പണി വരുന്നുണ്ട്! വാഹന ഉടമകളുടെ ശ്രദ്ധയ്ക്ക്; കർശന നിർദേശവുമായി സുപ്രീം കോടതി; ട്രാഫിക് പിഴ അടക്കാത്ത വാഹനങ്ങൾ പിടിച്ചെടുക്കാൻ നിർദേശം

ന്യൂഡൽഹി: രാജ്യത്തുടനീളം ഇ-ചെല്ലാൻ വഴിയുള്ള ട്രാഫിക് പിഴ കുടിശ്ശിക ഭീമമായി വർധിച്ച സാഹചര്യത്തിൽ വാഹന ഉടമകൾക്കെതിരെ കർശന നടപടിയുമായി സുപ്രീം കോടതി. പിഴ അടച്ചുതീർക്കാത്ത വാഹന ഉടമകൾക്കെതിരെ റോഡുകളിൽ അപ്രതീക്ഷിത പരിശോധന നടത്താനും, കുടിശ്ശിക വരുത്തിയ വാഹനങ്ങൾ പിടിച്ചെടുക്കാനും കോടതി നിർദേശം നൽകി. നിലവിൽ 49,194.05 കോടി രൂപയാണ് രാജ്യത്തെ ആകെ ഇ-ചെല്ലാൻ കുടിശ്ശിക.

ജസ്റ്റിസ് ജെ.ബി. പർദിവാല, ജസ്റ്റിസ് കെ.വി. വിശ്വനാഥൻ എന്നിവരടങ്ങിയ ബെഞ്ചാണ് ഈ നിർണായക ഉത്തരവ് പുറപ്പെടുവിച്ചത്. ഇ-ചെല്ലാനുകൾ അയക്കുന്നതിൽ മാത്രം കാര്യമില്ലെന്നും പിഴത്തുക കൃത്യമായി ഈടാക്കാൻ അധികാരികൾക്ക് കഴിയണമെന്നും കോടതി വ്യക്തമാക്കി.

മോട്ടോർ വാഹന സേവനങ്ങൾ തടയും; ബ്ലാക്ക്‌ലിസ്റ്റിൽ ഉൾപ്പെടുത്തും

പിഴ കുടിശ്ശിക വരുത്തിയ വാഹന ഉടമകൾക്ക് നൽകുന്ന വിവിധ മോട്ടോർ വാഹന സേവനങ്ങൾ നിർത്തിവെക്കാൻ എല്ലാ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും കോടതി നിർദേശം നൽകിയിട്ടുണ്ട്.

• പരിവാഹൻ പോർട്ടലിൽ ബ്ലാക്ക്‌ലിസ്റ്റ് ചെയ്യും: വാഹനം വിൽക്കാനോ ഉടമസ്ഥാവകാശം കൈമാറാനോ സാധിക്കാത്ത വിധം 'പരിവാഹൻ' പോർട്ടലിൽ ഇത്തരം വാഹനങ്ങൾ ബ്ലാക്ക്‌ലിസ്റ്റ് ചെയ്യും.

• സേവനങ്ങൾ തടയും: കുടിശ്ശിക തീർപ്പാക്കാതെ വാഹനങ്ങളുടെ രജിസ്ട്രേഷൻ പുതുക്കൽ, ഡ്യൂപ്ലിക്കേറ്റ് ആർ.സി, ഫിറ്റ്നസ് സർട്ടിഫിക്കറ്റ്, മലിനീകരണ നിയന്ത്രണ സർട്ടിഫിക്കറ്റ് (PUC) എന്നിവ നൽകില്ല.

• ലൈസൻസ് റദ്ദാക്കൽ: വൻതോതിൽ ട്രാഫിക് നിയമലംഘനം നടത്തുന്നവരുടെ ഡ്രൈവിംഗ് ലൈസൻസ് പുതുക്കുന്നത് തടയുന്നതുൾപ്പെടെയുള്ള കർശന നടപടികൾ സ്വീകരിക്കാനും കോടതി സംസ്ഥാനങ്ങളോട് ആവശ്യപ്പെട്ടു.