വീട്ടിൽ മൃഗങ്ങളെ വളർത്തുന്നത് ഒരേസമയം വലിയ സന്തോഷവും ഉത്തരവാദിത്തവുമാണ്. എന്നാൽ പൂച്ചകളെ വളർത്തുമ്പോൾ അവയുടെ ആരോഗ്യത്തിലും ഭക്ഷണക്രമത്തിലും പ്രത്യേക ശ്രദ്ധ നൽകേണ്ടതുണ്ട്. നിങ്ങളുടെ പ്രിയപ്പെട്ട വളർത്തുപൂച്ചകളുടെ ആരോഗ്യം സംരക്ഷിക്കാൻ വീട്ടിൽ തന്നെ ശ്രദ്ധിക്കേണ്ട 5 പ്രധാന കാര്യങ്ങൾ ഇതാ:
1. ദിവസവുമുള്ള രോമം ചീകൽ നിർബന്ധം പൂച്ചകൾ സ്വയം ശരീരം നക്കി വൃത്തിയാക്കുന്ന സ്വഭാവക്കാരാണ്. എന്നാൽ ദിവസവും രോമം ചീകിക്കൊടുക്കുന്നത് പൊഴിഞ്ഞുവീഴാറായ രോമങ്ങൾ നീക്കം ചെയ്യാൻ സഹായിക്കും. പൂച്ചകളുടെ വയറ്റിൽ രോമം അടിഞ്ഞുകൂടുന്നത് (Hairballs) തടയാൻ ഇത് അത്യന്താപേക്ഷിതമാണ്. പ്രത്യേകിച്ച് നീളമുള്ള രോമങ്ങളുള്ള ഇനം പൂച്ചകളിൽ രോമം കെട്ടുപിണയുന്നത് ഒഴിവാക്കാൻ ദിവസേനയുള്ള ചീകൽ സഹായിക്കും.
2. ഡ്രൈ ഫുഡ് അമിതമാകരുത് നായ്ക്കളിൽ നിന്ന് വ്യത്യസ്തമായി പൂച്ചകൾ പൂർണ്ണമായും മാംസാഹാരികളാണ്. അതിനാൽ അവയുടെ പ്രധാന ആഹാരത്തിൽ മാംസത്തിന് മുൻഗണന നൽകണം. ഡ്രൈ ഫുഡ് മാത്രം സ്ഥിരമായി നൽകുന്നത് ശരീരത്തിൽ അമിതമായി കാർബോഹൈഡ്രേറ്റ് എത്തുന്നതിന് കാരണമാകും. ഇത് പൂച്ചകളിൽ അമിതവണ്ണത്തിനും ടൈപ്പ്-2 പ്രമേഹത്തിനും വഴിവെക്കും.
3. കുടിവെള്ളവും ഈർപ്പവും ഉറപ്പാക്കുക നായ്ക്കളെപ്പോലെ ധാരാളം വെള്ളം കുടിക്കുന്ന ശീലം പൂച്ചകൾക്കില്ല. അതിനാൽ കഴിക്കുന്ന ഭക്ഷണത്തിൽ നിന്ന് തന്നെ അവയ്ക്ക് ആവശ്യമായ ജലാംശം ലഭിക്കേണ്ടതുണ്ട്. ശരീരത്തിൽ വെള്ളത്തിന്റെ അളവ് കുറയുന്നത് വൃക്കസംബന്ധമായ അസുഖങ്ങൾക്ക് കാരണമാകുമെന്നതിനാൽ ഈർപ്പമുള്ള ആഹാരങ്ങൾ നൽകാനും എപ്പോഴും കുടിവെള്ളം ലഭ്യമാക്കാനും ശ്രദ്ധിക്കണം.
4. ആവശ്യത്തിന് ലിറ്റർ ബോക്സുകൾ സ്ഥാപിക്കുക പൂച്ചകൾക്ക് പ്രാഥമികകൃത്യങ്ങൾ നിർവ്വഹിക്കാനുള്ള ലിറ്റർ ബോക്സുകളുടെ എണ്ണത്തിൽ പ്രത്യേക ശ്രദ്ധ വേണം. വീട്ടിലുള്ള പൂച്ചകളുടെ എണ്ണത്തേക്കാൾ ഒന്ന് കൂടുതൽ ലിറ്റർ ബോക്സ് കരുതുന്നതാണ് ഉചിതം (ഉദാഹരണത്തിന് 2 പൂച്ചകളുണ്ടെങ്കിൽ 3 ലിറ്റർ ബോക്സുകൾ). ഇവ ഇരുണ്ടതോ ആളനക്കമില്ലാത്തതോ ആയ കോണുകളിൽ വെക്കാതെ പൂച്ചകൾക്ക് സൗകര്യപ്രദമായി ഉപയോഗിക്കാൻ സാധിക്കുന്ന ഇടങ്ങളിൽ സ്ഥാപിക്കണം.
5. യാത്രകളിൽ സുരക്ഷിതത്വം പ്രധാനം വാഹനങ്ങളിൽ യാത്ര ചെയ്യുമ്പോൾ പൂച്ചകളെ സ്വതന്ത്രമായി വിടുന്നത് അപകടസാധ്യത വർധിപ്പിക്കും. സുരക്ഷിതമായ പെറ്റ് കാരിയറുകൾ (Travel Carrier) ഉപയോഗിക്കാനും, പേടിയില്ലാതെ അതിൽ ഇരിക്കാൻ പൂച്ചകളെ മുൻകൂട്ടി പരിശീലിപ്പിക്കാനും ശ്രദ്ധിക്കേണ്ടതാണ്.
