കുട്ടിയെ വളഞ്ഞ് തെരുവുനായ്ക്കള്‍; ഒമ്പതാം മാസം ഗര്‍ഭിണിയായിട്ടും മകന്റെ നിലവിളി കേട്ട് ഓടിയെത്തി അമ്മ

മലപ്പുറം: വീടിന് സമീപം കളിച്ചുകൊണ്ടിരുന്ന കുട്ടിയെ തെരുവുനായ്ക്കള്‍ വളഞ്ഞ സംഭവത്തില്‍ ഒമ്പതുമാസം ഗര്‍ഭിണിയായ അമ്മയുടെ സമയോചിത ഇടപെടല്‍ വന്‍ദുരന്തം ഒഴിവാക്കി. കുന്നുംപുറം എ.ആര്‍. നഗര്‍ യാറത്തുംപടിയിലാണ് നാടിനെ ഞെട്ടിച്ച സംഭവം നടന്നത്.

വീടിനുമുന്നില്‍ കളിച്ചുകൊണ്ടിരിക്കുകയായിരുന്ന കുട്ടിയുടെ പിന്നാലെ ഒന്നിലധികം തെരുവുനായ്ക്കള്‍ കൂട്ടത്തോടെ ഓടിയെത്തുകയായിരുന്നു. നായ്ക്കളുടെ ആക്രമണത്തില്‍നിന്ന് കുട്ടി ഉറക്കെ നിലവിളിച്ചതോടെ, ജീവന്‍ പോലും വകവെയ്ക്കാതെ ഒമ്പതുമാസം ഗര്‍ഭിണിയായ അമ്മ ഓടിയെത്തി കുട്ടിയെ രക്ഷപ്പെടുത്തുകയായിരുന്നു. സമയോചിതമായ ഈ ഇടപെടല്‍ മൂലം വലിയ പരുക്കുകളൊന്നുമില്ലാതെ കുട്ടി അത്ഭുതകരമായി രക്ഷപ്പെട്ടു.

എന്നാല്‍, ഈ സംഭവം പ്രദേശത്ത് തെരുവുനായ്ക്കളുടെ രൂക്ഷമായ ഭീഷണിയാണ് വീണ്ടും പുറത്തുകൊണ്ടുവന്നിരിക്കുന്നത്. പ്രദേശത്ത് തെരുവുനായ്ക്കളുടെ ശല്യം അനിയന്ത്രിതമായി വര്‍ധിച്ചതായി നാട്ടുകാര്‍ പറയുന്നു. പകല്‍സമയത്തുപോലും കൂട്ടമായെത്തുന്ന നായ്ക്കള്‍ കുട്ടികളെയും വയോധികരെയും കാല്‍നടയാത്രക്കാരെയും പിന്തുടര്‍ന്ന് ആക്രമിക്കുന്നത് നിത്യസംഭവമായി മാറിയിരിക്കുകയാണ്.

വീടുകള്‍ക്ക് സമീപവും റോഡരികിലും നായ്ക്കള്‍ കൂട്ടമായി തമ്പടിക്കുന്നത് പ്രദേശവാസികളില്‍ വലിയ ആശങ്കയാണ് ഉണ്ടാക്കുന്നത്. കുട്ടികള്‍ക്ക് ഒറ്റയ്ക്ക് പുറത്തിറങ്ങാന്‍പോലും കഴിയാത്ത സാഹചര്യമാണെന്നും സ്‌കൂളിലേക്കും മദ്രസയിലേക്കും പോകുന്ന കുട്ടികളുടെ സുരക്ഷയെ ഓര്‍ത്ത് രക്ഷിതാക്കള്‍ ഭയപ്പാടിലാണെന്നും നാട്ടുകാര്‍ പറയുന്നു.

തെരുവുനായ ശല്യത്തിനെതിരെ പലതവണ അധികൃതരുടെ ശ്രദ്ധയില്‍പ്പെടുത്തിയിട്ടും ശാശ്വതമായ പരിഹാരങ്ങളൊന്നും ഉണ്ടായിട്ടില്ലെന്നാണ് പ്രധാന പരാതി. അക്രമകാരികളായ നായ്ക്കളെ കണ്ടെത്തി എത്രയും പെട്ടെന്ന് നിയന്ത്രിക്കണമെന്നും പ്രദേശത്തെ ജനങ്ങളുടെ സുരക്ഷ ഉറപ്പാക്കാന്‍ തദ്ദേശസ്ഥാപനങ്ങളും ബന്ധപ്പെട്ട അധികാരികളും അടിയന്തര നടപടി സ്വീകരിക്കണമെന്നുമാണ് നാട്ടുകാരുടെ ശക്തമായ ആവശ്യം.