ഫ്രാൻസിനെ വലച്ച് വിദ്യാർത്ഥി പ്രതിഷേധം, 2000ലേറെ സ്കൂളുകൾ അടച്ചിട്ടു, ആറായിരത്തിലേറെ പേർ കസ്റ്റഡിയിൽ

പാരീസ്: ക്ലാസ് മുറികളിലെ സൗകര്യങ്ങൾ മെച്ചപ്പെടുത്തണമെന്നും അധ്യാപക ഒഴിവുകൾ നികത്തണമെന്നും ആവശ്യപ്പെട്ട് ഫ്രാൻസിൽ വിദ്യാർത്ഥി പ്രക്ഷോഭം ശക്തമാകുന്നു. പാരീസ് ഉൾപ്പെടെ മുപ്പതോളം നഗരങ്ങളിലേക്ക് വ്യാപിച്ച സമരത്തെത്തുടർന്ന് രണ്ടായിരത്തിലധികം സ്കൂളുകൾ അടച്ചിടുകയും സർവകലാശാലകളിൽ ഉപരോധം ഏർപ്പെടുത്തുകയും ചെയ്തു. 25-ലേറെ സ്കൂളുകൾക്ക് പ്രക്ഷോഭകർ തീയിട്ടതായാണ് വിവരം. പതിറ്റാണ്ടുകൾക്കിടയിലെ ഏറ്റവും വലിയ വിദ്യാർത്ഥി പ്രക്ഷോഭത്തിനാണ് രാജ്യം സാക്ഷ്യം വഹിക്കുന്നത്.

പാരീസിന്റെ വടക്കൻ പ്രാന്തപ്രദേശത്തുള്ള ഹൈസ്കൂളിൽ സമരം ചെയ്ത അധ്യാപകർക്ക് പിന്തുണ പ്രഖ്യാപിച്ച് തുടക്കമിട്ട പ്രതിഷേധമാണ് പിന്നീട് രാജ്യമൊട്ടാകെ വ്യാപിച്ചത്. കഴിഞ്ഞ ഏതാനും ആഴ്ചകളായി നൂറുകണക്കിന് സ്കൂളുകളുടെ പ്രവർത്തനം പൂർണ്ണമായി തടസ്സപ്പെട്ടു. ഇതുവരെ ആറായിരത്തിലധികം പേരെ പോലീസ് കസ്റ്റഡിയിലെടുത്തിട്ടുണ്ട്. അറസ്റ്റിലായവരിൽ ഭൂരിഭാഗവും മുൻപ് കുറ്റകൃത്യങ്ങളിൽ പങ്കാളികളാകാത്ത പ്രായപൂർത്തിയാകാത്ത വിദ്യാർത്ഥികളാണ്.

പോലീസും പ്രക്ഷോഭകരും തമ്മിലുണ്ടായ ഏറ്റുമുട്ടലിൽ നിരവധിയാളുകൾക്ക് പരിക്കേറ്റു. വടക്കുകിഴക്കൻ നഗരമായ ലെൻസിൽ ഗ്രനേഡ് പൊട്ടിത്തെറിച്ച് ഒരു വിദ്യാർത്ഥിയുടെ കൈ നഷ്ടപ്പെടുകയും, ടൂർസിൽ മറ്റൊരു വിദ്യാർത്ഥിക്ക് കണ്ണിന് ഗുരുതരമായി പരിക്കേൽക്കുകയും ചെയ്തു. പാരീസിൽ പ്രക്ഷോഭകർക്ക് നേരെ പോലീസ് കണ്ണീർവാതകം പ്രയോഗിച്ചു. ഇതിനിടെ സ്ഫോടകവസ്തു പൊട്ടിത്തെറിച്ച് 15 വയസ്സുകാരൻ്റെ കൈപ്പത്തി തകർന്ന സംഭവത്തിൽ ആംനസ്റ്റി ഇന്റർനാഷണൽ ആശങ്ക രേഖപ്പെടുത്തി.

സെപ്റ്റംബർ 21-ന് പാരീസിലെ സെന്റ് എക്സുപെറി ഹൈസ്കൂളിൽ അടിസ്ഥാന സൗകര്യങ്ങൾ ആവശ്യപ്പെട്ട് അധ്യാപകർ ആരംഭിച്ച സമരത്തിലാണ് പ്രക്ഷോഭത്തിന്റെ തുടക്കം. പിന്നീട് അധികൃതർ ആവശ്യങ്ങൾ അംഗീകരിച്ചെങ്കിലും പ്രതിഷേധം രാജ്യത്താകെ പടരുകയായിരുന്നു. വിദ്യാഭ്യാസ മന്ത്രാലയം പൂർണ്ണമായും പകച്ചുനിൽക്കുകയാണെന്നും മുൻപൊരിക്കലും ഇത്രയധികം സ്കൂളുകൾ ഒരേസമയം സമരത്തിൽ പങ്കാളികളായിട്ടില്ലെന്നും വിദ്യാർത്ഥി നേതാവ് മാനെസ് നാഡെൽ വ്യക്തമാക്കി.

അതേസമയം, ഫ്രാൻസിലെ ക്രമസമാധാന നില തകർന്നതിന് കാരണം നിയന്ത്രണാതീതമായ കൂട്ട കുടിയേറ്റമാണെന്ന് മുൻ യുഎസ് പ്രസിഡന്റ് ഡൊണാൾഡ് ട്രംപ് ആരോപിച്ചു. എന്നാൽ, കലാപത്തിന് പിന്നിൽ തീവ്ര ഇടതുപക്ഷ സംഘടനകളാണെന്നാണ് ഫ്രഞ്ച് സർക്കാരിന്റെ വിശദീകരണം.