അനികയ്‍ക്ക് സർപ്രൈസൊരുക്കി കമ്പനി, ആദ്യമായി പറത്തുന്ന വിമാനത്തിൽ യാത്രക്കാരായി അച്ഛനുമമ്മയും

കൊച്ചി: കൊമേഴ്സ്യൽ പൈലറ്റായ മകൾ ആദ്യമായി വിമാനം നിയന്ത്രിക്കുന്ന ഫ്ലൈറ്റിൽ യാത്രക്കാരായി അച്ഛനും അമ്മയും. ഗോവ ആസ്ഥാനമായി പ്രവർത്തിക്കുന്ന റീജിയണൽ എയർലൈൻസായ 'Fly91' ആണ് തങ്ങളുടെ ജൂനിയർ ഫസ്റ്റ് ഓഫീസറായ അനികയ്ക്ക് കരിയറിലെ ഏറ്റവും വലിയ സമ്മാനമൊരുക്കിയത്. അനിക അറിയാതെയായിരുന്നു മാതാപിതാക്കളെ ഈ വിമാനത്തിൽ യാത്രക്കാരായി എത്തിച്ചത്. കോക്ക്പിറ്റിലേക്ക് കയറവേ അച്ഛനെയും അമ്മയെയും യാത്രക്കാരുടെ നിരയിൽ കണ്ട അനികയുടെ സന്തോഷം അതിരുകളില്ലാത്തതായിരുന്നു. അനികയെ സംബന്ധിച്ച് ഒരിക്കലും മറക്കാനാവാത്ത ആ യാത്ര, മാതാപിതാക്കൾക്കും വലിയ അഭിമാന നിമിഷമായി മാറി.

എന്താണ് 'റിലീസ്ഡ് പൈലറ്റ്'?

ഒരു എയർലൈനിൽ പൈലറ്റാകാൻ കഠിനമായ പരിശീലനങ്ങളാണ് പൂർത്തിയാക്കേണ്ടത്. സിമുലേറ്റർ സെഷനുകൾ, ടേക്ക്-ഓഫുകളും ലാൻഡിംഗുകളും ഉൾപ്പെടുന്ന ബേസ് ചെക്കുകൾ, ട്രെയിനറുടെ മേൽനോട്ടത്തിലുള്ള ഫ്ലൈറ്റുകൾ തുടങ്ങി എല്ലാ നിബന്ധനകളും വിജയകരമായി പൂർത്തിയാക്കുന്നവരെയാണ് ഔദ്യോഗികമായി കൊമേഴ്സ്യൽ റൂട്ടുകളിൽ പറക്കാൻ അനുമതി ലഭിച്ച 'റിലീസ്ഡ് പൈലറ്റ്' എന്ന് വിശേഷിപ്പിക്കുന്നത്. ഈ അംഗീകാരം ലഭിച്ച് ആദ്യമായി കൊമേഴ്സ്യൽ വിമാനം പറത്തുന്ന വേളയിലാണ് അനികയ്ക്ക് കമ്പനി ഈ മനോഹരമായ സർപ്രൈസ് ഒരുക്കിയത്.

പുതിയൊരു പാരമ്പര്യത്തിന് തുടക്കം കുറിച്ചു Fly91

ഈ സംഭവത്തിന് പിന്നാലെ പുതിയൊരു ആശയത്തിന് തുടക്കം കുറിച്ചിരിക്കുകയാണ് Fly91 എയർലൈൻസ്. ഇനി മുതൽ തങ്ങളുടെ പുതിയ പൈലറ്റുമാരുടെ ആദ്യ സർവീസുകളിൽ അവരുടെ പ്രിയപ്പെട്ടവരെയും യാത്രക്കാരായി ഉൾപ്പെടുത്താനാണ് കമ്പനിയുടെ തീരുമാനം.

ഇതുസംബന്ധിച്ച് Fly91 തങ്ങളുടെ എക്സ് (ട്വിറ്റർ) പോസ്റ്റിൽ കുറിച്ചതിങ്ങനെ:

സാമൂഹിക മാധ്യമങ്ങളിൽ ഇതിനോടകം വൈറലായ ഈ വാർത്തയ്ക്ക് താഴെ നിരവധി പേരാണ് അനികയ്ക്കും എയർലൈൻസിനും അഭിനന്ദനങ്ങളുമായി രംഗത്തെത്തുന്നത്.

"അനികയെ സംബന്ധിച്ച് അതൊരിക്കലും മറക്കാനാവാത്ത ഒരു യാത്രയായിരുന്നു; അവളുടെ മാതാപിതാക്കൾക്ക് അതൊരു അഭിമാന നിമിഷവും. ഒപ്പം FLY91 ആയ ഞങ്ങൾക്ക്, പരിശീലനം പൂർത്തിയാക്കി പുറത്തിറങ്ങുന്ന ഞങ്ങളുടെ പൈലറ്റുമാരെ അവരുടെ പ്രിയപ്പെട്ടവരുടെ സാന്നിധ്യം കൊണ്ട് അദ്ഭുതപ്പെടുത്തുന്ന ഒരു പുതിയ പാരമ്പര്യത്തിന്റെ തുടക്കവുമാണിത്. കാരണം, ഓരോ പൈലറ്റിന്റെയും വിജയത്തിന് പിന്നിൽ ടേക്ക്-ഓഫിന് മുമ്പേ അവരെ പ്രോത്സാഹിപ്പിച്ചുകൊണ്ട് കൂടെയുണ്ടായിരുന്ന ചില മനുഷ്യരുണ്ട്."