സിവിൻ ജർമനിയിലേക്ക് പോയത് 40 ദിവസം മുൻപ്; മൂവരും പഠനത്തിനും ജോലിക്കുമായി എത്തിയവർ, നടുക്കം വിട്ടുമാറാതെ നാടും ബന്ധുക്കളും

തിരുവനന്തപുരം: ജർമ്മനിയിലെ ബോഹുമിൽ അപ്പാർട്ട്മെന്റ് സമുച്ചയത്തിലുണ്ടായ തീപിടിത്തത്തിൽ ദാരുണമായി കൊല്ലപ്പെട്ട മൂന്ന് മലയാളികളുടെ മൃതദേഹങ്ങൾ നാട്ടിലെത്തിക്കാനുള്ള നടപടികൾ ഊർജിതമാക്കി. ഇന്ത്യൻ എംബസിയുമായി ബന്ധപ്പെട്ടതായും ജനപ്രതിനിധികളുടെയും ജർമ്മനിയിലെ മലയാളി സംഘടനകളുടെയും സഹായത്തോടെ മൃതദേഹങ്ങൾ വേഗത്തിൽ നാട്ടിലെത്തിക്കാൻ ശ്രമങ്ങൾ നടക്കുന്നുണ്ടെന്നും ബന്ധുക്കൾ അറിയിച്ചു.

ചൊവ്വാഴ്ച പുലർച്ചെയുണ്ടായ ദുരന്തത്തിൽ കൊല്ലപ്പെട്ടത് കൊല്ലം ചെമ്മക്കാട് സ്വദേശി അഞ്ജലി ജോയി, കട്ടപ്പന സ്വദേശി നോവ സാബു, എറണാകുളം കാലടി സ്വദേശി സിവിൻ ജോണി എന്നിവരാണ്. പഠനത്തിനും ജോലിക്കുമായാണ് മൂവരും ജർമ്മനിയിൽ എത്തിയത്.

തീരാവേദനയിൽ കുടുംബങ്ങളും നാടും

വെയർഹൗസ് അസിസ്റ്റന്റായി ജോലി ചെയ്യുന്നതിനിടയിൽ ജർമ്മനിയിൽ തന്നെ അധ്യാപികയായി ജോലിക്ക് കയറാനുള്ള പരിശ്രമത്തിലായിരുന്നു അഞ്ജലി ജോയി. പെൺമക്കളിൽ ഒരാളെ നഷ്ടപ്പെട്ടതിന്റെ തീരാവേദനയിലാണ് അച്ഛൻ ജോയിയും അമ്മ ഷീലയും. നാടും ബന്ധുക്കളും ഇപ്പോഴും നടുക്കത്തിലാണ്.

ജർമ്മനിയിൽ ജിം ട്രെയിനറായി ജോലി ചെയ്യുകയായിരുന്നു റിട്ടയേർഡ് എസ്.ഐ കെ.പി സാബുവിന്റെയും ജ്യോതിയുടെയും മകളായ നോവ സാബു. സുഹൃത്തായ അഞ്ജലിയെ കാണാൻ അപ്പാർട്ട്മെന്റിൽ എത്തിയപ്പോഴാണ് നോവ ദുരന്തത്തിൽ പെടുന്നത്. വെറും നാൽപ്പത് ദിവസം മുൻപ് നാട് വിട്ട് ജർമ്മനിയിലേക്ക് യാത്ര പറഞ്ഞ സിവിൻ ജോണിയാണ് ഇപ്പോൾ ചേതനയറ്റ ശരീരമായി ഉറ്റവരിലേക്ക് മടങ്ങുന്നത്.

ദുരന്തത്തിന് പിന്നിൽ അട്ടിമറിയോ?

അപ്പാർട്ട്മെന്റ് സമുച്ചയത്തിന് തീയിട്ടതാണെന്ന ശക്തമായ സംശയത്തിലാണ് ജർമ്മൻ പൊലീസ് അന്വേഷണം പുരോഗമിക്കുന്നത്. സംഭവവുമായി ബന്ധപ്പെട്ട് അപ്പാർട്ട്മെന്റിലെ താമസക്കാരനായ റുമേനിയൻ പൗരനെ പൊലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്. കൊല്ലപ്പെട്ട മലയാളികൾ ആയിരുന്നില്ല ഇയാളുടെ ലക്ഷ്യമെന്നാണ് പ്രാഥമിക നിഗമനം. അപ്പാർട്ട്മെന്റുമായി ബന്ധപ്പെട്ട് നിലനിന്നിരുന്ന വ്യക്തിപരമായോ ഔദ്യോഗികമായോ ഉള്ള ഒരു തർക്കമാണ് ഈ ക്രൂര കൃത്യത്തിലേക്ക് നയിച്ചതെന്നാണ് കരുതുന്നത്.

മന്ത്രിമാരുടെയും എം.പിമാരുടെയും ജർമ്മനിയിലെ മലയാളി സംഘടനകളുടെയും ശക്തമായ ഇടപെടലുകളെ തുടർന്ന് മൃതദേഹങ്ങൾ നാട്ടിലെത്തിക്കാനുള്ള ഔദ്യോഗിക നടപടികൾ വേഗത്തിൽ പുരോഗമിക്കുകയാണ്.