'ബാഹ്യസമ്മർദ്ദത്തിന് വഴങ്ങില്ല'; റഷ്യയിൽ നിന്നുള്ള എണ്ണ ഇറക്കുമതി നിർത്തിവെക്കില്ലെന്ന് എസ് ജയശങ്കർ

ന്യൂഡൽഹി: അന്താരാഷ്ട്ര തലത്തിൽ നിന്നുള്ള ബാഹ്യസമ്മർദ്ദങ്ങൾക്ക് വഴങ്ങി റഷ്യയിൽ നിന്നുള്ള എണ്ണ ഇറക്കുമതി നിർത്തിവെക്കില്ലെന്ന് വിദേശകാര്യ മന്ത്രി എസ്. ജയശങ്കർ വ്യക്തമാക്കി. റഷ്യയുമായുള്ള വ്യാപാര-ഊർജ്ജ ബന്ധങ്ങളിൽ ഇന്ത്യ മാറ്റം വരുത്തില്ലെന്ന് വിദേശകാര്യ മന്ത്രാലയത്തിന്റെ പാർലമെന്ററി കൺസൾട്ടേറ്റീവ് കമ്മിറ്റി യോഗത്തിലാണ് മന്ത്രി ഉറപ്പിച്ചുപറഞ്ഞത്. മനീഷ് തിവാരി ഉൾപ്പെടെയുള്ള എം.പിമാർ ഉന്നയിച്ച ചോദ്യങ്ങൾക്ക് മറുപടി നൽകുകയായിരുന്നു അദ്ദേഹം.

റഷ്യയുമായി എണ്ണക്കച്ചവടം നടത്തുന്ന രാജ്യങ്ങൾക്ക് മേൽ അധിക താരിഫ് ചുമത്താൻ അമേരിക്കൻ കോൺഗ്രസ് ഡൊണാൾഡ് ട്രംപിന് അധികാരം നൽകിയ പശ്ചാത്തലത്തിൽ സാഹചര്യം ഇന്ത്യ സൂക്ഷ്മമായി നിരീക്ഷിച്ചു വരികയാണ്. ഏകപക്ഷീയമായി അധിക താരിഫ് പ്രഖ്യാപിക്കുന്നത് ഇരുരാജ്യങ്ങളും തമ്മിലുള്ള ഉഭയകക്ഷി ബന്ധത്തെ പ്രതികൂലമായി ബാധിക്കുമെന്ന് ഇന്ത്യ മുന്നറിയിപ്പ് നൽകിയിട്ടുണ്ട്. കഴിഞ്ഞ ആഴ്ച പ്രധാനമന്ത്രി നരേന്ദ്ര മോദിയും ട്രംപും നടത്തിയ ടെലിഫോൺ സംഭാഷണത്തിലും, വിദേശകാര്യ മന്ത്രി ജയശങ്കർ യു.എസ് സ്റ്റേറ്റ് സെക്രട്ടറി മാർക്കോ റൂബിയോയുമായി നടത്തിയ കൂടിക്കാഴ്ചയിലും ഇന്ത്യ നിലപാട് വ്യക്തമാക്കിയിരുന്നു.

ചില രാജ്യങ്ങൾ താരിഫിനെ സാമ്പത്തിക ആയുധമാക്കി മാറ്റുകയാണെന്ന് പ്രധാനമന്ത്രിയുടെ പ്രിൻസിപ്പൽ സെക്രട്ടറി പി.കെ. മിശ്രയും വിമർശിച്ചു. യൂറോപ്യൻ യൂണിയനിലെ പല രാജ്യങ്ങളും ഇപ്പോഴും റഷ്യയുമായുള്ള വ്യാപാരം തുടരുന്നുണ്ടെന്ന് ചൂണ്ടിക്കാട്ടിയ ജയശങ്കർ, ഊർജ്ജ മേഖലയിലെ സഹകരണം ഇന്ത്യയും തുടരുമെന്ന് വ്യക്തമാക്കി.

അതേസമയം, റഷ്യ-യുക്രെയ്ൻ യുദ്ധത്തിൽ വെടിനിർത്തലിനായി ഇന്ത്യ നിർദ്ദേശം മുന്നോട്ടുവെച്ചതായി യുക്രെയ്ൻ വിദേശകാര്യ മന്ത്രാലയം സ്ഥിരീകരിച്ചിട്ടുണ്ട്.