മിസൈൽ ഭീഷണി വീണ്ടും ഉയർന്ന സാഹചര്യത്തിൽ ഇറാനുമായുള്ള എല്ലാത്തരം വ്യാപാര, വാണിജ്യ, സാമ്പത്തിക ഇടപാടുകളും താൽക്കാലികമായി നിർത്തിവെച്ചതായി യുഎഇ വിദേശകാര്യ മന്ത്രാലയ കമ്മ്യൂണിക്കേഷൻസ് ഡയറക്ടർ അഫ്ര അൽ ഹമേലി അറിയിച്ചു.
അബുദാബി: മിസൈൽ ഭീഷണി വീണ്ടും ഉയർന്ന പശ്ചാത്തലത്തിൽ ഇറാനുമായുള്ള എല്ലാത്തരം വാണിജ്യ, സാമ്പത്തിക ഇടപാടുകളും താൽക്കാലികമായി നിർത്തിവെച്ചതായി യുഎഇ വിദേശകാര്യ മന്ത്രാലയ കമ്മ്യൂണിക്കേഷൻസ് ഡയറക്ടർ അഫ്ര അൽ ഹമേലി അറിയിച്ചു.
സാധ്യമായ മിസൈൽ ആക്രമണങ്ങളെക്കുറിച്ച് ജനങ്ങൾക്ക് ജാഗ്രതാ നിർദ്ദേശം നൽകി രണ്ട് മണിക്കൂറിന് ശേഷമാണ് യുഎഇയുടെ ഔദ്യോഗിക പ്രതികരണം പുറത്തുവന്നത്. ഇറാനിൽ നിന്ന് വിക്ഷേപിച്ച രണ്ട് ബാലിസ്റ്റിക് മിസൈലുകൾ വ്യോമപ്രതിരോധ സംവിധാനം ഉപയോഗിച്ച് തകർത്തതായി യുഎഇ വ്യക്തമാക്കി. ഭീഷണിയെത്തുടർന്ന് ജനങ്ങളോട് സുരക്ഷിത സ്ഥാനങ്ങളിലേക്ക് മാറാൻ അധികൃതർ മുന്നറിയിപ്പ് നൽകിയിരുന്നു.
എന്നാൽ ഈ ആരോപണങ്ങൾ ഇറാൻ പൂർണ്ണമായും തള്ളി. യുഎഇയുടെ വാദങ്ങൾ അടിസ്ഥാനരഹിതമാണെന്ന് വിശേഷിപ്പിച്ച ഇറാൻ, ഇത്തരം ആരോപണങ്ങളിൽ നിന്ന് മേഖലയിലെ രാജ്യങ്ങൾ പിന്തിരിയണമെന്നും ആവശ്യപ്പെട്ടു.
രാജ്യത്തിന് നേരെയുണ്ടായ മിസൈൽ ഭീഷണി പ്രതിരോധ സംവിധാനങ്ങൾ കൃത്യമായി കണ്ടെത്തിയതായി നാഷണൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്മെന്റ് അതോറിറ്റി (NCEMA) വ്യക്തമാക്കി. പൊതുജനങ്ങൾ സുരക്ഷിത സ്ഥാനങ്ങളിൽ തുടരണമെന്നും ഔദ്യോഗിക അറിയിപ്പുകൾ മാത്രം പാലിക്കണമെന്നും അതോറിറ്റി എക്സിലൂടെ (ട്വിറ്റർ) നിർദ്ദേശിച്ചു.
മാസങ്ങളുടെ ഇടവേളയ്ക്ക് ശേഷമാണ് യുഎഇയിൽ വീണ്ടും മിസൈൽ മുന്നറിയിപ്പ് സന്ദേശം വരുന്നത്. ഇതിനുമുമ്പ് മെയ് മാസത്തിലാണ് സമാനമായ രീതിയിൽ മുന്നറിയിപ്പ് നൽകിയിരുന്നത്; ജൂണിൽ വന്ന അലേർട്ട് സാങ്കേതിക തകരാർ മൂലം സംഭവിച്ചതാണെന്ന് പിന്നീട് അധികൃതർ സ്ഥിരീകരിച്ചിരുന്നു.
