അടുത്തയാഴ്ച വരും അമ്മേ എന്ന് വിളിച്ച് പറഞ്ഞതല്ലേ, ആ ദുഷ്ടന്‍ ഒന്ന് ശ്രദ്ധിച്ചിരുന്നെങ്കില്‍; വിങ്ങിപ്പൊട്ടി ഗോപികയുടെ അമ്മ

പാലക്കാട്: നെടുമ്പാശേരിയില്‍ മൂന്ന് പേരുടെ മരണത്തിനിടയാക്കിയ വാഹനാപകടത്തില്‍, കേസ് അട്ടിമറിക്കാന്‍ ശ്രമമെന്ന ആരോപണവുമായി മരിച്ച ഗോപികയുടെ കുടുംബവും രംഗത്ത്. പ്രതി സുഹൈലിനെ രക്ഷപ്പെടുത്താന്‍ ശ്രമം നടക്കുന്നെന്നും കുടുംബത്തിന് നേരെ സമൂഹമാധ്യമങ്ങളില്‍ അധിക്ഷേപ പ്രചാരണം നടക്കുന്നെന്നും കുടുംബം വൈകാരികമായി പ്രതികരിച്ചു.

കണ്ണടച്ചാല്‍ എന്റെ കൊച്ചിന്റെ മുഖമാണ് കാണുന്നത്. എന്റെ മോളാണ് പോയത് വിഷമമില്ലാഞ്ഞിട്ടല്ല ഞാന്‍ സംസാരിക്കുന്നത്. എന്റെ പൊന്ന് മോളാണ്. അവള്‍ എവിടെ പോകുന്നെങ്കിലും അച്ഛനോട് വിളിച്ചു പറയും. എന്ത് സ്‌നേഹമായിരുന്നു ഞങ്ങളോട്. അവള്‍ അവളുടെ ഇഷ്ടത്തിന് ഒന്നും ചെയ്തിട്ടില്ല. ഒരു ഡ്രസ് വാങ്ങിയിട്ടില്ലെന്റെ കുഞ്ഞ്. അവള് കഷ്ടപ്പെട്ട് പഠിച്ചതാ. ആ ദുഷ്ടന്‍ ഒന്ന് കണ്ണ് തുറന്നിരുന്നെങ്കില്‍ എന്റെ കുഞ്ഞിന് ഇങ്ങനെ വരുമായിരുന്നോ. എന്റെ പൊന്നിന്റെ മുഖം ഒന്നും കാണാന്‍ പോലും വയ്യ. അടുത്തയാഴ്ച വരും അമ്മ എന്ന് വിളിച്ച് പറഞ്ഞതല്ലേ. അവള് വരുമ്പോള്‍ എന്ത് സന്തോഷമാണെന്ന് അറിയുമോ ഞങ്ങള്‍ക്ക്. മോളില്ലാത്ത ഈ ലോകത്ത് ഇനി ഞങ്ങളുടെ ജീവിതം എന്താ. ആ ദുഷ്ടന്‍ ഒന്ന് ശ്രദ്ധിച്ചിരുന്നെങ്കില്‍ – ഗോപികയുടെ അമ്മ കരഞ്ഞുകൊണ്ട് പറഞ്ഞു.