World Arthritis Day 2026 : സന്ധിവാതത്തിന്റെ പ്രധാനപ്പെട്ട ലക്ഷണങ്ങൾ എന്തെല്ലാം?
Nazeema
സ്റ്റാഫ് റിപ്പോർട്ടർ
സന്ധിവാതം (ആർത്രൈറ്റിസ്) സന്ധികളിൽ ശക്തമായ വേദന, നീര്, മുറുക്കം എന്നിവ ഉണ്ടാക്കുന്ന നൂറിലധികം രോഗാവസ്ഥകളുടെ പൊതുപദമാണ്. അമിതവണ്ണം, വ്യായാമക്കുറവ്, തരുണാസ്ഥിയുടെ നഷ്ടം എന്നിവ ഇതിന്റെ പ്രധാന കാരണങ്ങളാണ്.
നിത്യജീവിതത്തിൽ വലിയ വെല്ലുവിളികൾ തീർക്കുന്ന ആരോഗ്യപ്രശ്നങ്ങളിൽ ഒന്നാണ് ആർത്രൈറ്റിസ് അഥവാ സന്ധിവാതം. സന്ധിവേദന, നീര്, സന്ധികളിലെ മുറുക്കം, ചലനശേഷിയിലുള്ള കുറവ് എന്നിവയ്ക്ക് കാരണമാകുന്ന നൂറിലധികം രോഗാവസ്ഥകളെയാണ് ഈ പൊതുപദം സൂചിപ്പിക്കുന്നത്.
ആഗോളതലത്തിൽ സന്ധിവാതത്തെക്കുറിച്ചും മറ്റ് റൂമാറ്റിക്, മസ്കുലോസ്കെലെറ്റൽ രോഗങ്ങളെക്കുറിച്ചും (RMDs) അവബോധം വളർത്തുന്നതിനായി എല്ലാ വർഷവും ഒക്ടോബർ 12-ന് 'ലോക സന്ധിവാത ദിനം' ആചരിക്കുന്നു. ആരോഗ്യകരമായ ജീവിതരീതിയുടെ പ്രാധാന്യത്തെപ്പറ്റി ജനങ്ങളെ ബോധവാന്മാരാക്കാനാണ് ഈ ദിനം ലക്ഷ്യമിടുന്നത്.
പ്രധാന കാരണങ്ങൾ
വ്യത്യസ്ത വിഭാഗങ്ങൾ: ഓസ്റ്റിയോ ആർത്രൈറ്റിസ്, ഇൻഫ്‌ളമേറ്ററി (റൂമാറ്റോയിഡ് ആർത്രൈറ്റിസ് അഥവാ ആമവാതം, ആൻകൈലോസിങ്ങ് സ്‌പോണ്ടിലൈറ്റിസ്, സോറിയാറ്റിക് ആർത്രൈറ്റിസ്), അണുബാധ (സെപ്റ്റിക് ആർത്രൈറ്റിസ്), മെറ്റബോളിക് (ഗൗട്) എന്നിങ്ങനെ പലതരത്തിലാണ് സന്ധിവാതം കണ്ടുവരുന്നത്.
തരുണാസ്ഥിയുടെ നഷ്ടം: അമിതവണ്ണം, സന്ധികളിലുണ്ടാകുന്ന പരിക്കുകൾ, മാംസപേശികളുടെ ബലഹീനത, വ്യായാമക്കുറവ് എന്നിവ സന്ധികളിൽ അധിക സമ്മർദ്ദമുണ്ടാക്കുകയും തരുണാസ്ഥി (Cartilage) നശിക്കുന്നതിന് ഇടയാക്കുകയും ചെയ്യുന്നു. ഇത് സന്ധികൾക്ക് ഇരുവശത്തുമുള്ള എല്ലുകൾ തമ്മിൽ ഉരസുവാൻ കാരണമാകുന്നു.
സന്ധിവാതത്തിന്റെ പ്രധാന ലക്ഷണങ്ങൾ
ശക്തമായ സന്ധിവേദന: സന്ധികളിൽ അസഹ്യമായ വേദന അനുഭവപ്പെടുക.
നീരും ചുവപ്പും: സന്ധിക്ക് ചുറ്റും നീര്, ചൂട് അല്ലെങ്കിൽ ചുവപ്പ് നിറം എന്നിവ കാണപ്പെടുക.
ചലനശേഷി കുറയുക: സന്ധി സാധാരണ രീതിയിൽ വളയ്ക്കാനോ ചലിപ്പിക്കാനോ ബുദ്ധിമുട്ട് നേരിടുക.
സന്ധികളിലെ കാഠിന്യം (മുറുക്കം): പ്രത്യേകിച്ച് രാവിലെ ഉറക്കമുണരുമ്പോഴോ ദീർഘനേരം ഒരേ അവസ്ഥയിൽ അനങ്ങാതെ ഇരിക്കുമ്പോഴോ സന്ധികളിൽ വലിയ മുറുക്കം അനുഭവപ്പെടുക.
ശ്രദ്ധിക്കേണ്ട കാര്യങ്ങൾ
ശരീരഭാരം നിയന്ത്രിക്കുക: അമിതഭാരമുള്ളവർ ആഹാരം നിയന്ത്രിച്ച് ശരീരഭാരം കുറയ്ക്കാൻ ശ്രദ്ധിക്കുക.
ജീവിതശൈലി മാറ്റങ്ങൾ: പുകയില, മദ്യപാനം എന്നിവ പൂർണ്ണമായും ഉപേക്ഷിക്കുക.
വ്യായാമം ശീലമാക്കുക: കൃത്യമായ വ്യായാമങ്ങൾ ശീലമാക്കുന്നത് സന്ധികളുടെ ആരോഗ്യം സംരക്ഷിക്കാൻ സഹായിക്കും.
ഭക്ഷണക്രമം: ശീതളപാനീയങ്ങളും കൊഴുപ്പടങ്ങിയ ഭക്ഷണവസ്തുക്കളും പരമാവധി കുറയ്ക്കുക.
പ്രത്യേകം ശ്രദ്ധിക്കുക: മുട്ടുവേദനയുള്ളവർ പരമാവധി യൂറോപ്യൻ ക്ലോസറ്റ് ഉപയോഗിക്കാൻ ശീലിക്കുക.
