ക്രിസ്റ്റ്യാനോയെ തിരിച്ചുകൊണ്ടുവരാന്‍ പ്രധാനമന്ത്രിയുടെ ഇടപെടല്‍, പോര്‍ച്ചുഗല്‍ ജനത രണ്ട്‌ തട്ടില്‍,ടീമിനെ കൈയ്യൊഴിഞ്ഞ്‌ ആരാധകര്‍

പരിശീലകന്‍ ജോര്‍ജ് ജീസസുമായുള്ള ഭിന്നതയെ തുടര്‍ന്ന് സൂപ്പര്‍ താരം ക്രിസ്റ്റ്യാനോ റൊണാള്‍ഡോ പോര്‍ച്ചുഗല്‍ ദേശീയ ടീമിന്റെ ട്രെയിനിങ് ക്യാമ്പ് വിട്ടിറങ്ങിയത് രാജ്യത്ത് വന്‍ രാഷ്ട്രീയ-ഫുട്ബോള്‍ കൊടുങ്കാറ്റ് അഴിച്ചുവിട്ടിരിക്കുന്നു. ക്രിസ്റ്റ്യാനോയുടെ കരിയറും വിരമിക്കലും ചര്‍ച്ചയാകുന്നതിനൊപ്പം പോര്‍ച്ചുഗലിലെ മാധ്യമങ്ങളും ആരാധകരും താരത്തിനെ അനുകൂലിച്ചും പ്രതികൂലിച്ചും രംഗത്തെത്തിയതോടെ രാജ്യം രണ്ടു തട്ടിലായി.

യുവേഫ നാഷന്‍സ് ലീഗില്‍ നോര്‍വെക്കെതിരായ മത്സരത്തില്‍ ആദ്യ ഇലവനില്‍ അവസരം നൽകാത്തതിലും തുടര്‍ന്ന് പകരക്കാരനായി പോലും ഇറക്കാതിരുന്നതിലും പ്രതിഷേധിച്ചാണ് ക്രിസ്റ്റ്യാനോ ടീം ഹോട്ടല്‍ വിട്ടത്. പിന്നാലെ, ദേശീയ ടീമിന്റെ ഔദ്യോഗിക ഇന്‍സ്റ്റഗ്രാം പേജ് അഞ്ച് ലക്ഷത്തോളം ആരാധകരാണ് അണ്‍ഫോളോ ചെയ്തത്.

പ്രധാനമന്ത്രി നേരിട്ട് ഇടപെടുന്നു

ഒരു ഫുട്ബോള്‍ താരം ടീം ക്യാമ്പ് വിട്ടത് രാജ്യത്ത് വലിയ രാഷ്ട്രീയ വിഷയമായി മാറിയതോടെ പോര്‍ച്ചുഗീസ് പ്രധാനമന്ത്രി ലൂയിസ് മോണ്ടിനെഗ്രോ നേരിട്ട് പ്രശ്നപരിഹാരത്തിന് രംഗത്തിറങ്ങി. പരിശീലകന്‍ ജോര്‍ജ് ജീസസുമായി പ്രധാനമന്ത്രി ഫോണില്‍ ദീര്‍ഘനേരം സംസാരിച്ചതായും ക്രിസ്റ്റ്യാനോയുമായി ആശയവിനിമയം നടത്തിയതായും സ്ഥിരീകരിക്കാത്ത റിപ്പോര്‍ട്ടുകളുണ്ട്. ഫുട്ബോള്‍ ഫെഡറേഷന്‍ പ്രസിഡന്റ് പെഡ്രോ പ്രോൻസയോട് വിഷയം രമ്യമായി പരിഹരിക്കാന്‍ പ്രധാനമന്ത്രി ആവശ്യപ്പെട്ടിട്ടുണ്ട്. ക്യാമ്പ് വിട്ട റൊണാള്‍ഡോയെ അനുനയിപ്പിക്കാന്‍ വിമാനത്താവളം വരെ പെഡ്രോ പ്രോൻസ നേരിട്ടെത്തിയിരുന്നു.

