കൊളംബോ: ശ്രീലങ്കയ്ക്കെതിരായ രണ്ടാം ക്രിക്കറ്റ് ടെസ്റ്റിന്റെ രണ്ടാം ദിനം വിക്കറ്റ് കീപ്പർ-ബാറ്റർ ധ്രുവ് ജുറെലിന്റെ വീറുറ്റ പോരാട്ടത്തിന്റെ കരുത്തിൽ ഇന്ത്യ മികച്ച സ്കോറിലേക്ക്. രണ്ടാം ദിനം ചായക്ക് പിരിയുമ്പോൾ ഒന്നാം ഇന്നിംഗ്സിൽ ഇന്ത്യ 8 വിക്കറ്റ് നഷ്ടത്തിൽ 475 റൺസെന്ന ശക്തമായ നിലയിലാണ്. 95 റൺസുമായി ധ്രുവ് ജുറെലും റൺസൊന്നുമെടുക്കാതെ മുഹമ്മദ് സിറാജുമാണ് ക്രീസിൽ.
ആദ്യ രണ്ട് സെഷനുകളിലായി സാരാൻഷ് ജെയിൻ (6), റിഷഭ് പന്ത് (63), മാനവ് സുതാർ (18) എന്നിവരുടെ വിക്കറ്റുകളാണ് ഇന്ത്യക്ക് നഷ്ടമായത്. ഏഴാം വിക്കറ്റിൽ ഒന്നിച്ച റിഷഭ് പന്ത് – ധ്രുവ് ജുറെൽ സഖ്യം കൂട്ടിച്ചേർത്ത 112 റൺസാണ് ഇന്ത്യൻ ഇന്നിംഗ്സിന് അടിത്തറയിട്ടത്.
രണ്ടാം ദിനത്തിന്റെ തുടക്കത്തിൽ തന്നെ സാരാൻഷ് ജെയിൻ പുറത്തായതോടെ ഇന്ത്യയെ വേഗത്തിൽ ചുരുട്ടിക്കൂട്ടാമെന്ന ലങ്കൻ പ്രതീക്ഷകളെ ജുറെലും പന്തും ചേർന്ന കൂട്ടുകെട്ട് തകർത്തെറിയുകയായിരുന്നു. ആദ്യ ദിനം പരിക്കേറ്റ് റിട്ടയേർഡ് ഹർട്ടായി മടങ്ങിയ പന്ത്, ജുറെലിന് മികച്ച പിന്തുണ നൽകി. ലങ്കൻ പേസർമാർ ഷോർട്ട് പിച്ചുകൾ കൊണ്ട് പരീക്ഷിച്ചെങ്കിലും പ്രഭാത് ജയസൂര്യ അടക്കമുള്ള സ്പിന്നർമാർക്ക് സ്വാധീനമുണ്ടാക്കാൻ സാധിച്ചില്ല.
ആദ്യ സെഷനിൽ ഒരു വിക്കറ്റ് മാത്രം നഷ്ടപ്പെടുത്തി 419 റൺസിലെത്തിയ ഇന്ത്യക്ക്, ലഞ്ചിന് തൊട്ടുപിന്നാലെ റണ്ണൊന്നും കൂട്ടിച്ചേർക്കും മുൻപെ പന്തിനെ നഷ്ടമായി. തുടർന്നെത്തിയ മാനവ് സുതാറിനെ ഒപ്പം നിർത്തി ജുറെൽ ടീം സ്കോർ 450 കടത്തി. ശ്രീലങ്കക്കായി അസിത ഫെർണാണ്ടോ നാല് വിക്കറ്റും കെഷാര നുവാന്ത രണ്ട് വിക്കറ്റും വീഴ്ത്തി.
കൊളംബോയിൽ ടെസ്റ്റ് ഇന്നിംഗ്സിൽ ഒരു ടീം 400 റൺസ് മറികടക്കുന്നത് ഇത് 11-ാം തവണയാണ്. മുൻപ് 400 കടന്ന 10 സന്ദർഭങ്ങളിലും ആ ടീമുകൾ വിജയിച്ചിരുന്നു എന്നത് ഇന്ത്യൻ ക്യാമ്പിന് വലിയ പ്രതീക്ഷ നൽകുന്നു. രണ്ട് മത്സരങ്ങളുള്ള പരമ്പരയിലെ ആദ്യ ടെസ്റ്റ് ജയിച്ച ഇന്ത്യ നിലവിൽ 1-0ന് മുന്നിലാണ്.
