200 കോടി നേട്ടത്തിലേക്ക് ഇനി കുറച്ച് ദൂരം മാത്രം; മികച്ച മുന്നേറ്റവുമായി നാനി ചിത്രം 'ദി പാരഡൈസ്'

സമ്മിശ്ര പ്രതികരണങ്ങൾക്കിടയിലും ആഗോള ബോക്സ്ഓഫീസിൽ തരംഗം തീർത്ത് തെലുങ്ക് സൂപ്പർ താരം നാനിയുടെ പാൻ ഇന്ത്യൻ ചിത്രം ‘ദ പാരഡൈസ്’. റിലീസ് ചെയ്ത് 12 ദിവസം പിന്നിടുമ്പോൾ 190 കോടി രൂപയാണ് ചിത്രം ആഗോളതലത്തിൽ വാരിയത്. വൈകാതെ തന്നെ ചിത്രം 200 കോടി ക്ലബ്ബിൽ ഇടംപിടിക്കുമെന്നാണ് റിപ്പോർട്ടുകൾ.

‘ദസറ’ എന്ന ഹിറ്റ് ചിത്രത്തിന് ശേഷം നാനിയും സംവിധായകൻ ശ്രീകാന്ത് ഒഡേലയും വീണ്ടും ഒന്നിച്ച ചിത്രം എസ്.എൽ.വി സിനിമാസിന്റെ ബാനറിൽ സുധാകർ ചെറുകുറിയാണ് നിർമ്മിച്ചിരിക്കുന്നത്. കേരളത്തിൽ ദുൽഖർ സൽമാന്റെ വേഫെറർ ഫിലിംസാണ് ചിത്രം തിയേറ്ററുകളിലെത്തിച്ചത്.

ബ്രഹ്മാണ്ഡ ക്യാൻവാസിൽ മാസ് ആക്ഷൻ പശ്ചാത്തലത്തിൽ ഒരുക്കിയ ചിത്രം അമ്മയും മകനും തമ്മിലുള്ള വൈകാരിക ബന്ധത്തിന്റെ കഥയാണ് പറയുന്നത്. 'ജദാൽ' എന്ന കഥാപാത്രമായി നാനി എത്തുമ്പോൾ, ബോളിവുഡ് താരം രാഘവ് ജൂയലാണ് 'വിക്രം മാലിക്' എന്ന വില്ലൻ വേഷം കൈകാര്യം ചെയ്യുന്നത്. കായദു ലോഹർ, മോഹൻ ബാബു, സോണാലി കുൽക്കർണി, ഈശ്വരി റാവു തുടങ്ങിയ വൻ താരനിരയും ചിത്രത്തിലുണ്ട്.

അനിരുദ്ധ് രവിചന്ദർ സംഗീതസംവിധാനം നിർവ്വഹിച്ച ചിത്രത്തിലെ "ആയാ ഷേർ", "യേഷാ നഗുല" എന്നീ ഗാനങ്ങൾ ഇതിനോടകം സോഷ്യൽ മീഡിയയിൽ തരംഗമായിട്ടുണ്ട്. തെലുങ്ക്, മലയാളം, തമിഴ്, ഹിന്ദി, ഇംഗ്ലീഷ്, സ്പാനിഷ് തുടങ്ങി എട്ട് ഭാഷകളിലാണ് ചിത്രം ആഗോളതലത്തിൽ റിലീസ് ചെയ്തത്. സി.എച്ച്. സായ് ഛായാഗ്രഹണവും നവീൻ നൂലി എഡിറ്റിംഗും നിർവ്വഹിച്ചിരിക്കുന്നു.