നാരുകളോ പ്രോട്ടീനോ : വയറുനിറഞ്ഞെന്ന് തോന്നുന്നതിനും കൊഴുപ്പ് കുറയ്ക്കുന്നതിനും മികച്ചത് ഏതാണ്?

ശരീരഭാരം കുറയ്ക്കാനും വയറിലെ കൊഴുപ്പകറ്റാനും ശ്രമിക്കുന്നവർ നേരിടുന്ന പ്രധാന വെല്ലുവിളിയാണ് അമിതവിശപ്പും അടങ്ങാത്ത ഭക്ഷണക്കൊതിയും. വിശപ്പ് നിയന്ത്രിച്ച് കൂടുതൽ സമയം വയറു നിറഞ്ഞതായി തോന്നിപ്പിക്കാൻ സഹായിക്കുന്നതിൽ പ്രോട്ടീനും ഫൈബറും (നാരുകൾ) ഒരുപോലെ നിർണായക പങ്ക് വഹിക്കുന്നുണ്ടെന്നാണ് പോഷകാഹാര വിദഗ്ധർ ചൂണ്ടിക്കാണിക്കുന്നത്. എന്നാൽ ശരീരഭാരം നിയന്ത്രിക്കാനും കൊഴുപ്പ് കുറയ്ക്കാനും ഇവയിൽ ഏതാണ് കൂടുതൽ ഫലപ്രദം?

വിശപ്പകറ്റാൻ പ്രോട്ടീൻ

പേശികളുടെ വളർച്ചയ്ക്കും പുനർനിർമാണത്തിനും ഏറ്റവും അത്യന്താപേക്ഷിതമായ പോഷകമാണ് പ്രോട്ടീൻ. പ്രോട്ടീൻ അടങ്ങിയ ഭക്ഷണങ്ങൾ കഴിക്കുന്നത് ദഹനം സാവധാനത്തിലാക്കുകയും കൂടുതൽ സമയം വയറു നിറഞ്ഞതായി അനുഭവപ്പെടാൻ സഹായിക്കുകയും ചെയ്യും. വിശപ്പുണ്ടാക്കുന്ന ഗ്രെലിൻ (Ghrelin) ഹോർമോണിന്റെ അളവ് കുറയ്ക്കാനും, വയറു നിറഞ്ഞതായി മസ്തിഷ്കത്തിന് സന്ദേശം നൽകുന്ന പെപ്റ്റൈഡ് വൈ.വൈ (Peptide YY) പോലുള്ള ഹോർമോണുകളുടെ ഉൽപ്പാദനം കൂട്ടാനും പ്രോട്ടീൻ സഹായിക്കുന്നു. ഇതിലൂടെ ഇടയ്ക്കിടെ ഭക്ഷണം കഴിക്കാനുള്ള തോന്നൽ ഒഴിവാക്കാം.

ദഹനം സുഗമമാക്കാൻ ഫൈബർ

പഴങ്ങൾ, പച്ചക്കറികൾ, ധാന്യങ്ങൾ, പയറുവർഗങ്ങൾ എന്നിവയിൽ ധാരാളമായി അടങ്ങിയിരിക്കുന്ന നാരുകൾ (ഫൈബർ) ശരീരഭാരം കുറയ്ക്കാൻ ആഗ്രഹിക്കുന്നവർക്ക് ഒഴിച്ചുകൂടാനാവാത്തതാണ്. പ്രോട്ടീനിൽ നിന്ന് വ്യത്യസ്തമായി ഫൈബറിനെ ശരീരം പൂർണമായി ദഹിപ്പിക്കുന്നില്ല. കലോറി വർധിപ്പിക്കാതെ തന്നെ ഭക്ഷണത്തിന് വ്യാപ്തി (Bulk) നൽകാൻ ഇവയ്ക്ക് സാധിക്കും.

പ്രത്യേകിച്ച് വെള്ളത്തിൽ ലയിക്കുന്ന നാരുകൾ (Soluble fibre) ദഹനവ്യവസ്ഥയിൽ ജെൽ പോലുള്ള പദാർത്ഥമായി മാറി ദഹനപ്രക്രിയയുടെ വേഗത കുറയ്ക്കുന്നു. ഇത് രക്തത്തിലെ പഞ്ചസാരയുടെ അളവ് പെട്ടെന്ന് ഉയരുന്നത് തടയുകയും വിശപ്പ് അനുഭവപ്പെടാതെ ദീർഘനേരം നിലനിർത്തുകയും ചെയ്യുന്നു. ഓട്സ്, ചിയ സീഡ്സ്, പയറുവർഗങ്ങൾ എന്നിവ ലയിക്കുന്ന നാരുകളുടെ മികച്ച ഉറവിടങ്ങളാണ്.

ഏതാണ് കൂടുതൽ മികച്ചത്?

വയറു നിറഞ്ഞിരിക്കാനും അനാവശ്യമായി കലോറി ശരീരത്തിലെത്തുന്നത് തടയാനും നാരുകളും പ്രോട്ടീനും ഒരുപോലെ അത്യാവശ്യമാണ്. അതിനാൽ ഇവയിലൊന്ന് പൂർണമായി ഒഴിവാക്കുന്നതിന് പകരം, ദിനംപ്രതിയുള്ള ഭക്ഷണക്രമത്തിൽ പ്രോട്ടീനും ഫൈബറും കൃത്യമായ അളവിൽ ഉൾപ്പെടുത്തുന്നതാണ് ശരീരഭാരവും കൊഴുപ്പും കാര്യക്ഷമമായി കുറയ്ക്കാനുള്ള ഏറ്റവും മികച്ച വഴിയെന്ന് വിദഗ്ധർ വ്യക്തമാക്കുന്നു.