വിദേശത്ത് ഈ വര്‍ഷം ഏറ്റവും കളക്ഷന്‍ നേടുന്ന തെന്നിന്ത്യന്‍ സിനിമയായി 'ബെത്‍ലഹേം'
Nazeema
സ്റ്റാഫ് റിപ്പോർട്ടർ
നിവിൻ പോളി - മമിത ബൈജു ചിത്രം 'ബെത്‍ലഹേം' ആഗോളതലത്തിൽ 330 കോടിയും വിദേശത്തുനിന്ന് 138.45 കോടിയും നേടി തരംഗമാകുന്നു. ഈ വർഷം വിദേശത്ത് ഏറ്റവും കൂടുതൽ കളക്ഷൻ നേടുന്ന തെന്നിന്ത്യൻ സിനിമയെന്ന അപൂർവ്വ നേട്ടവും ചിത്രം സ്വന്തമാക്കി.
മലയാള സിനിമയുടെ വിപണി വിദേശത്തും വൻതോതിൽ വികസിക്കുന്നതിന്റെ തെളിവായി നിവിൻ പോളി - മമിത ബൈജു കൂട്ടുകെട്ടിൽ പുറത്തിറങ്ങിയ 'ബെത്‍ലഹേം കുടുംബ യൂണിറ്റ്'. തിയറ്ററുകളിൽ വൻ തരംഗം സൃഷ്ടിച്ച ചിത്രം ഈ വർഷം വിദേശത്ത് നിന്ന് ഏറ്റവും കൂടുതൽ കളക്ഷൻ നേടുന്ന തെന്നിന്ത്യൻ സിനിമയെന്ന അപൂർവ്വ നേട്ടവും സ്വന്തമാക്കി.
ഓഗസ്റ്റ് 21-ന് തിയറ്ററുകളിലെത്തിയ ചിത്രം ഇതിനോടകം ആഗോളതലത്തിൽ 330.86 കോടി രൂപയാണ് നേടിയത്. പ്രമുഖ ബോക്സ് ഓഫീസ് ട്രാക്കർമാരായ സാക്നിൽകിന്റെ കണക്കുകൾ പ്രകാരം ആകെ കളക്ഷന്റെ 42 ശതമാനവും (138.45 കോടി രൂപ) വിദേശ വിപണിയിൽ നിന്നാണ്. നോർത്ത് അമേരിക്ക, മിഡിൽ ഈസ്റ്റ്, യുകെ-അയർലൻഡ്, ഓഷ്യാനിയ തുടങ്ങിയ മേഖലകളിലെല്ലാം മികച്ച കളക്ഷനാണ് ചിത്രം നേടിയത്. ഇന്ത്യയിൽ നിന്ന് മാത്രം 192.41 കോടി രൂപയും ഗ്രോസ് കളക്ഷനായി ലഭിച്ചു.
ഈ വർഷത്തെ വിദേശ കളക്ഷനിൽ ആദ്യ അഞ്ച് സ്ഥാനങ്ങളിൽ മൂന്നും മലയാള ചിത്രങ്ങളാണ് എന്നത് ശ്രദ്ധേയമാണ്:
ബെത്‍ലഹേം കുടുംബ യൂണിറ്റ് (മലയാളം) - 138.45 കോടി
ദൃശ്യം 3 (മലയാളം) - 111.70 കോടി
ജനനായകൻ (തമിഴ് - വിജയ്) - 93.50 കോടി
വാഴ 2 (മലയാളം) - 85.55 കോടി
കറുപ്പ് (തമിഴ് - സൂര്യ) - 81.15 കോടി
ഗിരീഷ് എ.ഡി സംവിധാനം ചെയ്ത 'ബെത്‍ലഹേം കുടുംബ യൂണിറ്റ്', നിവിൻ പോളി, മമിത ബൈജു, ഗിരീഷ് എ.ഡി എന്നിവരുടെ കരിയറിലെ ഏറ്റവും വലിയ ബോക്സ് ഓഫീസ് വിജയമായി മാറിയിരിക്കുകയാണ്.
