വിമാനത്തിൽ മൂട്ട ശല്യം; ഓസ്ട്രേലിയയിൽ നിന്നുള്ള ക്വാണ്ടാസ് സർവീസ് റദ്ദാക്കി

ഓസ്ട്രേലിയയിൽ നിന്ന് ഇറ്റലിയിലേക്ക് സർവീസ് നടത്തിയ ക്വാണ്ടാസ് വിമാനത്തിൽ മൂട്ട ശല്യം രൂക്ഷമായതിനെ തുടർന്ന് മടക്കയാത്ര റദ്ദാക്കി. റോമിൽ എത്തിയ ബോയിംഗ് 787 ഡ്രീംലൈനർ വിമാനമാണ് അടിയന്തര ശുചീകരണത്തിനായി സർവീസ് അവസാനിപ്പിച്ചത്.

വെള്ളിയാഴ്ച ഓസ്ട്രേലിയയിൽ നിന്ന് പുറപ്പെട്ട 17 മണിക്കൂർ ദീർഘദൂര സർവീസിലെ ഇക്കോണമി ക്ലാസ് യാത്രക്കാരാണ് പരാതിയുമായി രംഗത്തെത്തിയത്. യാത്രയ്ക്കിടെ മൂട്ടകളുടെ കടിയേറ്റ് യാത്രക്കാർക്ക് കടുത്ത ചൊറിച്ചിൽ അനുഭവപ്പെടുകയായിരുന്നു. ജീവനക്കാർ പ്രഥമശുശ്രൂഷയും മരുന്നുകളും നൽകിയെങ്കിലും നീണ്ട യാത്രാവേളയിൽ ഇവ തീർന്നുപോയത് പ്രതിസന്ധി രൂക്ഷമാക്കി.

റോമിൽ വിമാനമിറങ്ങിയ ഉടൻ എൻജിനീയർമാരും മെയിന്റനൻസ് ടീമും ചേർന്ന് വിമാനം സമഗ്രമായ പരിശോധനയ്ക്കും അണുനശീകരണത്തിനും വിധേയമാക്കി. ഇതിന്റെ ഭാഗമായി ശനിയാഴ്ച റോമിൽ നിന്ന് പെർത്തിലേക്ക് നടത്തേണ്ടിയിരുന്ന മടക്കയാത്ര എയർലൈൻ അധികൃതർ റദ്ദാക്കുകയായിരുന്നു.

ബാധിക്കപ്പെട്ട എല്ലാ യാത്രക്കാർക്കും ആവശ്യമായ താമസ സൗകര്യം ഒരുക്കിയിട്ടുണ്ടെന്നും, 48 മണിക്കൂറിനുള്ളിൽ മറ്റ് വിമാനങ്ങളിൽ യാത്രാ സൗകര്യം ഏർപ്പെടുത്തിയതായും ക്വാണ്ടാസ് വക്താവ് അറിയിച്ചു. ഗതാഗത മേഖലയിൽ മൂട്ടകൾ പ്രതിസന്ധി സൃഷ്ടിക്കുന്നത് ഇത് ആദ്യമല്ല. അടുത്തിടെ ഇംഗ്ലണ്ടിലെ ചില ട്രെയിൻ സർവീസുകളും സമാനമായ കാരണത്താൽ റദ്ദാക്കേണ്ടി വന്നിരുന്നു. ബ്രിട്ടീഷ് എയർവേയ്‌സ്, ടർക്കിഷ് എയർലൈൻസ് തുടങ്ങിയ പ്രമുഖ വിമാന കമ്പനികളുടെ സർവീസുകളിലും മുൻകാലങ്ങളിൽ സമാനമായ സംഭവങ്ങൾ റിപ്പോർട്ട് ചെയ്യപ്പെട്ടിട്ടുണ്ട്.