അഞ്ച് പേർ കൊല്ലപ്പെട്ടു, 10 പേർക്ക് പരിക്ക്, പലരുടെയും നില അതിഗുരുതരം; മരുന്ന് നിർമാണ കമ്പനിയുടെ ആന്ധ്രയിലെ പ്ലാൻ്റിൽ വൻ സ്ഫോടനം

തിരുപ്പതി: ആന്ധ്രാപ്രദേശിലെ തിരുപ്പതി ജില്ലയിലുള്ള ഫാർമസ്യൂട്ടിക്കൽ നിർമാണശാലയിലുണ്ടായ ബോയിലർ സ്ഫോടനത്തിൽ അഞ്ച് തൊഴിലാളികൾ കൊല്ലപ്പെട്ടു. പത്തോളം പേർക്ക് ഗുരുതരമായി പരിക്കേറ്റു. ശ്രീ സിറ്റി സ്പെഷ്യൽ ഇക്കണോമിക് സോണിൽ പ്രവർത്തിക്കുന്ന ടി.ഐ.എൽ (TIL) ഹെൽത്ത്‌കെയർ പ്ലാൻ്റിലാണ് ശനിയാഴ്ച രാവിലെ എട്ട് മണിയോടെ വൻ സ്ഫോടനമുണ്ടായത്.

രാവിലെ ഷിഫ്റ്റിൽ ജോലിയിലുണ്ടായിരുന്ന തൊഴിലാളികളാണ് അപകടത്തിൽപ്പെട്ടത്. സ്ഫോടനത്തിൻ്റെ ആഘാതത്തിൽ കെട്ടിട ഭാഗങ്ങൾ തകരുകയും പ്രദേശം മുഴുവൻ പുകകൊണ്ടു മൂടുകയും ചെയ്തു. വിവരമറിഞ്ഞ് അഗ്നിശമന സേനയും പോലീസും ആംബുലൻസുകളും ഉടൻ സ്ഥലത്തെത്തി രക്ഷാപ്രവർത്തനം തുടങ്ങി. അവശിഷ്ടങ്ങൾക്കിടയിൽ കുടുങ്ങിയവരെ പുറത്തെടുത്ത് സമീപത്തെ ആശുപത്രികളിൽ പ്രവേശിപ്പിച്ചു. പരിക്കേറ്റ ചിലരുടെ നില അതിഗുരുതരമായി തുടരുകയാണ്.

സാങ്കേതിക തകരാറാണോ സുരക്ഷാവീഴ്ചയാണോ അപകടത്തിന് കാരണമായതെന്ന് കണ്ടെത്താൻ പോലീസും വ്യവസായ സുരക്ഷാ വിഭാഗവും അന്വേഷണം ആരംഭിച്ചു. കമ്പനി അധികൃതരിൽ നിന്ന് വിവരങ്ങൾ ശേഖരിച്ചു വരികയാണ്.

സംഭവത്തിൽ ആന്ധ്രാപ്രദേശ് സർക്കാർ അനുശോചിച്ചു. പരിക്കേറ്റവർക്ക് അടിയന്തരവും ലഭ്യമായതിൽ വെച്ച് ഏറ്റവും മികച്ചതുമായ ചികിത്സ ഉറപ്പാക്കാൻ ജില്ലാ ഭരണകൂടത്തിന് നിർദേശം നൽകിയതായി മുഖ്യമന്ത്രിയുടെ ഓഫീസ് അറിയിച്ചു