ആസൂത്രണ ബോർഡ് പരീക്ഷ ക്രമക്കേട്; പുനർമൂല്യ നിർണയത്തിൽ ഒന്നാമതെത്തിയ ശ്യാം കൃഷ്ണന് നിയമനം നൽകാൻ പിഎസ്‍സി, ഇടത് സംഘടന നേതാവിന്റെ നിയമനം റദാക്കും

തിരുവനന്തപുരം: ഏറെ വിവാദമായ ആസൂത്രണ ബോർഡ് പരീക്ഷാ ക്രമക്കേടിൽ വഴിമാറ്റം. പുനർമൂല്യനിർണയത്തിൽ ഒന്നാം റാങ്ക് നേടിയ ശ്യാം കൃഷ്ണന് നിയമനം നൽകാൻ കേരള പബ്ലിക് സർവീസ് കമ്മീഷൻ (പി.എസ്‍.സി) തീരുമാനിച്ചു. ഇതുസംബന്ധിച്ച വിവരം പി.എസ്‍.സി ഹൈക്കോടതിയെ അറിയിക്കും. ഇതോടെ, നേരത്തെ ഒന്നാം റാങ്ക് നേടി ജോലിയിൽ പ്രവേശിച്ച ഇടത് സംഘടനാനേതാവ് അരുൺ ജെ. പ്രതാപിന്റെ നിയമന ശുപാർശ റദ്ദാക്കപ്പെടും.

ആസൂത്രണ ബോർഡിലെ ചീഫ് ഇൻഡസ്ട്രി ആൻഡ് ഇൻഫ്രാസ്ട്രക്ചർ പ്ലാൻ കോർഡിനേഷൻ ഡിവിഷൻ തസ്തികയിലേക്കുള്ള പൊതുപരീക്ഷയിലാണ് ഗുരുതര ക്രമക്കേടുകൾ കണ്ടെത്തിയത്. പത്ത് ഉത്തരക്കടലാസുകൾ മൂല്യനിർണയം നടത്താതെയാണ് പി.എസ്‍.സി റാങ്ക് പട്ടിക തയ്യാറാക്കിയത്. ഈ വീഴ്ചയിലൂടെ ഇടത് സംഘടനാ പ്രവർത്തകനായ അരുൺ ജെ. പ്രതാപിന് ഒന്നാം റാങ്കും ഒന്നേകാൽ ലക്ഷത്തിലധികം രൂപ ശമ്പളമുള്ള തസ്തികയിൽ അതിവേഗ നിയമനവും ലഭിക്കുകയായിരുന്നു.

പഴയ പട്ടികയിൽ മൂന്നാം റാങ്കുകാരനായിരുന്ന ശ്യാം കൃഷ്ണൻ നടത്തിയ നിയമപോരാട്ടത്തിലൂടെയാണ് ക്രമക്കേടുകൾ പുറത്തുവന്നത്. മാധ്യമങ്ങളിലൂടെ വാർത്ത പുറത്തുവന്നതിനെ തുടർന്ന് കടുത്ത സമ്മർദ്ദത്തിലായ പി.എസ്‍.സി, ഒടുവിൽ ഡിജിറ്റൽ മൂല്യനിർണയത്തിലെ തകരാറാണെന്ന് സമ്മതിക്കുകയും ആഭ്യന്തര അന്വേഷണത്തിന് ഉത്തരവിടുകയും ചെയ്തു.

തുടർന്ന് നടത്തിയ പുനർമൂല്യനിർണയത്തിന് ശേഷമാണ് പുതിയ റാങ്ക് പട്ടിക ഇന്നലെ രാത്രി പി.എസ്‍.സി പുറത്തുവിട്ടത്. ഇതോടെ പരാതിക്കാരനായ ശ്യാം കൃഷ്ണൻ ഒന്നാം റാങ്കിലെത്തി. പഴയ പട്ടികയിൽ ഒന്നാമതായിരുന്ന അരുൺ പ്രതാപ് അഞ്ചാം സ്ഥാനത്തേക്ക് പിന്തള്ളപ്പെടുകയും ചെയ്തു.

അർഹതപ്പെട്ട ശ്യാം കൃഷ്ണന് എത്രയും പെട്ടെന്ന് ജോലി ലഭ്യമാക്കാനുള്ള നടപടികളിലേക്ക് പി.എസ്‍.സി കടന്നിട്ടുണ്ട്. എന്നാൽ, അരുൺ ജെ. പ്രതാപിന്റെ നിയമനം നടന്ന് ഒരു വർഷം പിന്നിട്ടുകഴിഞ്ഞതിനാൽ, അദ്ദേഹത്തെ പുറത്താക്കുന്നത് പുതിയ നിയമപോരാട്ടങ്ങൾക്ക് വഴിവെച്ചേക്കുമെന്ന ആശങ്കയും നിലനിൽക്കുന്നുണ്ട്.