ബെംഗളൂരുവിലെ സിജെപി പ്രതിഷേധം: പങ്കെടുക്കാന്‍ ധ്രുവ് റാഠി എത്തും
Samanyu
സ്റ്റാഫ് റിപ്പോർട്ടർ
ബെംഗളൂരു: മുഖ്യതിരഞ്ഞെടുപ്പ് കമ്മിഷണര്‍ക്കെതിരെ ബെംഗളൂരുവില്‍ നാളെ സിജെപിയുടെ നേതൃത്വത്തില്‍ നടക്കുന്ന പ്രക്ഷോഭത്തില്‍ പങ്കെടുക്കാന്‍ ധ്രുവ് റാഠിയടക്കം എത്തും. ബെഗളൂരു ഫ്രീഡം പാര്‍ക്കിലാണ് കര്‍ണാടകയിലെ വോട്ടര്‍ പട്ടികയില്‍ നിന്ന് അന്യായമായി നീക്കം ചെയ്യപ്പെട്ടവര്‍ക്ക് ഐക്യദാര്‍ഢ്യവുമായി പ്രതിഷേധം. ചപ്പല്‍ പ്രൊട്ടസ്റ്റ് എന്ന് പേരിട്ട പ്രതിഷേധത്തില്‍ നടന്‍ പ്രകാശ് രാജ് അടക്കം പങ്കെടുക്കുന്നുണ്ട്. അഭിജിത് ദീപ്‌കെ പുറത്തുവിട്ട ഒരു വിഡിയോയിലാണ് ധ്രുവ് റാഠി എത്തുന്നതിനെ കുറിച്ച് പറയുന്നത്.
രാവിലെ പത്തരയ്ക്കാണ് ഫ്രീഡം പാര്‍ക്കില്‍ പ്രതിഷേധം. സിജെപി നേതാക്കളായ അഭിജിത്ത് ദീപ് കെ, സൗരവ് ദാസ്, വിവിധ വിദ്യാര്‍ഥി സംഘടന നേതാക്കള്‍ എന്നിവര്‍ പ്രതിഷേധത്തില്‍ പങ്കെടുക്കുമെന്ന് സംഘാടകര്‍ അറിയിച്ചു.
വോട്ടര്‍ പട്ടികയില്‍ നിന്ന് പേര് നീക്കം ചെയ്ത ആളുകളും പ്രതിഷേധത്തില്‍ പങ്കെടുക്കുമെന്ന് നടന്‍ പ്രകാശ്‌രാജ് അവകാശപ്പെട്ടു. ബെംഗളൂരു നഗരപരിധിയിലെ മണ്ഡലങ്ങളില്‍ നിന്ന് തന്നെ നിരവധി പേരെ വോട്ടര്‍ പട്ടികയില്‍ നിന്ന് നീക്കം ചെയ്തതായി ആരോപണം ഉയര്‍ന്നിരുന്നു.
വിഷയത്തില്‍ എഫ്‌ഐആര്‍ ഇടണം എന്ന് ആവശ്യപ്പെട്ട് മുഖ്യമന്ത്രി ഡി.കെ ശിവകുമാര്‍ തന്നെ കഴിഞ്ഞദിവസം തിരഞ്ഞെടുപ്പ് കമ്മീഷന്‍ ഓഫീസ് മുന്നില്‍ കുത്തിയിരുന്ന് പ്രതിഷേധിച്ചിരുന്നു.
