സി കെ നായിഡു ട്രോഫി: പോണ്ടിച്ചേരിക്കെതിരെ പിടിമുറുക്കി കേരളം; ലക്ഷ്യം കൂറ്റൻ ഒന്നാം ഇന്നിംഗ്സ് ലീഡ്

കല്‍പറ്റ: ഇരുപത്തിമൂന്ന് വയസ്സിന് താഴെയുള്ളവര്‍ക്കായുള്ള സി.കെ. നായിഡു ട്രോഫി ക്രിക്കറ്റ് ടൂര്‍ണമെന്റില്‍ പോണ്ടിച്ചേരിക്കെതിരെ കേരളത്തിന് ശക്തമായ മുന്‍തൂക്കം. രണ്ടാം ദിനം കളി അവസാനിക്കുമ്പോള്‍ അഞ്ച് വിക്കറ്റ് നഷ്ടത്തില്‍ 240 റണ്‍സെന്ന നിലയിലാണ് പോണ്ടിച്ചേരി. ഒന്നാം ഇന്നിങ്സില്‍ കേരളം 515 റണ്‍സിന്റെ ഭീമന്‍ സ്‌കോര്‍ പടുത്തുയര്‍ത്തിയിരുന്നു.

അഞ്ച് വിക്കറ്റിന് 373 റണ്‍സ് എന്ന നിലയില്‍ രണ്ടാം ദിനം ബാറ്റിങ് പുനരാരംഭിച്ച കേരളം മുഹമ്മദ് ഇനാന്‍, ജിഷ്ണു മണികണ്ഠന്‍, ആദിത്യ ബൈജു എന്നിവരുടെ തകര്‍പ്പന്‍ പ്രകടനത്തിന്റെ കരുത്തിലാണ് അഞ്ഞൂറ് കടന്നത്. ആറാം വിക്കറ്റില്‍ ഒത്തുചേര്‍ന്ന ജിഷ്ണുവും മുഹമ്മദ് ഇനാനും ചേര്‍ന്ന് വിലപ്പെട്ട 89 റണ്‍സ് കൂട്ടിച്ചേര്‍ത്തു. 70 റണ്‍സെടുത്ത മുഹമ്മദ് ഇനാനെ രാഹുല്‍ രാജീവ് യാദവ് ക്ലീന്‍ ബൗള്‍ഡ് ചെയ്യുകയായിരുന്നു. ജിഷ്ണു 55 റണ്‍സും ആദിത്യ ബൈജു 47 റണ്‍സും നേടി പുറത്തായി. വിജയ് വിശ്വനാഥ് 23 റണ്‍സ് സംഭാവന ചെയ്തു. പോണ്ടിച്ചേരിക്കായി രാഹുല്‍ രാജീവ് യാദവ് മൂന്ന് വിക്കറ്റും ആകാഷ് പുകഴേന്തി രണ്ട് വിക്കറ്റും വീഴ്ത്തി.

മറുപടി ബാറ്റിങ്ങിനിറങ്ങിയ പോണ്ടിച്ചേരിയുടെ തുടക്കം തകര്‍ച്ചയോടെയായിരുന്നു. രണ്ട് വിക്കറ്റിന് 13 റണ്‍സ് എന്ന നിലയില്‍ പതറിയ അവരെ പ്രവീണ്‍ രാജരത്നവും അനീഷ് വിശാഗനും ചേര്‍ന്നുള്ള കൂട്ടുകെട്ടാണ് വലിയൊരു തകര്‍ച്ചയില്‍ നിന്ന് രക്ഷിച്ചത്. പ്രവീണ്‍ 74 റണ്‍സും അനീഷ് 30 റണ്‍സും എടുത്തു. രണ്ട് പേരെയും കൈലാസ് ബി. നായരാണ് പുറത്താക്കിയത്. തുടര്‍ന്നെത്തിയ ആകാഷ് പുകഴേന്തി 32 പന്തുകളില്‍ നിന്ന് വെടിക്കെട്ട് രീതിയില്‍ 45 റണ്‍സ് വാരിക്കൂട്ടി.

രണ്ടാം ദിനം കളി നിര്‍ത്തുമ്പോള്‍ 55 റണ്‍സോടെ ക്യാപ്റ്റന്‍ നിതില്‍ പ്രണവും 29 റണ്‍സോടെ വിക്രം കുമാറുമാണ് ക്രീസില്‍ തുടരുന്നത്. കേരളത്തിനായി കൈലാസ് ബി. നായര്‍ രണ്ട് വിക്കറ്റും ആദിത്യ ബൈജു, ജിഷ്ണു മണികണ്ഠന്‍, അഹ്മദ് ഇമ്രാന്‍ എന്നിവര്‍ ഓരോ വിക്കറ്റ് വീതവും വീഴ്ത്തി.