ചെന്നൈ: തമിഴകത്തെ ലേഡി സൂപ്പർസ്റ്റാർ നയൻതാരയും യുവതാരം കവിനും ആദ്യമായി ഒന്നിക്കുന്ന ‘ഹായ്’ എന്ന ചിത്രത്തിലെ പുതിയ ഗാനം പുറത്തിറങ്ങി. ജെൻ മാർട്ടിൻ ഈണം നൽകിയ ‘രസഗുള’ എന്ന് തുടങ്ങുന്ന പ്രണയഗാനമാണ് അണിയറപ്രവർത്തകർ പുറത്തുവിട്ടത്.
യുവനിരയിലെ പ്രമുഖ സംഗീതസംവിധായകൻ അനിരുദ്ധ് രവിചന്ദർ ആലാപനം നിർവഹിച്ചിരിക്കുന്ന ഗാനത്തിന്റെ വരികൾ കുറിച്ചിരിക്കുന്നത് വിഷ്ണു ഇടവനാണ്. പ്രശസ്ത കൊറിയോഗ്രാഫർ ബൃന്ദ മാസ്റ്ററാണ് നൃത്തസംവിധാനം നിർവഹിച്ചിരിക്കുന്നത്. റൊമാന്റിക് കോമഡി പശ്ചാത്തലത്തിലൊരുങ്ങുന്ന ചിത്രം ഓഗസ്റ്റ് 14-ന് തിയറ്ററുകളിൽ പ്രദർശനത്തിനെത്തും.
ഗാനരചയിതാവ് കൂടിയായ വിഷ്ണു ഇടവൻ ആദ്യമായി സംവിധായകന്റെ തൊപ്പി അണിയുന്ന ചിത്രം കൂടിയാണിത്. രാജേഷ് ശുക്ല ഛായാഗ്രഹണവും ഫിലോമിൻ രാജ് എഡിറ്റിങ്ങും നിർവഹിക്കുന്നു. ബി. ശേഖർ കലാസംവിധാനവും ദിനേഷ് കാശി സാഹസിക രംഗങ്ങളുടെ ഏകോപനവും കൈകാര്യം ചെയ്യുന്നു.
ക്യാമറയ്ക്കു പിന്നിലെ ലേഡി സൂപ്പർസ്റ്റാർ; ‘മണ്ണാങ്കട്ടി’ ലൊക്കേഷൻ ചിത്രം വൈറൽ
അതേസമയം, നയൻതാര കേന്ദ്രകഥാപാത്രത്തെ അവതരിപ്പിക്കുന്ന മറ്റൊരു ചിത്രമായ ‘മണ്ണാങ്കട്ടി സിൻസ് 1960’-ന്റെ ചിത്രീകരണം പൂർത്തിയായി. ചിത്രത്തിന്റെ ലൊക്കേഷനിൽ നിന്നുള്ള നയൻതാരയുടെ ഒരു ചിത്രം ഇതിനകം സോഷ്യൽ മീഡിയയിൽ ഏറെ ശ്രദ്ധനേടിക്കഴിഞ്ഞു.
വലിയ ക്യാമറ ലെൻസിലൂടെ ദൃശ്യങ്ങൾ നിരീക്ഷിക്കുന്ന നയൻതാരയാണ് ചിത്രത്തിലുള്ളത്. താരം സംവിധായികയുടെ കുപ്പായമണിയുകയാണോ എന്ന തരത്തിൽ ആരാധകർക്കിടയിൽ ചിത്രം വലിയ ചർച്ചകൾക്ക് വഴിവെച്ചിട്ടുണ്ട്.
ഡ്യൂഡ് വിക്കി സംവിധാനം ചെയ്യുന്ന ചിത്രം പ്രിൻസ് പിക്ചേഴ്സിന്റെ ബാനറിലാണ് നിർമിക്കുന്നത്. ഗൗരി കിഷൻ, ദേവദർശനി, നരേന്ദ്രൻ തുടങ്ങിയവരും ചിത്രത്തിൽ പ്രധാന കഥാപാത്രങ്ങളായി എത്തുന്നുണ്ട്.
