'വിമാനത്തിലോ ഉയരമുള്ള കെട്ടിടത്തിലോ ഇടിച്ചിറക്കാൻ പദ്ധതിയിട്ടു, പക്ഷേ നടന്നില്ല'; അന്വേഷണ ഉദ്യോഗസ്ഥരോട് കൂടുതൽ വിവരങ്ങൾ വെളിപ്പെടുത്തി സഹപൈലറ്റ്

ന്യൂഡൽഹി: ടെൽ അവീവിലേക്ക് പോവുകയായിരുന്ന ഫ്ലൈദുബായ് വിമാനത്തിൽ ക്യാപ്റ്റനെ വധിക്കാൻ ശ്രമിച്ച സംഭവത്തിൽ കൂടുതൽ വിവരങ്ങൾ പുറത്ത്. വിമാനത്തിലെ സഹപൈലറ്റായ ഒമാൻ സ്വദേശി ഹമാം അൽ-ഹമ്മാമിയാണ് ഞെട്ടിക്കുന്ന വെളിപ്പെടുത്തൽ നടത്തിയത്. ക്യാപ്റ്റൻ സ്മിത് മച്ചാറിനെ വധിച്ചശേഷം വിമാനം ടെൽ അവീവിലെ ഉയർന്ന കെട്ടിടങ്ങളിലോ മറ്റ് വിമാനങ്ങളിലോ ഇടിച്ചിറക്കാനായിരുന്നു പദ്ധതിയെന്ന് ഇയാൾ അന്വേഷണ ഉദ്യോഗസ്ഥരോട് സമ്മതിച്ചു.

വർഷങ്ങളായി താൻ ഈ പദ്ധതി ആസൂത്രണം ചെയ്തുവരികയാണെന്നും ഈയൊരു ലക്ഷ്യത്തോടെയാണ് ഫ്ലൈദുബായിൽ ജോലിയിൽ പ്രവേശിച്ചതെന്നും പ്രതി വെളിപ്പെടുത്തി. എന്നാൽ ആക്രമണത്തിനിടെ ക്യാപ്റ്റൻ കോക്പിറ്റ് വാതിൽ തുറന്നതോടെ പദ്ധതി പാളുകയായിരുന്നു.

തലയ്ക്ക് പിന്നിൽ മഴുകൊണ്ട് അടിച്ചു: നടുക്കം മാറാതെ ക്യാപ്റ്റൻ

വിമാനത്തിൽ നടന്ന ദാരുണമായ സംഭവങ്ങൾ ക്യാപ്റ്റൻ സ്മിത് മച്ചാർ വിശദീകരിച്ചു. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി ഫോണിൽ സംസാരിക്കവെയാണ് അദ്ദേഹം കോക്പിറ്റിൽ നടന്ന ദാരുണ സംഭവങ്ങൾ ഓർത്തെടുത്തത്.

"സാധാരണപോലെയാണ് സർവീസ് ആരംഭിച്ചത്. അല്പസമയത്തിനകം പ്രാർഥിക്കണമെന്ന് സഹപൈലറ്റ് പറഞ്ഞു. വിമാനം പറത്തുമ്പോൾ പലരും പ്രാർഥിക്കാറുള്ളതിനാൽ അസ്വാഭാവികതയൊന്നും തോന്നിയില്ല. അതിനാൽ അദ്ദേഹത്തിന് ബുദ്ധിമുട്ടുണ്ടാക്കാതെ ഞാൻ മുന്നിലേക്ക് തന്നെ നോക്കിയിരുന്നു. എന്നാൽ നാലോ അഞ്ചോ മിനിറ്റിന് ശേഷം പെട്ടെന്ന് എന്റെ തലയ്ക്ക് പിന്നിൽ ശക്തമായ അടിയേറ്റു. കോക്പിറ്റിലുണ്ടായിരുന്ന ചെറിയ മഴു (ആക്സ്) ഉപയോഗിച്ചായിരുന്നു ആക്രമണം," സ്മിത് മച്ചാർ പറഞ്ഞു.

ആദ്യത്തെ പ്രഹരത്തിൽ തന്നെ കാഴ്ച മങ്ങിത്തുടങ്ങിയതായി അദ്ദേഹം പറഞ്ഞു. "വിമാനത്തിന് എന്തോ സംഭവിച്ചെന്നാണ് ആദ്യം കരുതിയത്. എന്നാൽ മർദനം തുടർന്നതോടെ പ്രശ്നം ഒപ്പമുള്ള ആളുടേതാണെന്ന് മനസ്സിലായി. വിമാനം താഴേക്ക് പതിക്കുന്നതും യാത്രക്കാരുടെ നിലവിളികളും കേൾക്കാമായിരുന്നു. അവസാന ശ്വാസം വരെ പോരാടാൻ ഉറപ്പിച്ച് സർവശക്തിയുമെടുത്ത് കോക്പിറ്റിന്റെ വാതിലിനടുത്തേക്ക് നീങ്ങി വാതിൽ തുറന്നു," അദ്ദേഹം കൂട്ടിച്ചേർത്തു.

വലിയ ദുരന്തം ഒഴിവായത് യാത്രക്കാരുടെ ഇടപെടലിൽ

കഴിഞ്ഞ ബുധനാഴ്ച ദുബായിൽനിന്ന് ടെൽ അവീവിലേക്ക് പോവുകയായിരുന്ന വിമാനത്തിലാണ് സംഭവം. ക്യാപ്റ്റൻ വാതിൽ തുറന്നതോടെ പുറത്തുണ്ടായിരുന്ന യാത്രക്കാർ കോക്പിറ്റിലേക്ക് ഇരച്ചുകയറി അക്രമിയായ സഹപൈലറ്റിനെ കീഴ്പ്പെടുത്തുകയായിരുന്നു. തുടർന്ന് വിമാനത്തിൽ യാത്രക്കാരായിരുന്ന, അവധിയിലുള്ള മറ്റ് രണ്ട് പൈലറ്റുമാർ വിമാനത്തിന്റെ നിയന്ത്രണം ഏറ്റെടുക്കുകയും സൗദി അറേബ്യയിലെ തബൂക്ക് വിമാനത്താവളത്തിൽ സുരക്ഷിതമായി ഇറക്കുകയും ചെയ്തു.

തലയ്ക്ക് ഗുരുതരമായി പരിക്കേറ്റ ക്യാപ്റ്റൻ സ്മിത് മച്ചാർ നിലവിൽ യു.എ.ഇയിലെ ആശുപത്രിയിൽ ചികിത്സയിലാണ്. ദുബായ് കിരീടാവകാശിയും ഇന്ത്യൻ പ്രധാനമന്ത്രി നരേന്ദ്ര മോദിയും അദ്ദേഹത്തെ ബന്ധപ്പെട്ട് പ്രശംസ അറിയിച്ചിരുന്നു. സംഭവം ഭീകരാക്രമണശ്രമമാണെന്ന് യു.എ.ഇ അറ്റോർണി ജനറൽ ഹമാദ് സൈഫ് അൽ ഷംസി സ്ഥിരീകരിച്ചു.