ബോക്സ്ഓഫീസ് തൂത്തുവാരാൻ 'ജയിലർ 2'; ഫിലിപ്പീൻസ് വിതരണാവകാശം സ്വന്തമാക്കി ചന്ദ്ര ഫിലിംസ്

നെൽസൺ ദിലീപ്കുമാർ സംവിധാനം ചെയ്ത് സൂപ്പർസ്റ്റാർ രജനികാന്ത് നായകനാകുന്ന 'ജയിലർ 2' ഒക്ടോബർ 15-ന് ആഗോളതലത്തിൽ തിയേറ്ററുകളിലെത്തും. സൺ പിക്ചേഴ്സിന്റെ ബാനറിൽ കലാനിധി മാരൻ നിർമ്മിക്കുന്ന ചിത്രത്തിന്റെ ഫിലിപ്പീൻസ് വിതരണാവകാശം ചന്ദ്ര ഫിലിംസ് സ്വന്തമാക്കി.

കഴിഞ്ഞ ദിവസം പുറത്തിറങ്ങിയ ചിത്രത്തിന്റെ ട്രെയിലറിന് വൻ സ്വീകരണമാണ് സിനിമാ പ്രേമികളിൽ നിന്ന് ലഭിക്കുന്നത്. ഇതിനകം ഒമ്പത് മില്യണിലധികം കാഴ്ചക്കാരെ നേടിക്കഴിഞ്ഞ ട്രെയിലർ യൂട്യൂബിൽ തരംഗമായി തുടരുകയാണ്. മാസും ആക്ഷനും സ്റ്റൈലിഷ് അവതരണവും നിറഞ്ഞുനിൽക്കുന്നതാണ് ട്രെയിലർ. ആദ്യ ഭാഗത്തേക്കാൾ വലിയ മെഗാ കാൻവാസിലാണ് രണ്ടാം ഭാഗം ഒരുക്കിയിരിക്കുന്നത്. നെൽസൺ ദിലീപ്കുമാറിന്റെ ട്രേഡ് മാർക്ക് ബ്ലാക്ക് ഹ്യൂമർ, വമ്പൻ ആക്ഷൻ രംഗങ്ങൾ, പഞ്ച് ഡയലോഗുകൾ എന്നിവ രണ്ടാം ഭാഗത്തിലും പ്രധാന ആകർഷണമാകും.

ആദ്യ ഭാഗത്തിലെ പോലെ തന്നെ മോഹൻലാൽ ആരാധകരും വലിയ പ്രതീക്ഷയിലാണ്. ആദ്യ ഭാഗത്തേക്കാൾ ഗംഭീരമായ വേഷമായിരിക്കും മോഹൻലാലിന്റേതെന്ന സൂചനകളാണ് സോഷ്യൽ മീഡിയ പ്ലാറ്റ്‌ഫോമുകളിലെ കമന്റുകൾ വ്യക്തമാക്കുന്നത്. മുത്തുവേൽ പാണ്ഡ്യൻ എന്ന കഥാപാത്രമായുള്ള രജനീകാന്തിന്റെ തിരിച്ചുവരവ് കാണാൻ കാത്തിരിക്കുകയാണ് തമിഴ് സിനിമാസ്വാദകർ.

കേരളത്തിലും കർണാടകത്തിലും ശ്രീ ഗോകുലം ഗോപാലന്റെ 'ശ്രീ ഗോകുലം മൂവീസ്' ആണ് ചിത്രം വമ്പൻ റിലീസായി തിയേറ്ററുകളിൽ എത്തിക്കുന്നത്. റെക്കോർഡ് തുകയ്ക്കാണ് ഇവർ ചിത്രത്തിന്റെ വിതരണാവകാശം സ്വന്തമാക്കിയത്. കേരളത്തിൽ 'ഡ്രീം ബിഗ് ഫിലിംസ്' ആണ് ഡിസ്ട്രിബ്യൂഷൻ പാർട്ണർ. ഓൾ ടൈം റെക്കോർഡ് റിലീസായിരിക്കും കേരളത്തിൽ ചിത്രത്തിന് ലഭിക്കുക.