രാജ്യത്തെ നടുക്കിയ 'ബ്ലൂ ഡ്രം' കൊലക്കേസ്, യുവാവിനെ കൊന്ന് വെട്ടിനുറുക്കി ഡ്രമ്മിലാക്കി; ഭാര്യയ്ക്കും കാമുകനും വധശിക്ഷ

മീററ്റ്: രാജ്യത്തെ നടുക്കിയ 'ബ്ലൂ ഡ്രം' കൊലക്കേസിൽ പ്രതികൾക്ക് വധശിക്ഷ വിധിച്ച് മീററ്റ് ജില്ലാ കോടതി. മർച്ചന്റ് നേവി ഉദ്യോഗസ്ഥനായ സൗരഭ് രാജ്പുത്തിനെ കൊലപ്പെടുത്തിയ കേസിൽ ഭാര്യ മസ്കൻ റസ്തോഗിയും കാമുകൻ സാഹിൽ ശുക്ലയുമാണ് കുറ്റക്കാരാണെന്ന് കണ്ടെത്തിയതിനെ തുടർന്ന് കോടതി വധശിക്ഷ വിധിച്ചത്.

2025 മാർച്ച് മൂന്നിനാണ് രാജ്യത്തെ ഞെട്ടിച്ച ഈ കൊലപാതകം നടന്നത്. സൗരഭിനെ കൊലപ്പെടുത്തി ഒരുമിച്ച് ജീവിക്കാനായിരുന്നു മസ്കന്റെയും സാഹിൽ ശുക്ലയുടെയും പദ്ധതി. ഇതിന്റെ ഭാഗമായി സംഭവദിവസം സൗരഭിന് ഭക്ഷണത്തിൽ മയക്കുമരുന്ന് കലർത്തി നൽകി. തുടർന്ന് സാഹിൽ ശുക്ല സൗരഭിന്റെ വീട്ടിലെത്തുകയും, മസ്കനും കാമുകനും ചേർന്ന് അദ്ദേഹത്തെ കുത്തിക്കൊലപ്പെടുത്തുകയുമായിരുന്നു.

കൊലപാതകത്തിന് ശേഷം കുളിമുറിയിൽവെച്ച് മൃതദേഹം വെട്ടിനുറുക്കി നീല നിറത്തിലുള്ള വലിയ ഡ്രമ്മിലാക്കി. തുടർന്ന് മൃതദേഹം കോൺക്രീറ്റും മണലും ഇട്ട് പൂർണ്ണമായി മൂടുകയായിരുന്നു. കൃത്യത്തിന് ശേഷം ഹിമാചൽ പ്രദേശിലേക്ക് കടന്ന പ്രതികൾ, സൗരഭിന്റെ ഫോണിൽനിന്ന് ബന്ധുക്കൾക്ക് സന്ദേശങ്ങൾ അയച്ച് അദ്ദേഹം യാത്രയിലാണെന്ന് തെറ്റിദ്ധരിപ്പിക്കാൻ ശ്രമിച്ചു.

എന്നാൽ ദിവസങ്ങൾ കഴിഞ്ഞിട്ടും വിവരമില്ലാത്തതിനെ തുടർന്ന് മാർച്ച് 17-ാം തീയതി ബന്ധുക്കൾ വീട്ടിലെത്തി അന്വേഷണം നടത്തി. ഇതിനിടയിൽ ദമ്പതികളുടെ ആറുവയസ്സുള്ള മകൾ പറഞ്ഞ നിർണായക വിവരമാണ് കേസിൽ വഴിതിരിവായത്. "പപ്പ നീല ഡ്രമ്മിലുണ്ട്" എന്ന കുട്ടിയുടെ വെളിപ്പെടുത്തൽ ബന്ധുക്കളിൽ സംശയമുണർത്തി. ഉടൻ തന്നെ ഇവർ പൊലീസിൽ വിവരമറിയിക്കുകയും, പൊലീസെത്തി ഡ്രം തുറന്നു പരിശോധിച്ചതോടെ മൃതദേഹാവശിഷ്ടങ്ങൾ കണ്ടെത്തുകയുമായിരുന്നു. തുടർന്ന് ഷിംലയിലെ ഒരു ഹോട്ടലിൽ നിന്നാണ് പ്രതികളെ പൊലീസ് പിടികൂടിയത്. കേസിൽ പ്രധാന തെളിവായി മാറിയത് മൃതദേഹം ഒളിപ്പിച്ച ആ നീല ഡ്രം തന്നെയായിരുന്നു.