തിരുവനന്തപുരം: കൊല്ലം കുണ്ടറയിൽ പൊലീസ് കസ്റ്റഡിയിലെടുത്ത് വിട്ടയച്ച യുവാവ് ചികിത്സയിലിരിക്കെ മരിച്ച സംഭവത്തിൽ ആഭ്യന്തര മന്ത്രി രമേശ് ചെന്നിത്തല ഡി.ജി.പിയോട് അടിയന്തര റിപ്പോർട്ട് തേടി. കസ്റ്റഡിയിൽ ക്രൂരമർദനത്തിനിരയായ കുണ്ടറ സ്വദേശി സിയാദ് ആണ് തിരുവനന്തപുരം മെഡിക്കൽ കോളേജ് ആശുപത്രിയിൽ മരണത്തിന് കീഴടങ്ങിയത്.
വിദ്യാർഥിനിയെ കാണാതായ കേസുമായി ബന്ധപ്പെട്ട് ജൂൺ 16-നാണ് സിയാദിനെ കുണ്ടറ പൊലീസ് വീട്ടിൽനിന്ന് കസ്റ്റഡിയിലെടുക്കുന്നത്. കാണാതായ വിദ്യാർഥിയെ കണ്ടെത്തിയതോടെ തൊട്ടടുത്ത ദിവസം സിയാദിനെ വിട്ടയച്ചെങ്കിലും സംഭവവുമായി ഇയാൾക്ക് യാതൊരു ബന്ധവുമില്ലായിരുന്നുവെന്ന് ബന്ധുക്കൾ വ്യക്തമാക്കുന്നു.
പൊലീസ് മർദനത്തെ തുടർന്നുണ്ടായ ആന്തരിക പരിക്കുകളാണ് മരണത്തിന് കാരണമായതെന്നാണ് കുടുംബത്തിൻ്റെ പരാതി. സിയാദിൻ്റെ വാരിയെല്ലുകൾക്ക് മർദനത്തിൽ ഗുരുതരമായി പരിക്കേറ്റിരുന്നു. ഇതിനിടെ സിയാദിൻ്റെ മകളും പൊലീസ് ഉദ്യോഗസ്ഥനും തമ്മിൽ നടത്തുന്ന ഫോൺ സംഭാഷണത്തിൻ്റെ ശബ്ദരേഖയും പുറത്തുവന്നിട്ടുണ്ട്.
അതേസമയം, കസ്റ്റഡി മർദന ആരോപണം പൊലീസ് നിഷേധിച്ചു. സിയാദിന് മറ്റ് ഗുരുതര ആരോഗ്യപ്രശ്നങ്ങൾ ഉണ്ടായിരുന്നുവെന്നും പൊലീസിൻ്റെ ഭാഗത്തുനിന്ന് മർദനമൊന്നും ഉണ്ടായിട്ടില്ലെന്നുമാണ് ഔദ്യോഗിക വിശദീകരണം.
സംഭവത്തിൽ കുറ്റക്കാരായ പൊലീസ് ഉദ്യോഗസ്ഥർക്കെതിരെ നടപടി ആവശ്യപ്പെട്ട് ഡി.വൈ.എഫ്.ഐയുടെ നേതൃത്വത്തിൽ കുണ്ടറ പൊലീസ് സ്റ്റേഷനിലേക്ക് പ്രതിഷേധ മാർച്ച് നടത്തി.