7-ാം നമ്പര്‍ ജഴ്സിയും വിവാദവും

ക്രിസ്റ്റ്യാനോയുടെ ഐക്കോണിക് ഏഴാം നമ്പര്‍ ജഴ്സി റാഫേല്‍ ലിയാവോക്ക് നല്‍കാനുള്ള ടീം മാനേജ്മെന്റ് തീരുമാനം സ്ഥിതിഗതികൾ കൂടുതല്‍ സങ്കീര്‍ണമാക്കി. മുമ്പും റോണാള്‍ഡോയുടെ അഭാവത്തില്‍ റികാര്‍ഡോ ക്വാരിസ്മ, നാനി, പെഡ്രോ നെറ്റോ തുടങ്ങിയവര്‍ ഏഴാം നമ്പര്‍ അണിഞ്ഞിട്ടുണ്ടെങ്കിലും, നിലവിലെ സാഹചര്യത്തില്‍ ഈ നീക്കം പരിശീലകന്റെ 'മറുപടി'യായാണ് വിലയിരുത്തപ്പെടുന്നത്.

നേരത്തെ, സൗദി ക്ലബ്ബ് അല്‍ നാസറില്‍ റൊണാള്‍ഡോയുടെ പരിശീലകനായിരുന്ന ജോര്‍ജ് ജീസസിനെ പോര്‍‍ച്ചുഗല്‍ പരിശീലക സ്ഥാനത്തേക്ക് കൊണ്ടുവരുന്നതില്‍ റൊണാള്‍ഡോ പ്രധാന പങ്ക് വഹിച്ചിരുന്നു. എന്നാല്‍‍ 2028 യൂറോ കപ്പും 2030 ലോകകപ്പും ലക്ഷ്യമിടുന്ന ജീസസ്, റൊണാള്‍ഡോയെ ഭാവി പദ്ധതികളില്‍ ഉള്‍പ്പെടുത്തുന്നില്ലെന്ന സൂചനയാണ് നല്‍കുന്നത്. ഫെഡറേഷന്റെ പിന്തുണയോടെയാണ് പരിശീലകന്‍ ഇത്തരമൊരു കടുത്ത നിലപാടിലേക്ക് കടന്നതെന്നാണ് വിവരം.

1000 ഗോള്‍ സ്വപ്നത്തിന് തിരിച്ചടി

കരിയറില്‍ 979 ഔദ്യോഗിക ഗോളുകള്‍ തികച്ച ക്രിസ്റ്റ്യാനോക്ക് 1000 ഗോള്‍ എന്ന നാഴികക്കല്ലിലെത്താന്‍ ഇനി 21 ഗോളുകള്‍ കൂടി വേണം. പോര്‍ച്ചുഗല്‍ ജഴ്സിയില്‍ ആയിരാമത്തെ ഗോള്‍ നേടി വിരമിക്കുകയെന്ന താരത്തിന്റെ പദ്ധതിക്കാണ് നിലവിലെ സംഭവവികാസങ്ങളോടെ തിരിച്ചടിയേറ്റത്. ക്യാമ്പ് വിട്ടതിന് അച്ചടക്ക നടപടിയായി ഒന്നു മുതല്‍ ആറു മാസം വരെ സസ്പെൻഷൻ നേരിടേണ്ടി വന്നേക്കാം.

അതേസമയം, പ്രശ്നങ്ങള്‍ പരിഹരിച്ച് ക്രിസ്റ്റ്യാനോക്ക് അര്‍ഹിക്കുന്ന യാത്രാ അയപ്പ് നല്‍കണമെന്ന് ഫുട്ബോള്‍ ലോകത്ത് നിന്ന് ആവശ്യമുയരുന്നുണ്ട്. ജോര്‍ജ് ജീസസ് വിഷയം കുറച്ചുകൂടി പക്വതയോടെ കൈകാര്യം ചെയ്യേണ്ടതായിരുന്നുവെന്ന് ബെല്‍ജിയം പരിശീലകന്‍ മാര്‍ക് വാന്‍ ബോമ്മല്‍ അഭിപ്രായപ്പെട്ടപ്പോള്‍, ഈ ഒറ്റ സംഭവം കൊണ്ട് റൊണാള്‍‍ഡോയുടെ മഹത്വം കുറയില്ലെന്ന് മുന്‍ ഫ്രഞ്ച് താരം തിയറി ഓൻറിയും വ്യക്തമാക്കി.

അല്‍ നാസറിലൂടെ 1000 ഗോള്‍ തികച്ച ശേഷം റൊണാള്‍ഡോക്ക് ദേശീയ ടീമില്‍ വിടവാങ്ങല്‍ മത്സരം ഒരുക്കുമോ അതോ താരം അന്താരാഷ്ട്ര ഫുട്ബോളില്‍ നിന്ന് പൂര്‍ണ്ണമായി അകലുമോ എന്നാണ് കായിക ലോകം ഉറ്റുനോക്കുന്നത്.