കൊൽക്കത്ത: പശ്ചിമ ബംഗാളിൽ ബി.ജെ.പിക്കെതിരെ അഭിപ്രായ വ്യത്യാസങ്ങൾ മറന്ന് പ്രതിപക്ഷ പാർട്ടികൾ ഒന്നിക്കണമെന്ന് തൃണമൂൽ കോൺഗ്രസ് അധ്യക്ഷയും മുഖ്യമന്ത്രിയുമായ മമത ബാനർജി. തെരഞ്ഞെടുപ്പ് തോൽവിക്ക് പിന്നാലെ പാർട്ടി വിട്ടവരെ ‘വഞ്ചകർ’ എന്ന് വിശേഷിപ്പിച്ച മമത, ഇവരെ ഒരു കാരണവശാലും തൃണമൂലിലേക്ക് തിരിച്ചെടുക്കില്ലെന്നും വ്യക്തമാക്കി.
കൊൽക്കത്തയിൽ സംഘടിപ്പിച്ച തൃണമൂൽ കോൺഗ്രസിന്റെ രക്തസാക്ഷി ദിന റാലിയെ അഭിസംബോധന ചെയ്ത് സംസാരിക്കുകയായിരുന്നു അവർ. ഇടത്-കോൺഗ്രസ് പാർട്ടികളുടെ പേരെടുത്തു പറയാതെയായിരുന്നു മമതയുടെ ആഹ്വാനം.
“ബി.ജെ.പിക്കെതിരെ പോരാടാൻ ബംഗാളിൽ എല്ലാവരും ‘ഇന്ത്യ’ (INDIA) സഖ്യത്തിന് കീഴിൽ അണിനിരക്കണം. എനിക്ക് യാതൊരുവിധ അഹങ്കാരവുമില്ല. അഭിപ്രായവ്യത്യാസങ്ങൾ മാറ്റിവെച്ച് ഒന്നിച്ച് പോരാടാൻ എല്ലാവരും തയ്യാറാകണം.” — മമത ബാനർജി
‘വിമതർ ബി.ജെ.പിയിലേക്ക് പോകട്ടെ’
പാർട്ടി വിട്ട നേതാക്കളെ രൂക്ഷമായി വിമർശിച്ച മമത, അവർക്ക് വേണമെങ്കിൽ ബി.ജെ.പി ടിക്കറ്റിൽ മത്സരരംഗത്തിറങ്ങാമെന്നും വെല്ലുവിളിച്ചു.
“ബി.ജെ.പിയെ പിന്തുണയ്ക്കാനാണ് താല്പര്യമെങ്കിൽ അങ്ങോട്ട് പോകൂ. എത്ര പേർ പോകുന്നുവോ അത്രയും സന്തോഷം. ഒഴിവുകൾ നികത്താൻ വിദ്യാർത്ഥി-യുവജന പ്രവർത്തകർ സജ്ജരാണ്. പാർട്ടി സ്ഥാപകയായി ഞാൻ ഇവിടെയുള്ളപ്പോൾ തൃണമൂലിന്റെ ചിഹ്നം വിമതർക്ക് ലഭിക്കില്ല. ഇനി സംസ്ഥാനത്തെ മുഴുവൻ ജില്ലകളിലും പര്യടനം നടത്തും. എന്നെ തടയാൻ ആർക്കാണ് ശക്തിയെന്ന് കാണട്ടെ.”
— മമത വ്യക്തമാക്കി
