വരുമാനത്തിൽ 42 ശതമാനം ഇടിവ്, ഏത് മോശം സാഹചര്യത്തെയും നേരിടാൻ ഒരുങ്ങണമെന്ന് ഖത്തർ അമീറിന്‍റെ ആഹ്വാനം; 'വികസന പദ്ധതികൾ മുടങ്ങില്ല'

ഖത്തർ സിറ്റി: പശ്ചിമേഷ്യൻ യുദ്ധവും മേഖലയിലെ സംഘർഷങ്ങളും കാരണം ഈ വർഷത്തെ ആദ്യ പകുതിയിൽ രാജ്യത്തിന്റെ വരുമാനത്തിൽ 42 ശതമാനത്തിന്റെ ഇടിവുണ്ടായതായി ഖത്തർ അമീർ ശൈഖ് തമീം ബിൻ ഹമദ് ആൽഥാനി. ഏത് പ്രതികൂല സാഹചര്യത്തെയും നേരിടാൻ രാജ്യവും ജനങ്ങളും ഒരുങ്ങിയിരിക്കണമെന്ന് ഷൂറ കൗൺസിൽ സമ്മേളനത്തെ അഭിസംബോധന ചെയ്യവെ അമീർ ആഹ്വാനം ചെയ്തു. അതേസമയം, രാജ്യത്തിന്റെ വികസന പദ്ധതികൾ തടസ്സമില്ലാതെ മുന്നോട്ടുപോകുമെന്നും അദ്ദേഹം ഉറപ്പുനൽകി.

മേഖലയിലെ അസാധാരണ സാഹചര്യങ്ങൾ ലോക സമ്പദ്‌വ്യവസ്ഥയെയും ഖത്തറിനെയും ഒരുപോലെ ബാധിച്ചതായി അമീർ വ്യക്തമാക്കി. വരുമാനത്തിലുണ്ടായ ഇടിവിനെ തുടർന്ന് സർക്കാർ ചെലവുകളിൽ 14 ശതമാനം കുറവുവരുത്തിയിട്ടുണ്ട്. യുദ്ധത്തിനുമുമ്പുള്ള സാമ്പത്തിക സ്ഥിതിയിലേക്ക് വേഗത്തിൽ തിരിച്ചെത്താനുള്ള ശ്രമങ്ങൾ പുരോഗമിക്കുകയാണ്.

ലോകത്തിനാവശ്യമായ പ്രകൃതിവാതകത്തിന്റെ അഞ്ചിലൊന്നും വിതരണം ചെയ്യുന്നത് ഖത്തറാണ്. അതിനാൽ മേഖലയിലുണ്ടാകുന്ന ഏതൊരു തടസ്സവും ആഗോള ഊർജവിപണിയെ പ്രതികൂലമായി ബാധിക്കും. പ്രതിസന്ധികൾക്കിടയിലും പരമാധികാരവും ജനങ്ങളുടെ സുരക്ഷയും ഊർജ ഭദ്രതയും ഉറപ്പാക്കാൻ ഖത്തറിന് സാധിച്ചു. നയതന്ത്ര ചർച്ചകളിലൂടെ സമാധാനം പുനഃസ്ഥാപിക്കാനാണ് രാജ്യം എന്നും ശ്രമിച്ചിട്ടുള്ളത്. മാതൃകാപരമായ സേവനം കാഴ്ചവെച്ച സായുധ സേനയെയും വിവിധ സർക്കാർ സ്ഥാപനങ്ങളെയും അമീർ അഭിനന്ദിച്ചു.

വികസന പദ്ധതികൾ തുടരും

പ്രതിസന്ധികൾ നിലനിൽക്കുമ്പോഴും രാജ്യത്തിന്റെ സമ്പദ്‌വ്യവസ്ഥ 2.9 ശതമാനം വളർച്ച കൈവരിച്ചതായി അമീർ ചൂണ്ടിക്കാട്ടി. മുൻഗണനാ വികസന പദ്ധതികളിൽ മാറ്റമുണ്ടാകില്ല.

• നോർത്ത് ഫീൽഡ് വാതക വികസന പദ്ധതിയുമായി മുന്നോട്ടുപോകും.

• യു.എസുമായി ചേർന്നുള്ള ഗോൾഡൻ പാസ് ഊർജ പദ്ധതി ദ്രുതഗതിയിൽ പൂർത്തിയാക്കും.

• അടുത്ത അഞ്ച് വർഷത്തിനകം 2,210 കോടി ഖത്തർ റിയാലിന്റെ പുതിയ പദ്ധതികൾ നടപ്പിലാക്കും.

ഏതു സാഹചര്യത്തെയും അതിജീവിക്കാൻ വ്യക്തികളും സ്ഥാപനങ്ങളും തങ്ങളുടെ ഉത്തരവാദിത്തങ്ങൾ കൃത്യമായി നിർവഹിക്കണമെന്നും അമീർ കൂട്ടിച്ചേർത്തു.