ഹൈദരാബാദ്: ജന്മദിനത്തിൽ ആശംസകൾ നേർന്ന ആരാധകർക്കും അഭ്യുദയകാംക്ഷികൾക്കും നന്ദി അറിയിച്ച് തെലുങ്ക് സൂപ്പർ താരം മഹേഷ് ബാബു. സോഷ്യൽ മീഡിയയിലൂടെ പങ്കുവെച്ച വൈകാരിക കുറിപ്പിലാണ് താരം തന്റെ സന്തോഷം പങ്കുവെച്ചത്. ഏവരുടെയും സ്നേഹത്തിന് മുന്നിൽ മനസ്സ് നിറഞ്ഞിരിക്കുകയാണെന്ന് മഹേഷ് ബാബു കുറിച്ചു.
“നിങ്ങളുടെ ആശംസകളെല്ലാം വായിച്ച് ഹൃദയം നിറഞ്ഞിരിക്കുന്നു. വാക്കുകൾക്കപ്പുറമുള്ള സന്തോഷമാണിത്. മനോഹരമായ ആശംസകളും അനുഗ്രഹങ്ങളും നൽകിയ എന്റെ എല്ലാ അഭ്യുദയകാംക്ഷികൾക്കും സുഹൃത്തുക്കൾക്കും സഹപ്രവർത്തകർക്കും മാധ്യമങ്ങൾക്കും നന്ദി അറിയിക്കുന്നു. എനിക്ക് നിരന്തരം സ്നേഹവും കരുത്തും നൽകുന്ന ആരാധകരോട് എത്ര നന്ദി പറഞ്ഞാലും മതിയാവില്ല. നിങ്ങളുടെ ഈ പിന്തുണയ്ക്ക് ഞാൻ എന്നും കടപ്പെട്ടിരിക്കുന്നു,” മഹേഷ് ബാബു കുറിച്ചു.
തുടർന്നും കഠിനാധ്വാനം ചെയ്യുമെന്നും ആരാധകരെ കൂടുതൽ അഭിമാനമുള്ളവരാക്കുമെന്നും അദ്ദേഹം വാഗ്ദാനം നൽകി. “എന്റെ മനസ്സിനോട് ഏറെ ചേർന്നുനിൽക്കുന്ന ഒന്നാണ് ‘വാരാണസി’. അത് തീർച്ചയായും വലിയൊരു അനുഭവമായിരിക്കും. ഈ സിനിമ നിങ്ങൾ അനുഭവവിദ്യമാക്കുന്ന ആ നിമിഷത്തിനായി ഞാൻ കാത്തിരിക്കുകയാണ്. നമുക്ക് ഈ യാത്ര ഒരുമിച്ച് മുന്നോട്ട് കൊണ്ടുപോകാം,” എന്നും താരം കൂട്ടിച്ചേർത്തു.
എസ്.എസ്. രാജമൗലി സംവിധാനം ചെയ്യുന്ന ബിഗ് ബജറ്റ് ചിത്രമായ ‘വാരാണസി’യാണ് മഹേഷ് ബാബുവിന്റേതായി പുറത്തുവരാനുള്ള പുതിയ ചിത്രം. പ്രിയങ്ക ചോപ്ര, പൃഥ്വിരാജ് സുകുമാരൻ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. അടുത്ത വർഷം ഏപ്രിൽ ഏഴിനാണ് സിനിമയുടെ തിയേറ്റർ റിലീസ് പ്രഖ്യാപിച്ചിരിക്കുന്നത്.
