സ്മൃതി മന്ദാനയും ഹര്‍മന്‍പ്രീത് കൗറും തമ്മില്‍ അഭിപ്രായവ്യത്യാസം; താരങ്ങള്‍ തമ്മില്‍ പരസ്പര ഐക്യമില്ലെന്ന് റിപ്പോര്‍ട്ട്

മുംബൈ: ഇന്ത്യൻ വനിതാ ക്രിക്കറ്റ് ടീമിന്റെ പുതിയ നായികയായി സ്മൃതി മന്ദാനയെ നിയമിച്ചതിന് പിന്നാലെ, മുൻ ക്യാപ്റ്റൻ ഹർമൻപ്രീത് കൗറുമായി താരത്തിന് അഭിപ്രായവ്യത്യാസങ്ങളുള്ളതായി റിപ്പോർട്ടുകൾ. ഇരുവരും തമ്മിലുള്ള ആശയവിനിമയക്കുറവ് ടീമിന്റെ ഡ്രസ്സിങ് റൂമിൽ ചേരിതിരിവുകൾക്ക് കാരണമായെന്നാണ് പുറത്തുവരുന്ന വിവരം.

ബി.സി.സി.ഐയുമായുള്ള അവലോകന യോഗത്തിന് ശേഷമാണ് എല്ലാ ഫോർമാറ്റുകളിലെയും ക്യാപ്റ്റൻസി സ്ഥാനത്തുനിന്ന് 37കാരിയായ ഹർമൻപ്രീത് ഒഴിഞ്ഞത്. ജപ്പാനിൽ നടന്ന ഏഷ്യൻ ഗെയിംസിൽ ഇന്ത്യയെ സ്വർണമെഡലിലേക്ക് നയിച്ച ശേഷമായിരുന്നു പടിയിറക്കം. 2013ൽ അന്താരാഷ്ട്ര അരങ്ങേറ്റം കുറിച്ച സ്മൃതി മന്ദാന, മൂന്ന് ഫോർമാറ്റുകളിലുമായി പതിനായിരത്തിലധികം റൺസ് നേടി നിലവിൽ ലോകത്തെ മികച്ച ബാറ്റർമാരിലൊരാളാണ്.

കഴിഞ്ഞ വർഷം നാട്ടിൽ നടന്ന ഏകദിന ലോകകപ്പ് ജയത്തിന് ശേഷവും ക്യാപ്റ്റൻസി മാറ്റുന്നതിൽ സെലക്ടർമാർ മടി കാണിച്ചിരുന്നുവെങ്കിലും, ഒടുവിൽ ഗുവാഹത്തിയിൽ നടന്ന യോഗത്തിൽ മാറ്റങ്ങൾ അനിവാര്യമാണെന്ന് വ്യക്തമാക്കുകയായിരുന്നു. ക്യാപ്റ്റൻ സ്ഥാനം ഏറ്റെടുക്കാൻ ഏറ്റവും അർഹയായ താരം സ്മൃതിയാണെന്ന് മുൻ നായിക മിതാലി രാജ് അടക്കമുള്ളവർ വ്യക്തമാക്കുകയും ചെയ്തിരുന്നു.

എന്നാൽ, സമീപകാലത്ത് ഹർമൻപ്രീതും മന്ദാനയും തമ്മിൽ അത്ര രസത്തിലല്ലെന്ന വിവരങ്ങളാണ് പുറത്തുവരുന്നത്. മുൻപ് മിതാലി രാജിൽനിന്ന് ഹർമൻപ്രീത് ക്യാപ്റ്റൻസി ഏറ്റെടുത്തപ്പോഴും സമാനമായ അഭിപ്രായവ്യത്യാസങ്ങൾ ഉടലെടുത്തിരുന്നു. അടുത്ത രണ്ടോ മൂന്നോ വർഷം ഒരു സാധാരണ കളിക്കാരിയായി ടീമിൽ തുടരാനാണ് ഹർമൻപ്രീതിന്റെ തീരുമാനം. ഈ സാഹചര്യത്തിൽ പഴയ ഭിന്നതകൾ മറന്ന് ടീമിന്റെ വിജയത്തിനായി ഇരുവരും ഒരുമിച്ച് പ്രവർത്തിക്കുമോ എന്നാണ് ആരാധകർ ഉറ്റുനോക്കുന്നത്.

ഏഷ്യൻ ഗെയിംസിലെയും ഏഷ്യാ കപ്പിലെയും ആധിപത്യത്തിന് ശേഷം, സ്മൃതിയുടെ നേതൃത്വത്തിൽ വലിയ ഐ.സി.സി കിരീടങ്ങൾ ലക്ഷ്യമിട്ടാണ് ഇന്ത്യൻ ടീം മുന്നേറുന്നത്. അതേസമയം, ഒരു സാധാരണ താരമായി ടീമിൽ തുടരുമ്പോൾ ഫോം വീണ്ടെടുക്കുക എന്നത് ഹർമൻപ്രീതിന് നിർണായകമാകും.