ശരീരത്തിന് രക്തത്തിലെ ഗ്ലൂക്കോസിന്റെ അളവ് സ്വയം നിയന്ത്രിക്കാൻ കഴിയാതെ വരുന്ന അവസ്ഥയാണ് പ്രമേഹം അഥവാ ഡയബറ്റിസ്. കൃത്യമായ ശ്രദ്ധ നൽകിയില്ലെങ്കിൽ മറ്റ് പല ഗുരുതരമായ ആരോഗ്യപ്രശ്നങ്ങൾക്കും ഇത് കാരണമായേക്കാം. അതുകൊണ്ടുതന്നെ പ്രമേഹ രോഗികൾ തങ്ങളുടെ ഭക്ഷണ കാര്യത്തിൽ അതീവ ശ്രദ്ധ പുലർത്തേണ്ടതുണ്ട്.
അന്നജം (കാർബോഹൈഡ്രേറ്റ്) കുറഞ്ഞതും നാരുകൾ (ഫൈബർ) ധാരാളമായി അടങ്ങിയതുമായ ഭക്ഷണങ്ങളാണ് പ്രമേഹ ബാധിതർ ഡയറ്റിൽ ഉൾപ്പെടുത്തേണ്ടത്. വിശപ്പ് തോന്നുമ്പോൾ രക്തത്തിലെ പഞ്ചസാരയുടെ അളവ് കൂട്ടാതെ ധൈര്യമായി കഴിക്കാൻ പറ്റിയ ചില ആരോഗ്യകരമായ ലഘുഭക്ഷണങ്ങൾ (Healthy Snacks) ഇതാ:
1. നട്സ് (Nuts)
ആരോഗ്യകരമായ കൊഴുപ്പ്, പ്രോട്ടീൻ, ഫൈബർ എന്നിവയാൽ സമ്പന്നമാണ് നട്സുകൾ. ബദാം, വാൽനട്ട് തുടങ്ങിയ നട്സുകൾ മിതമായ അളവിൽ കഴിക്കുന്നത് വിശപ്പ് മാറ്റാൻ സഹായിക്കുമെന്ന് മാത്രമല്ല, രക്തത്തിലെ പഞ്ചസാരയുടെ അളവ് പെട്ടെന്ന് ഉയരുന്നത് തടയുകയും ചെയ്യും.
2. മുളപ്പിച്ച പയർ വർഗ്ഗങ്ങൾ (Sprouted Grams)
പ്രോട്ടീൻ, നാരുകൾ, വിറ്റാമിനുകൾ, പൊട്ടാസ്യം, ഫോസ്ഫറസ്, മഗ്നീഷ്യം, ഫോലേറ്റ്, ആന്റി-ഓക്സിഡന്റുകൾ എന്നിവയുടെ കലവറയാണ് മുളപ്പിച്ച പയർ. ഇതിന്റെ ഗ്ലൈസമിക് ഇൻഡക്സ് (Glycemic Index) വളരെ കുറവായതിനാൽ ഇത് രക്തത്തിലെ പഞ്ചസാരയുടെ അളവ് നിയന്ത്രിച്ചു നിർത്താൻ മികച്ചതാണ്. പ്രമേഹ രോഗികൾക്ക് വൈകുന്നേരങ്ങളിൽ കഴിക്കാൻ പറ്റിയ ഏറ്റവും നല്ല സ്നാക്കാണിത്.
3. വെള്ളക്കടല (Chickpeas)
പ്രോട്ടീനും നാരുകളും ധാരാളമായി അടങ്ങിയ വെള്ളക്കടല വേവിച്ച് കഴിക്കുന്നത് പ്രമേഹ രോഗികൾക്ക് ഏറെ ഗുണം ചെയ്യും. ഇതിലടങ്ങിയിരിക്കുന്ന മഗ്നീഷ്യം, ഫോളേറ്റ്, ഇരുമ്പ്, സിങ്ക്, കോപ്പർ എന്നിവ എല്ലുകളുടെയും തലച്ചോറിന്റെയും ആരോഗ്യത്തിന് നല്ലതാണ്. കുറഞ്ഞ കലോറി മാത്രമുള്ള വെള്ളക്കടല വിശപ്പ് കുറയ്ക്കാനും അമിതവണ്ണം തടയാനും സഹായിക്കുന്നു.
