പുലർച്ചെ പെട്രോള്‍ പമ്പിൽ നിന്നും പണം കവർന്നു, ബാറിൽ കയറി വിലകൂടിയ മദ്യം അകത്താക്കി; സിസിടിവിയിൽ 150 ലേറെ കേസുകളുള്ള ഷാജഹാൻ, അറസ്റ്റിൽ

മലപ്പുറം: പോരൂർ ചെറുകോട് പെട്രോൾ പമ്പിൽ ഗ്ലാസ് തകർത്ത് അകത്തുകയറി പണം കവർന്ന കേസിൽ നിരവധി മോഷണക്കേസുകളിൽ പ്രതിയായ ഷാജഹാൻ (51) അറസ്റ്റിൽ. വെള്ളിയാഴ്ച പുലർച്ചെ മൂന്നോടെയായിരുന്നു സംഭവം. മോഷണത്തിനുശേഷം ഈ പണം ഉപയോഗിച്ച് ബാറിൽനിന്ന് വിലകൂടിയ മദ്യം വാങ്ങി കുടിച്ചതായി പ്രതി പൊലീസിന് മൊഴി നൽകി.

​ഇരുമ്പുവടി ഉപയോഗിച്ച് പെട്രോൾ പമ്പിന്റെ ഗ്ലാസ് തകർത്താണ് പ്രതി അകത്തുകയറിയത്. തുടർന്ന് മേശയിൽ സൂക്ഷിച്ചിരുന്ന 12,000-ത്തോളം രൂപ കൈക്കലാക്കി ഇയാൾ രക്ഷപ്പെടുകയായിരുന്നു. സംഭവത്തെക്കുറിച്ച് അന്വേഷണം നടത്തിയ പോലീസ് പമ്പിലെ സി.സി.ടി.വി ദൃശ്യങ്ങൾ പരിശോധിച്ചാണ് പ്രതിയെ തിരിച്ചറിഞ്ഞത്.

​മോഷണത്തിന് ഉപയോഗിച്ച രീതിയും ദൃശ്യങ്ങളിൽനിന്ന് ലഭിച്ച വിവരങ്ങളും അന്വേഷണത്തിൽ നിർണായകമായി. അർധരാത്രിയോടെ കെ.എസ്.ആർ.ടി.സി ബസിൽ വണ്ടൂരിലെത്തിയ ഷാജഹാൻ മോഷണത്തിനുശേഷം മറ്റൊരു ബസിൽ പെരിന്തൽമണ്ണ ഭാഗത്തേക്ക് കടന്നതായി പൊലീസ് കണ്ടെത്തി. മോഷ്ടിച്ച പണം സ്വന്തം ആവശ്യങ്ങൾക്കായി ചെലവഴിച്ചതായും അന്വേഷണത്തിൽ വ്യക്തമായിട്ടുണ്ട്. കേരളത്തിനകത്തും പുറത്തുമായി നൂറ്റമ്പതോളം കേസുകളിൽ പ്രതിയാണ് ഷാജഹാനെന്ന് പൊലീസ് അറിയിച്ചു.

​ഒരു മാസം മുമ്പാണ് ഇയാൾ പെരിന്തൽമണ്ണ സബ് ജയിലിൽനിന്ന് പുറത്തിറങ്ങിയത്. പുറത്തിറങ്ങി അധികനാൾ കഴിയുന്നതിനുമുമ്പാണ് വീണ്ടും മോഷണക്കേസിൽ പിടിയിലാകുന്നത്. വർഷങ്ങൾക്കുമുമ്പ് വണ്ടൂരിൽ നടന്ന മറ്റൊരു പെട്രോൾ പമ്പ് മോഷണക്കേസിലും ഇയാൾ കൂട്ടുപ്രതിയായിരുന്നു. സമാനമായ കുറ്റകൃത്യങ്ങളിൽ മുമ്പും ഉൾപ്പെട്ടിട്ടുള്ള പ്രതിയുടെ പശ്ചാത്തലം പൊലീസ് പരിശോധിച്ചുവരികയാണ്.

​വണ്ടൂർ പൊലീസ് സ്റ്റേഷനിലെ എ.എസ്.ഐ സ്വയംപ്രഭ, ഷിഫിൻ കുപ്പനത്ത്, സ്ക്വാഡ് അംഗങ്ങളായ കെ.ടി. ആസിഫ് അലി, സാബിറലി, പി. സജീഷ്, സി.കെ. സജേഷ്, എം. കൃഷ്ണദാസ് എന്നിവരടങ്ങിയ സംഘമാണ് പ്രതിയെ പിടികൂടിയത്. പെട്രോൾ പമ്പിലെ മോഷണവുമായി ബന്ധപ്പെട്ട് തുടർനടപടികൾ സ്വീകരിച്ചുവരികയാണെന്ന് പൊലീസ് അറിയിച്ചു.