മികച്ച ദഹനത്തിനും മലബന്ധം തടയുന്നതിനും കഴിക്കേണ്ട അഞ്ച് ഭക്ഷണങ്ങൾ

മലബന്ധം കേവലം ഒരു വയറുസംബന്ധമായ പ്രശ്നമല്ല. ഇത് കുടലിന്റെ ആരോഗ്യം, ചർമ്മം, ഊർജ്ജ നില, ഹോർമോൺ സന്തുലിതാവസ്ഥ എന്നിവയെപ്പോലും ഗുരുതരമായി ബാധിച്ചേക്കാം.

ദിവസേന നിരവധി ആളുകളെ അലട്ടുന്ന പ്രധാന ആരോഗ്യപ്രശ്നങ്ങളിലൊന്നാണ് മലബന്ധം. മലവിസർജ്ജനം പൂർണ്ണമാകാതിരിക്കുന്നത് ഗ്യാസ്, വയറു വീർക്കൽ, വയറ്റിൽ അസ്വസ്ഥത എന്നിവയ്ക്ക് കാരണമാകുന്നു. മാത്രവുമല്ല, മലവിസർജ്ജനത്തിലെ ക്രമക്കേടുകൾ മുഖക്കുരു പോലുള്ള ചർമ്മപ്രശ്നങ്ങൾക്കും വഴിയൊരുക്കിയേക്കാം. അതിനാൽ മലബന്ധം പരിഹരിക്കാൻ ധാരാളം വെള്ളം കുടിക്കുന്നതിനൊപ്പം നാരുകൾ അടങ്ങിയ ഭക്ഷണം കഴിക്കാനും ആരോഗ്യവിദഗ്ദ്ധർ നിർദ്ദേശിക്കുന്നു.

കാരണമില്ലാത്ത വയറു വീർക്കൽ, ക്ഷീണം, ചർമ്മ പ്രശ്നങ്ങൾ, ശരീരഭാരം കുറയ്ക്കുന്നതിലെ ബുദ്ധിമുട്ട് എന്നിവയും മലബന്ധത്തിൻ്റെ ലക്ഷണങ്ങളാകാം. മികച്ച ദഹനത്തിനും മലബന്ധം തടയുന്നതിനുമായി നിത്യേന ഭക്ഷണത്തിൽ ഉൾപ്പെടുത്തേണ്ട അഞ്ച് പ്രധാന ഭക്ഷണങ്ങൾ അറിയാം.

1. പച്ച പപ്പായ

പച്ചപ്പപ്പായയിൽ ദഹനത്തെ സഹായിക്കുന്ന 'പാപെയ്ൻ' എന്ന എൻസൈമും ആരോഗ്യകരമായ ദഹനത്തിന് ഉതകുന്ന നാരുകളും അടങ്ങിയിട്ടുണ്ട്. കുടലിൽ അടിഞ്ഞുകൂടിയ മാലിന്യങ്ങൾ നീക്കം ചെയ്യാനും ദഹനവ്യവസ്ഥയുടെ സുഗമമായ പ്രവർത്തനം നിലനിർത്താനും ഇത് ഏറെ സഹായിക്കും.

2. കുതിർത്ത ഉണക്കമുന്തിരി

വെള്ളത്തിൽ കുതിർത്ത ഉണക്കമുന്തിരി മലം മൃദുവാക്കാനും മലവിസർജ്ജനം എളുപ്പമാക്കാനും സഹായിക്കുന്നു. കുടലിലേക്ക് വെള്ളത്തെ ആകർഷിക്കുന്ന 'സോർബിറ്റോൾ' എന്ന പ്രകൃതിദത്ത ഘടകം ഇതിൽ അടങ്ങിയിട്ടുണ്ട്. ഇത് മലബന്ധം പെട്ടെന്ന് ലഘൂകരിക്കാൻ സഹായിക്കും.

3. ഉണങ്ങിയ പ്ലം (പ്രൂൺസ്)

ഉണങ്ങിയ പ്ലം പഴങ്ങളിൽ ലയിക്കുന്നതും ലയിക്കാത്തതുമായ നാരുകൾ ധാരാളമായി അടങ്ങിയിട്ടുണ്ട്. ലയിക്കുന്ന നാരുകൾ ദഹനവ്യവസ്ഥയിലൂടെ മലം എളുപ്പത്തിൽ നീങ്ങാൻ സഹായിക്കുകയും അതുവഴി ദഹനം കൂടുതൽ സുഗമമാക്കുകയും ചെയ്യുന്നു.

4. പിയർ പഴം

മലബന്ധം അകറ്റുന്നതിനും തടയുന്നതിനും പിയർ പഴങ്ങൾ മികച്ചൊരു ഔഷധമാണ്. പിയറിൻ്റെ തൊലിയിൽ ലയിക്കാത്ത നാരുകൾ അടങ്ങിയിട്ടുണ്ട്. ഇവ മലത്തിന് വ്യാപ്തി കൂട്ടുകയും ദഹനവ്യവസ്ഥയിലൂടെ അത് വേഗത്തിൽ നീങ്ങാൻ സഹായിക്കുകയും ചെയ്യുന്നു. പഴത്തിൻ്റെ ഉൾഭാഗത്താകട്ടെ പെക്റ്റിൻ പോലുള്ള ലയിക്കുന്ന നാരുകളും അടങ്ങിയിരിക്കുന്നു.

5. ആപ്പിൾ

ആപ്പിളിൽ ധാരാളം നാരുകളും (ഡയറ്ററി ഫൈബർ) വെള്ളവും അടങ്ങിയിട്ടുള്ളതിനാൽ അവ മലബന്ധം അകറ്റാൻ ഏറെ ഉചിതമാണ്. ആപ്പിളിന്റെ തൊലിയിൽ കാണപ്പെടുന്ന ലയിക്കാത്ത നാരുകൾ കുടലിലൂടെയുള്ള ഭക്ഷണത്തിൻ്റെ സഞ്ചാരം വേഗത്തിലാക്കാൻ സഹായിക്കുന്നു.