സൗദിക്കെതിരായ ഹൂതി ആക്രമണങ്ങളെ ശക്തമായി അപലപിച്ച് യുഎഇ; പൂർണ പിന്തുണ പ്രഖ്യാപിച്ച് രാജ്യം

അബുദാബി: സൗദി അറേബ്യയിലെ സിവിലിയൻ പ്രദേശങ്ങൾക്കും സാമ്പത്തിക കേന്ദ്രങ്ങൾക്കും നേരെ ഹൂതി വിഭാഗം തുടർച്ചയായി നടത്തുന്ന ആക്രമണങ്ങളെ ശക്തമായി അപലപിച്ച് യുഎഇ. തെക്കൻ ചെങ്കടലിലും ബാബ് അൽ മന്ദബ് കടലിടുക്കിലും സൗദി കപ്പലുകൾ ലക്ഷ്യമിട്ടുണ്ടായ ആക്രമണങ്ങളെയും യുഎഇ വിദേശകാര്യ മന്ത്രാലയം രൂക്ഷമായി വിമർശിച്ചു.

ആക്രമണങ്ങൾ സൗദി അറേബ്യയുടെ പരമാധികാരത്തിന്മേലുള്ള നഗ്നമായ ലംഘനമാണെന്ന് ബുധനാഴ്ച പുറത്തിറക്കിയ പ്രസ്താവനയിൽ യുഎഇ വ്യക്തമാക്കി. മേഖലയുടെ സുരക്ഷക്കും സ്ഥിരതക്കും ഇത് വലിയ ഭീഷണിയാണ് സൃഷ്ടിക്കുന്നത്. സൗദിയുടെ സുരക്ഷയും സമാധാനവും സംരക്ഷിക്കുന്നതിനായുള്ള എല്ലാ നടപടികൾക്കും യുഎഇയുടെ പൂർണ പിന്തുണയും ഐക്യദാർഢ്യവും മന്ത്രാലയം ഉറപ്പുനൽകി.

അതേസമയം, സൗദി തലസ്ഥാനമായ റിയാദിന് വടക്കൻ മേഖല ലക്ഷ്യമാക്കി ഹൂതികൾ വിക്ഷേപിച്ച ബാലിസ്റ്റിക് മിസൈൽ സൗദി സഖ്യസേന വിജയകരമായി തകർത്തു. ഭീകര സംഘടനയായ ഹൂതി മിലിഷ്യ തൊടുത്ത മിസൈൽ തടഞ്ഞുനശിപ്പിച്ചതായി സഖ്യസേനാ വക്താവ് മേജർ ജനറൽ തുർക്കി അൽ മാതികി 'എക്സി'ലൂടെ അറിയിച്ചു. സിവിലിയൻ കേന്ദ്രങ്ങളെ ലക്ഷ്യമിട്ടുള്ള നീക്കങ്ങൾക്കെതിരെ ശക്തമായ പ്രതിരോധം തുടരുമെന്ന് സഖ്യസേന വ്യക്തമാക്കി.

കഴിഞ്ഞദിവസങ്ങളിൽ അസീർ മേഖലയിലെ അഹദ് റുഫൈദ, നജ്റാൻ, ഖമീസ് മുശൈത്ത് എന്നിവിടങ്ങളിലും ഹൂതി ആക്രമണ ശ്രമങ്ങൾ നടന്നിരുന്നു. അഹദ് റുഫൈദയിലേക്ക് തൊടുത്തുവിട്ട മിസൈൽ സൗദി വ്യോമസേന തടഞ്ഞെങ്കിലും, ഇതിന്റെ അവശിഷ്ടങ്ങൾ പതിച്ച് പ്രവാസി ഏഷ്യൻ തൊഴിലാളിക്ക് പരിക്കേറ്റു. സമീപത്തെ കെട്ടിടത്തിലെ പ്രാർഥനാ ഹാളിനും വാഹനങ്ങൾക്കും നാശനഷ്ടം സംഭവിച്ചതായി സിവിൽ ഡിഫൻസ് അറിയിച്ചു.