നവരാത്രി; തിരക്ക് കുറയ്ക്കാൻ ബെംഗളൂരു–കണ്ണൂർ പ്രത്യേക ട്രെയിൻ സർവീസ് പ്രഖ്യാപിച്ച് റെയിൽവേ

ബെംഗളൂരു: നവരാത്രി തിരക്ക് പരിഗണിച്ച് ബെംഗളൂരുവിനും കണ്ണൂരിനുമിടയിൽ ദക്ഷിണ പശ്ചിമ റെയിൽവേ പ്രത്യേക ട്രെയിൻ സർവീസ് പ്രഖ്യാപിച്ചു. യാത്രക്കാരുടെ യാത്രാക്ലേശം പരിഹരിക്കുന്നതിന്റെ ഭാഗമായാണ് നടപടി.

ശനിയാഴ്ച രാത്രി 12.05-ന് സർ വിശ്വേശ്വരയ്യ ടെർമിനലിൽ (SMVT) നിന്ന് പുറപ്പെടുന്ന ട്രെയിൻ, അന്ന് ഉച്ചയ്ക്ക് 2.00 മണിക്ക് കണ്ണൂരിൽ എത്തിച്ചേരും. തിരികെ ശനിയാഴ്ച വൈകീട്ട് 6.25-ന് കണ്ണൂരിൽ നിന്ന് പുറപ്പെടുന്ന സർവീസ്, ഞായറാഴ്ച രാവിലെ ബെംഗളൂരു കന്റോൺമെന്റിൽ യാത്ര അവസാനിപ്പിക്കും.

സേലം, പാലക്കാട്, ഷൊർണൂർ വഴിയാണ് സർവീസ് ക്രമീകരിച്ചിരിക്കുന്നത്. പാലക്കാട്, ഷൊർണൂർ, തിരൂർ, കോഴിക്കോട്, വടകര, തലശ്ശേരി എന്നിവിടങ്ങളിൽ ട്രെയിയിന് സ്റ്റോപ്പുകൾ ഉണ്ടായിരിക്കുമെന്ന് റെയിൽവേ അധികൃതർ അറിയിച്ചു.