സ്ത്രീകളോടുള്ള അതിക്രമത്തില്‍ രാഷ്ട്രീയം കലര്‍ത്തരുത് ; പീഡനപരാതി ഒത്തുതീര്‍പ്പാക്കി സിപിഎം നിയമത്തെ വെല്ലുവിളിക്കുന്നു
Nazeema
സ്റ്റാഫ് റിപ്പോർട്ടർ
സ്ത്രീകൾക്കെതിരെയുള്ള അതിക്രമങ്ങളിൽ രാഷ്ട്രീയം കലർത്തരുതെന്നും പരാതികൾ പാർട്ടി ഓഫീസിൽ ഒത്തുതീർപ്പാക്കുന്ന സി.പി.എം രീതി നിയമവ്യവസ്ഥയോടുള്ള വെല്ലുവിളിയാണെന്നും മന്ത്രി ബിന്ദു കൃഷ്ണ. പീഡനാരോപണത്തിൽ യുവതി പരാതിയുമായി മുന്നോട്ടുവന്നാൽ സർക്കാറിന്റെ പൂർണ പിന്തുണയും നിയമസംരക്ഷണവും ഉറപ്പാക്കുമെന്നും അവർ പറഞ്ഞു.
പാലക്കാട്: സ്ത്രീകൾക്കെതിരെയുള്ള അതിക്രമങ്ങളിൽ രാഷ്ട്രീയം കലർത്തരുതെന്നും കുറ്റക്കാർക്കെതിരെ ശക്തമായ നടപടിയുണ്ടാകണമെന്നും മന്ത്രി ബിന്ദു കൃഷ്ണ. പീഡന പരാതികൾ പാർട്ടി ഓഫീസുകളിൽ ഒത്തുതീർപ്പാക്കുന്ന സി.പി.എമ്മിന്റെ രീതി രാജ്യത്തെ നിയമ വ്യവസ്ഥയോടുള്ള തുറന്ന വെല്ലുവിളിയാണെന്നും അവർ പറഞ്ഞു.
സി.പി.എം പാലക്കാട് ജില്ലാ സെക്രട്ടറിക്കെതിരെ ഉയർന്ന പീഡനാരോപണം പാർട്ടിക്കുള്ളിൽ ചർച്ച ചെയ്ത് ഒതുക്കാൻ ശ്രമിക്കുന്നതിനെതിരെ മാധ്യമങ്ങളോട് സംസാരിക്കുകയായിരുന്നു മന്ത്രി. പീഡന പരാതികൾ അതീവ ഗുരുതരമാണ്. തെറ്റ് ചെയ്യുന്നവർ ആരായാലും നിയമപരമായി ശിക്ഷിക്കപ്പെടണം. എന്തുവന്നാലും പാർട്ടി സംവിധാനത്തിനുള്ളിൽ ഇത്തരം വിഷയങ്ങൾ തീർപ്പാക്കുന്ന പ്രവണത അംഗീകരിക്കാനാവില്ല.
പരാതിയുമായി യുവതി മുന്നോട്ടുവന്നാൽ സംസ്ഥാന സർക്കാർ പൂർണ പിന്തുണ നൽകുമെന്നും കേസിന് പ്രഥമ പരിഗണന നൽകുമെന്നും അവർ വ്യക്തമാക്കി. ആരെയും ഭയന്ന് പരാതിയിൽ നിന്ന് പിന്മാറരുത്. പരാതിക്കാരിക്കു വേണ്ട സംരക്ഷണവും നിയമ പരിരക്ഷയും സർക്കാർ ഉറപ്പുവരുത്തും. അതിക്രമങ്ങളെക്കുറിച്ച് പരാതിപ്പെടാതിരിക്കുന്നത് ഇത്തരം തെറ്റുകൾ ചെയ്യുന്നവർക്ക് പ്രോത്സാഹനമാകുമെന്നും മന്ത്രി കൂട്ടിച്ചേർത്തു.
