ന്യൂഡൽഹി: ബാഡ്മിന്റൺ ലോക ചാമ്പ്യൻഷിപ്പ് പുരുഷ ഡബിൾസിൽ ഇന്ത്യയുടെ മെഡൽ പ്രതീക്ഷകൾക്ക് തിരിച്ചടി. ലോക റാങ്കിങ്ങിൽ അഞ്ചാം സ്ഥാനക്കാരായ സാത്വിക്സായ്രാജ് റങ്കിറെഡ്ഡി – ചിരാഗ് ഷെട്ടി സഖ്യം ക്വാർട്ടർ ഫൈനലിൽ തോറ്റ് പുറത്തായി. ചൈനയുടെ ലോക മൂന്നാം നമ്പർ ജോഡിയായ ലിയാങ് വി കെങ് – വാങ് ചാങ് സഖ്യത്തോടാണ് നേരിട്ടുള്ള ഗെയിമുകൾക്ക് ഇന്ത്യൻ സഖ്യം പരാജയപ്പെട്ടത്. സ്കോർ: 18-21, 9-21.
36 മിനിറ്റ് മാത്രം നീണ്ടുനിന്ന മത്സരത്തിൽ തുടക്കം മുതൽ ചൈനീസ് സഖ്യം ആധിപത്യം പുലർത്തി. ഒന്നാം ഗെയിമിൽ ഒപ്പത്തിനൊപ്പം പോരാടിയെങ്കിലും നിർണായക നിമിഷങ്ങളിൽ ചൈനീസ് ജോഡി മികച്ച തിരിച്ചുവരവിലൂടെ ഗെയിം സ്വന്തമാക്കി (21-18). എന്നാൽ രണ്ടാം ഗെയിമിൽ ഇന്ത്യൻ സഖ്യത്തിന് ഒട്ടും താളം കണ്ടെത്താനായില്ല. തുടക്കത്തിൽ തന്നെ 11-5ന് മുന്നിലെത്തിയ ചൈനീസ് ജോഡി അനായാസം ഗെയിമും മത്സരവും കൈക്കലാക്കി (21-9). ഇരു സഖ്യങ്ങളും തമ്മിൽ ഏറ്റുമുട്ടിയ 13 മത്സരങ്ങളിൽ ഒൻപതിലും വിജയം ചൈനീസ് ജോഡിക്കൊപ്പമായിരുന്നു. 2022, 2025 ലോക ചാമ്പ്യൻഷിപ്പുകളിൽ വെങ്കല മെഡൽ നേടിയ സഖ്യമാണ് സാത്വിക്-ചിരാഗ് കൂട്ടുകെട്ട്.
അതേസമയം, വനിതാ ഡബിൾസിൽ ഇന്ത്യയുടെ ട്രീസ ജോളി – ഗായത്രി ഗോപീചന്ദ് സഖ്യം സെമി ഫൈനലിൽ കടന്ന് ഇന്ത്യക്ക് മെഡൽ ഉറപ്പിച്ചു.
മറ്റു മത്സരങ്ങളിൽ പുരുഷ സിംഗിൾസിൽ ഇന്ത്യയുടെ യുവതാരം ആയുഷ് ഷെട്ടിയും വനിതാ സിംഗിൾസിൽ പി.വി. സിന്ധുവും തോറ്റ് പുറത്തായി. ആയുഷിനെ ഇന്തോനേഷ്യയുടെ അൽവി ഫർഹാനും, ആറാം ലോക ചാമ്പ്യൻഷിപ്പ് മെഡൽ ലക്ഷ്യമിട്ടിറങ്ങിയ സിന്ധുവിനെ ചൈനയുടെ ലോക മൂന്നാം നമ്പർ താരം വാങ് ഷി യിയുമാണ് പരാജയപ്പെടുത്തിയത്.
