒരു എഫ്-35 എ, രണ്ട് എ-10 തണ്ടർബോൾട്ട് II, ഏഴ് കെസി-135 സ്ട്രാറ്റോടാങ്കർ വ്യോമ ഇന്ധനം നിറയ്ക്കൽ വിമാനങ്ങൾ എന്നിവ മിഡിൽ ഈസ്റ്റിലെ ദൗത്യങ്ങൾക്കിടെ അമേരിക്കയ്ക്ക് നഷ്ടമായി.

• ഫ്രണ്ട്‌ലി ഫയർ: മാർച്ച് രണ്ടിന് കുവൈറ്റിന് മുകളിൽ വെച്ച് സഖ്യസേനയുടെ അബദ്ധത്തിലുള്ള വെടിയേറ്റ് മൂന്ന് എഫ്-15 ജെറ്റുകളും, പിന്നീട് ഇറാനിൽ വെച്ച് മറ്റൊരു വിമാനവും തകർന്നു.

• ബേസുകൾക്ക് നേരെയുള്ള ആക്രമണം: സെപ്റ്റംബർ 9, 10 തീയതികളിൽ ജോർദാനിലെ എയർബേസിന് നേരെ ഇറാൻ നടത്തിയ വ്യോമാക്രമണത്തിൽ എട്ട് എഫ്-15 ഇ വിമാനങ്ങൾക്ക് കേടുപാടുകൾ പറ്റി.

• മറ്റു നഷ്ടങ്ങൾ: ഒരു ഇ-3 സെൻട്രി എയർബോൺ ഏർലി വാർണിംഗ് വിമാനം, രണ്ട് എംസി-130 ജെ കമാൻഡോ II, ഒരു എച്ച്എച്ച്-60 ഡബ്ല്യു ഹെലികോപ്റ്റർ, ഒരു എംക്യു-4 സി ട്രൈറ്റൺ, മൂന്ന് എംക്യു-1 ഡ്രോണുകൾ, 45 എംക്യു-9 റീപ്പർ ഡ്രോണുകൾ, ഒരു അപ്പാച്ചെ, നാല് എഎച്ച്-6 ലിറ്റിൽ ബേർഡ്, ഒരു എംഎച്ച്-60 സീ ഹോക്ക് എന്നിവയും യു.എസിന് നഷ്ടമായി.

സൈനിക നടപടികൾ തുടരുന്നതിനാലും പല വിവരങ്ങളും രഹസ്യമായി സൂക്ഷിക്കുന്നതിനാലും ഈ കണക്കുകളിൽ മാറ്റം വരാമെന്നും കേടുപാടുകൾ സംഭവിച്ച ചില വിമാനങ്ങൾ അറ്റകുറ്റപ്പണികൾക്ക് ശേഷം തിരികെയെത്തിയേക്കാമെന്നും സിആർഎസ് റിപ്പോർട്ടിൽ വ്യക്തമാക്കുന്നു.