കഴിഞ്ഞ 10 വർഷത്തിനിടെ ഇന്ത്യയിൽ ദാരിദ്ര്യ മുക്തരായത് 2.5 കോടി ആളുകൾ: പ്രധാനമന്ത്രി നരേന്ദ്ര മോദി

ദില്ലി: കഴിഞ്ഞ ഒരു പതിറ്റാണ്ടിനിടെ ഇന്ത്യയിൽ 25 കോടിയോളം (250 മില്യൺ) ജനങ്ങൾ ദാരിദ്ര്യത്തിൽ നിന്ന് മോചിതരായതായി പ്രധാനമന്ത്രി നരേന്ദ്ര മോദി. ദില്ലിയിൽ നടന്ന 'ബ്ലൂംബെർഗ് ന്യൂ ഇക്കണോമി ഫോറം' (Bloomberg New Economy Forum) അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. പൗരന്മാരെ ഭരണകൂടത്തെ ആശ്രയിച്ചു ജീവിക്കുന്നവരാക്കുന്നതിന് പകരമായി, അവരെ ശാക്തീകരിക്കുകയാണ് ഗവൺമെന്റിന്റെ യഥാർത്ഥ ചുമതലയെന്ന് പ്രധാനമന്ത്രി വ്യക്തമാക്കി.

സർക്കാരിന് അധികാരമുണ്ടെങ്കിലും, പൗരന്മാരെ വ്യവസ്ഥിതിക്ക് വിധേയരാക്കുകയോ അതിനെ ആശ്രയിച്ച് ജീവിക്കുന്നവരാക്കുകയോ ചെയ്യരുത്. മറിച്ച്, പൗരന്മാരുടെ ശേഷി വർദ്ധിപ്പിക്കുകയും അവരെ ശാക്തീകരിക്കുകയുമാണ് വേണ്ടത്. ഇന്ത്യ ഇന്ന് സഞ്ചരിക്കുന്നത് ഈ പാതയിലൂടെയാണെന്നും അദ്ദേഹം ചൂണ്ടിക്കാട്ടി. ലോകത്തിലെ പല രാജ്യങ്ങളിലെയും ആകെ ജനസംഖ്യയേക്കാൾ കൂടുതൽ ആളുകളെയാണ് കഴിഞ്ഞ പത്ത് വർഷത്തിനിടെ രാജ്യം ദാരിദ്ര്യത്തിൽ നിന്ന് കരകയറ്റിയതെന്നും പ്രധാനമന്ത്രി കൂട്ടിച്ചേർത്തു.

സാമ്പത്തിക വളർച്ചയോ സാങ്കേതിക പുരോഗതിയോ മാത്രം മുൻനിർത്തിയാകരുത് സർക്കാരുകളും ബിസിനസ് സ്ഥാപനങ്ങളും പുരോഗതി അളക്കേണ്ടത്. മറിച്ച്, അതിന്റെ നേട്ടങ്ങൾ സാധാരണക്കാരായ ജനങ്ങളിലേക്ക് എത്രത്തോളം എത്തുന്നുണ്ട് എന്ന് കണക്കാക്കിയാവണം വിലയിരുത്തേണ്ടതെന്നും അദ്ദേഹം ഓർമ്മിപ്പിച്ചു.