കൈകൊണ്ട് തൊട്ടുകൂട്ടി ദോശ കഴിക്കുന്ന ശീലം ഇന്ത്യക്കാർക്ക്, പ്രത്യേകിച്ച് മലയാളികൾക്ക് ആരും പറഞ്ഞുകൊടുക്കേണ്ട ഒന്നല്ല. എന്നാൽ, ദോശ കഴിക്കാനും പ്രത്യേക ‘ഡൈനിങ് എറ്റിക്കറ്റ്’ പഠിപ്പിക്കുന്ന ഒരാളുടെ വീഡിയോ പുറത്തുവന്നതോടെ സമൂഹമാധ്യമങ്ങളിൽ ട്രോളുകളും ചർച്ചകളും കൊഴുക്കുകയാണ്.
വൈറലായ വീഡിയോയിൽ ഒരു എറ്റിക്കറ്റ് പരിശീലകൻ ഫോർക്കും സ്പൂണും ഉപയോഗിച്ച് ദോശ കഴിക്കേണ്ട കൃത്യമായ രീതി വിവരിക്കുന്നുണ്ട്. ദോശയുടെ ഇരുവശവും നടുവിലേക്ക് മടക്കിയ ശേഷം, സ്പൂൺ ഉപയോഗിച്ച് ചെറിയ കഷണങ്ങളാക്കി മുറിച്ച് ഫോർക്കിൽ കോർത്ത് സാമ്പാറിലും ചട്ണിയിലും മുക്കി കഴിക്കുന്നതാണ് ഇയാളുടെ ശൈലി. ഔപചാരികമായ (Formal Dining) സാഹചര്യങ്ങളിൽ ദോശ കഴിക്കേണ്ട മാന്യമായ രീതിയാണിതെന്നാണ് പരിശീലകന്റെ വാദം.
എന്നാൽ വീഡിയോ വൈറലായതോടെ രസകരമായ പ്രതികരണങ്ങളാണ് സോഷ്യൽ മീഡിയയിൽ നിറയുന്നത്. ദോശ പോലുള്ള പരമ്പരാഗത ഭക്ഷണങ്ങൾ കൈകൊണ്ട് കഴിക്കുന്നതിലാണ് അതിന്റെ യഥാർത്ഥ സുഖമെന്നും, അതിന് പോലും ഇത്തരം ‘നിയമങ്ങൾ’ ആവശ്യമില്ലെന്നും ഭൂരിഭാഗം പേരും അഭിപ്രായപ്പെടുന്നു. എന്നാൽ ഫോർമൽ മീറ്റിംഗുകളിലും മറ്റും ഡ്രസ്സിൽ കറ പുരളാതെ ഭക്ഷണം കഴിക്കാൻ ഈ രീതി സഹായകരമാണെന്ന് പറഞ്ഞ് പിന്തുണയ്ക്കുന്നവരും കുറവല്ല. എന്തായാലും, ‘ദോശ കഴിക്കാനും ഇനി ക്ലാസ് വേണോ?’ എന്ന ചോദ്യത്തോടെ വീഡിയോ സോഷ്യൽ മീഡിയയിൽ തരംഗമായി മാറിക്കഴിഞ്ഞു.
