ആ കണക്കങ്ങ്‌ തീര്‍ത്തു! കണ്ണൂരിനെ വീഴ്‌ത്തി തിരുവനന്തപുരത്തിന്റെ കൊമ്പന്‍മാര്‍ സീസണിലെ ആദ്യ ജയം ആഘോഷിച്ചു

തിരുവനന്തപുരം: കഴിഞ്ഞ സീസണിലെ തോൽവിക്ക് സ്വന്തം തട്ടകത്തിൽ പകരംവീട്ടി തിരുവനന്തപുരം കൊമ്പൻസ് എഫ്.സി. സൂപ്പർ ലീഗ് കേരള മൂന്നാം സീസണിലെ ആവേശപ്പോരാട്ടത്തിൽ കണ്ണൂർ വാരിയേഴ്‌സിനെ ഷൂട്ടൗട്ടിൽ (4-1) കീഴടക്കി കൊമ്പന്മാർ സീസണിലെ ആദ്യ വിജയം സ്വന്തമാക്കി. ആദ്യ മത്സരത്തിൽ കാലിക്കറ്റിനോടേറ്റ തോൽവിയുടെ ക്ഷീണം തീർക്കുന്നതായിരുന്നു ആതിഥേയരുടെ ഈ തിരിച്ചുവരവ്.

നിശ്ചിത സമയത്ത് ഇരുടീമുകളും ഓരോ ഗോൾ വീതം നേടി സമനില പാലിച്ചതോടെയാണ് മത്സരം ഷൂട്ടൗട്ടിലേക്ക് നീണ്ടത്. തിരുവനന്തപുരത്തിനായി യുവതാരം മുഹമ്മദ് നിഷാമും കണ്ണൂരിനായി ഘാന താരം ഫെഡറിക് ബോച്ച്വെയും ഗോൾ നേടി.

ഷൂട്ടൗട്ടിൽ കണ്ണൂർ താരങ്ങളായ എസിയർ ഗോമസ്, ഏണസ്റ്റൻ ലവ്സാംബ, ആൽവാരോ ആൽവാരസ് എന്നിവർക്ക് പിഴച്ചപ്പോൾ, തിരുവനന്തപുരം എടുത്ത മൂന്ന് കിക്കുകളും ലക്ഷ്യത്തിലെത്തിച്ച് വിജയം ഉറപ്പിച്ചു.

ആദ്യ പകുതിയുടെ 42-ാം മിനിറ്റിൽ മുഹമ്മദ് നിഷാമിലൂടെയാണ് കൊമ്പന്മാർ മുന്നിലെത്തിയത്. മധ്യനിരയിൽ നിന്ന് അർജുൻ നൽകിയ മനോഹരമായ പാസ് നെഞ്ചിൽ നിയന്ത്രിച്ച് പുറംകാൽ കൊണ്ട് നിഷാം വലയിലേക്ക് തിരിച്ചുവിടുകയായിരുന്നു. തുടർന്ന് സമനിലയ്ക്കായി പൊരുതിയ കണ്ണൂർ, 80-ാം മിനിറ്റിൽ നിജോ ഗിൽബെർട്ടിന്റെ ക്രോസിൽ നിന്ന് ഫെഡറിക് ബോച്ച്വെയിലൂടെ ലക്ഷ്യം കണ്ടു.

മത്സരത്തിലുടനീളം ഇരുടീമുകളും മികച്ച അവസരങ്ങൾ സൃഷ്ടിച്ചു. 31-ാം മിനിറ്റിൽ കണ്ണൂർ താരം സ്റ്റെമൻകോവിച്ചിന്റെ ഗോളുറച്ച നീക്കം തിരുവനന്തപുരം ഗോൾകീപ്പർ സത്യജിത് സമയോചിതമായി തടഞ്ഞിരുന്നു. 7868 കാണികളാണ് മത്സരം കാണാൻ സ്റ്റേഡിയത്തിലെത്തിയത്.

രണ്ട് റൗണ്ടുകൾ പൂർത്തിയാകുമ്പോൾ കാലിക്കറ്റ്‌ എഫ്.സിയും ഫോഴ്‌സ കൊച്ചി എഫ്.സിയും അഞ്ച് പോയന്റുകളോടെ മുന്നിലാണ്. കണ്ണൂർ വാരിയേഴ്‌സിന് നാലും തിരുവനന്തപുരം കൊമ്പൻസിന് രണ്ടും പോയന്റുകളുണ്ട്.

വെള്ളിയാഴ്ച (ഒക്ടോബർ 9) കണ്ണൂർ ജവഹർ മുനിസിപ്പൽ സ്റ്റേഡിയത്തിൽ നടക്കുന്ന മൂന്നാം റൗണ്ട് മത്സരത്തിൽ കണ്ണൂർ വാരിയേഴ്‌സ്, ഫോഴ്‌സ കൊച്ചിയെ നേരിടും. രാത്രി 7.30നാണ് മത്സരം.